“Pathian ih Tiamkam mi hrang, Zuam uh si” (sim tu Rev. Fr. Joseph Ro Nei Thang), January 15, 2021.

“Pathian ih tiamkammi hrang zuam uhsi”

Thuthangtha sim tu Rev. Fr. Joseph Ro Nei Thang

Zarhkel Zarh (1) nak, Ninga ni (January 15, 2021)

Siarding: Hebrew 4:1-5, 11; Ps 78:3-4, 6-7(a), 7(b)-8; Mark 2:1-12

          Leitlun khuazakip ihsin RVA Falam Chin Service a rak ngai ringringtu Bawi Khrih ah duhdawt zetmi nu le pa u le nau pawl, “Kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghlim ih pumkhat sinak pawl cu nan zate thawn um hram seh” tiah cibai ka run lo buk hai. Tuihni cu 2021, January thla ni 15, Tlawngkai ni nga ni asi. Tuihni kan siar dingmi Bible pawl cu Hebrew 4:1-5, 11; Ps 78:3-4, 6-7(a), 7(b)-8; Saam a sawnnak ah “Bawipa ih thil tuahmi pawl cu hngilh hlah uh” tiah asi pei. Cun Thuthang ttha ahcun Mark 2:1-12 tiang a si pei. Kan ruah khawm tlang dingmi cu “Pathian ih tiamkammi hrang zuam uhsi” tiah asi pei. 

          Tuihni ih kan siarmi Hebrew cakuat 4:11 ah “Curuangah Pathian ih tiammi colhnak kan co theinak dingah kan zuam thei patawp in zuam uhsi. Annih in Bawipa ih thu an thlunlo ruangah an co theilo vek cun kannih pawl pakhat hman si hram hlah uhsi” timi kha ttha le fel tak tein kan ruat tikah Pathian umnak hmun le a tiamkammi hmunah kan thlengih kan co thei ve nak dingah kan zuam thei patawp in zuam uhsi in tinak thawngin Pathian ih tiamkammi ram thlen cu kan zuam rero a ttul asi ti a lang asi. Cumi cu rundamnak kan ngahnak dingah zuam thei patawp in kan zuam a ttul tinak tla asi. Pathian in rundamnak cu a lakin in pek. Jesuh Khrih in a nunnak in liam sakih rundamnak in pek. Thlarau Thianghlim in rundamnak kan ngah theinak ah in dil sak, in bawm asi. Pathian in a rundamnak cu a lakin in pek nain kannih in teh cumi Pathian nih in pekmi kha ziangtinso kan cohlang ih kanmah le kanmah rundammi si dingin zuamnak kan nei ti kha ruat kan ttul zet asi. Ziangahtile Philipi 2:12 “Rundamnak a famkimin nan ngah theinak dingah ttihzahnak le tthia phah in ttuan rero uh” tiah St. Paul nih in zirh, in forh asi. Tuihni kan siarmi ah kan zuam thei patawp in zuam uhsi in ti ih St Paul incun Pathian ttihzahnak le tthia phah in ttuan rero uh in ti asi. Zumtu kan si hlanah cun kan zuamnak le kan ttuannak pawl cu kan rundamnak hrangah a santlai lo, asinain zumtu kan si hnu ahcun kan zuam ttul ringring hi asi. Curuangah St Augustine in “Pathian in nangmah tello in a lo serhsiam nain nangmah tello in a lo run hai lo ding asi”tiah a ti. Pathian in kan zuamnak cu a tih a hmat in pyuh asi.

          Luka 13:23-24 ah Bawipa Jesuh hnenah mi pakhat in“Bawipa rundamnak ngahtu hi mi malte lawng ansi ding?” tiah a sut tikah Bawipa Jesuh in “a fiakmi sangka ihsin luh zuam uh; ziangahtile mi tampi in cuih sung luh cu an zuam rero ding nain an ti theilo ding” tiah a sawn. Bawipa Jesuh in a fiakmi sangka ihsin luh zuam dingah in zirh asi. A fiakmi sangka ihsin luh zuam ding in timi cu luh dingah a har zet, a lut theitu pawl khal an mal ngaingai tinak asi. Zuamnak kan nei hrat lawngah kan lut thei dingmi, kan co thei dingmi Pathian ih cawlhnak hmun vancung ram hi asi. Mt 7:13-14 ah tla Bawipa Jesuh in miburmi hnenah “A fiakmi kotka sungin feh uh, ziangahtile hell fehnak kotka cu a kau ih a lamzin khal a ol; curuangah a zawhtu khal an tam asi. Sikhalsehla nunnak sungih luhnak kotka cu a fiakih a fehnak lamzin khal a har; curuangah a thleng suaktu pawl khal mi malte lawng ansi” tiah a zirh.

          A ol zawngin vancung ram feh tum cu hell tlaknak asi. Pathian kan zumih kan zumnak parah ziangso kan ttuan? Pathian in zumnak thluasuah in run pekih kanmah lamih teh ziangso Pathian kha kan pek sal? Jesuh Khrih kan zum kan ti ih kan duhduh in kan nuam, ka hmurka in Bawipa, Bawipa kan tiih kan nuncan cu Bawipa ih duhlomi hlir kan tuah asi ahcun Mt 7:21-23 ah Jesuh in ‘“Bawipa, Bawipa’ tiih i kotu hmuahhmuah in vancung uknak ah an thleng thluhlo ding; vancung ih a ummi ka Pa ih duhnak a tuahtu lawng an thleng ding asi. Thutthennak ni a thlen tikah mi tampi in ‘Bawipa, Bawipa, na     hmin in thu kan sim, na hmin in khawsia kan sawi suakih mangbangza tampi kan tuah’ tiah kan hnenah an ti ding. Asinain kei cun, ‘ka lo thei dahlo! Ka hnen ihsin tlan uh, nannih mi tthalo pawl’ ka ti hai ding” tiah in zirh asi. Luka 13:25-28 ah Bawipa Jesuh in “Inn neitu Bawi cu a pok dingih sangka cu a hren ding; cule a lengah dingin sangka cu nan king dingih ‘Bawipa, Bawipa, sangka in rak ong sak hram aw,’ nan ti khalle ‘khuitawk ihsin nan rat ka theilo’ a lo ti ding. Cule nannih in ‘nangmah thawn rawl kan ei tlangih tidai khal kan in tlang asi kha! Kan khaw sungah tla thu na zirh rero kha! ti-ah nan ti ding. Sikhalsehla anih in ‘khuitawk ihsin a rami nan si ka theilo. Nannih mitthalo pawl, ka hnen ihsin tlan ttheh uh’ tiah a lo ti dingih nannih pawl cu lengah hlon-hlo nan si ding” tiah ati.

          Pathian ih rongbawltu si nacing in Pathian in ‘ka lo theilo’ a ti tikah ziangtluk in so a na ding. Bawipa ih theilo mi, Bawipa ih a tih ahmat pyuh lo mi, suk le so ah sumpai hawlin rongbawltu pawl hi Bawipa ih hlonnak an tuar ding si kha! Ziangahso? A dikmi le a dingmi an tuahlo ruangah asi. Bawipa rori in amah rongbawltu rori kha ‘nannih mi tthalo pawl ka hnen ihsin tlan hlo uh, khuitawk ihsin nan ra ka thei hailo’ tiah hlon an tuar hlan ah Bawipa in degree a chiah ding. Curuangah Galati 6:7 ah “Zokhal amah tuhmi vel cekci in a aat leh ding” tiah asi. Pathian kan zumih kan tuahmi a tthalo ahcun Bawipa in kan parah thu a tthen tikah hlon-hlo mi kan si ding asi. Kan tuhmi vekin kan aat ttul asi. Tuihni kan siarmi kha kan zoh sal tikah Israel miphun pawl cu Pathian in Moses ih kai-hruainak thawngin Egypt sal kut sung ihsin a run suakih tipisen an kaan thei tikah Israel mipi pawlin Pathian parah siseh, a siahhlawh Moses parah siseh, an zum asi tiah Suahlannak 14:32 ah kan hmu thei.

          Cun 1Korin 10:2 ah “Israel miphun pawl cu Moses thluntu an si bangtukin rero sung ah le tipi sungah baptism an la asi” tiah kan hmu. Israel miphun pawl lak sungah Baptism ngahtu cu pacang hlir 600,000 (nauhak le nunau tello in) lai ansi nain khami hmuahhmuah lakin Caleb le Joshua lawng kha Pathian ih tiamkammi ram ah an thleng thei. Ziangahso a dang pawl an thleng lo? Baptism an ngah hnu, Pathian zumtu an si hnu ah Pathian an dodal, Pathian thu an ngailo, Pathian ih siahhlawh Moses tla an dodal, a thusimmi an ngailo, a thah hman an tum tiangin an nung ruangah asi. Kannih tla Pathian kan zumih baptism kan lakih cuti cun zumtu dinhmun ah kan thleng. Asinain Pathian duhnak kan thlunlo, Pathian ih thupekmi pawl kan dodal, Pathian hnattuantu asiahhlawh puithiam pawl ih zirhmi kan ngailo, kan thlunlo; kan hmurka in siseh, kan tuahnak in siseh kan dodal asi ahcun Pathian ih tiamkammi kan co lo dingih kan hlo thluh ding asi tiah tuihni kan siarmi Hebru 4:11 ah “Annih in Bawipa ih thu an thlunlo ruangah an co theilo vek cun kannih pawl pakhat hman si hram hlah uhsi” tiah ralrinnak in pek asi. 

          Pathian ih colhnak hmun thianghlimbik, vancungram lam kan pan lai ah zuam theinak dingah vancung thluasuah a phunphun cu kan hnenah kan Bawipa Jesuh Khrih thawngin in pek zo asi tiah Efesa 1:3 ah Paul nih in zirh asi. Cumi thluasuah phunkim kan nei asi ti kha vun mang ringring in kanmah lam ihsin zuamnak tumpi thawn Pathian ih duhnak kha thlun uhsi. Pathian ih duhnak kan thlun suak asi ahcun kan duhnak pawl tla Pathian nih in run pe ding asi. Pathian ih pekmi zaangfahnak veel thawn zuam suak ringring uhsi; vanram lam kan pan lai ah lamzin hrekkhat ah tan men hlah uhsi. A net tiangin kan zuam thei, kan ding suak thei asi ahcun rundammi kan si ding tiah Mt 24:13 ah Bawi Jesuh nih in zirh asilo maw?

          Zuam theinak thazaang cahnak a phunphun cu ziangtinkimtitheitu Pa le Fapa le Thlarau Thianghlim in RVA a ngaitu nan zate lo thluasuah hram seh. Amen.

 

Add new comment

4 + 11 =