“Pathian le a Kohhran hrangah ttannak”

“Pathian le a Kohhran hrangah ttannak”

(November 21, 2019 – Thursday)

Bawi Khrih ah duhdawtmi nu le pa, u le nau pawl, “Kan Bawipa Jesuh Khrih ih zaangfah lainatnak, Pa Pathian ih dudawtnak le Thlarau Thianghlim ih pawlkomnak pawl cu nan zateih hnenah um hram seh” tiah bibai ka run lo buk hai. Tuihni cu 2019, November thla ni 21 ni, Tlawngkai nilini asiih Bawinu Mary kha Biakinnpi sungah a nu le a pa nih a aapnak puaini tla asi. Kan siar dingmi Bible pawl cu Makhabii thuanthu ukkhatnak 2:15-29 tiang asiih a tlangpi thu cu “Pathian le a daan hrangah ttannak” tiah asi. Cun Thuthang ttha sung ahcun Luka 19:41-44 tiang asiih a tlangpi in cun “Bawipa Jesuh in Jerusalem khawpi a zoh ih a ttapnak thu” asi. Tuihni ah “Pathian le a Kohhran hrangah ttannak” thu kan ruah khawm tlang pei.

Israel miphun pawl cu Pa Pathian ih kut cahnak thawgin le Moses ih hruainak thawngin Egypt sal kut sung ihsin an luatih nelrawn ramcar ah kum 40 an rei ih hniksaknak tampi an tong asi. Hniksaknak camibuai aungin Pathian lamah an ttang ttha tu pawl cu Pathian ih tiamkamnak Khanaan hram kha an co asi. Anmah hruaitu Moses cu zumnak lamah a tla deuh ruangah Pathian ih tiamkamnak ram a lut thei lo asi. Amah bawmtu Joshua in Pathian ih hrilmi Israel mipi pawl kha a hruai asi.

Joshua in Pathian ih bawmnak thawngin Israel miphun pawl cu Pathian ih tiamkammi ram ah a rak thlenpi hai. Pathian ih duh daan vekin ram tla a tthen sak hai. A thi hlan deuh ah Israel misenpi pawl kha Shechem ah a ko khawmih “Bawipa nan ren duhlo asiahcun tuih sunah hin hril uh; Mesopotemia ramih nan pupa pawlin an rak biak dahmi khawzing pawl maw nan biak sawn ding; asilole atuih nan umnak Amor miphun pawlih khawzing pawl deuh so nan biak ding, hril uh. Asinain kei le ka innsang cun Bawipa kan biak ding” tiah ati. Cutikah Israel misenpi cun “Bawipa tlansan tahratin khawzing dangdang biak dingah kan tum lo lawlaw asi” tiah anti. Cutikah Joshua in “Bawipa cu nan rian thei lem pei maw? Ziangahtile amah cu a thianghlimmi Pathian asiih thiik neimi Pathian asi. Nan mawhnak le nan sualnak pawl khal a lo ngaidam lo ding. Bawipa tlansan tahratin ramdang khawzing nan biak asile nan parah caan reipi a rak ttha zo hman sehla amah in a lo ral dingih a lo hrem ding; a lo siatsuah ttheh hai ding asi” tiah ati. Cutikah Israel mi pawlin Joshua hnenah “Asilo, Bawipa lawnglawng kan rian ding. Bawipa kan Pathian kan biak dingih Amah thupekmi kan thlun ding” tiah an let. Joshua in lungawi zetin lungphun a tuahih misenpi hnenah “hi lungphun hi zoh hnik uh! kan kar lakah kan thu in theipitu asi ding. Bawipa in kan hnenih a simmi thu hmuahhmuah cu hi lungphun in a thei thluh. Curuangah nan Pathian cu dodal tahratin ral nan thawhlo nak dingah kan thu in theihpitu lungphun asi ding” tiah Joshua 24:15-16, 19-21, 27 fiang zetin kan hmu thei. 

Prophet Daniel le a hoipi pathum pawl cu Babylon siangpahang Nebuchadnezzar ih hnattuan ngahtu an rak si nain an biakmi Pathian parah titsaa an rak nei zetih rawl thianglo an eilo, zu tla an in lo ruangah Pathian nih fimthiamnak, mang leh thiamnak le thuthuk pawl leh thiam nak thluasuah a pek hlei ah meipualpi sung ihsin siseh, kiosa kut sung ihsin siseh humhimnak an ngah asi.

Tuihni kan siarmi Makhabii thuanthu sungah tla siangpahrang Antiochus ih tlangsuak upa pawlin Israel miphun pawl kha hramhram in khawvel pathian hnenah biak raithawinak pek dingah thu an pek tikah Mattathias “Kei le ka fa le pawl le ka unau sungkhat pawlin cun kan pupa pawlin Pathian an biaknak kha tansan tahrat in siangpahrang ih thupek cu kan thlun thei lo asi. Vancung ihsin Pathian le a daan pawl hlon lo nak dingah humhimnak thazaang in pek ding asi. Kan daan cu vorhlam ah siseh kehlam ah siseh malte hman kan tthin theilo asi” tiah ral ttha zetin an ttang asi. 

Bawi Khrih ah dudawt zetmi nu le pa, u le nau pawl, Pathian rian ding, Pathian parah titsaa nei ding le Pathian parah siseh, a Kohhran parah siseh titsaa nei cio ding, ttang kai cio ding hi tuih kan san ah tla a thupi tuk lawmmam asi. Hnattuan tta kan ngah duh ruangah maw? Innsang ttha nei duh ruangah maw? Upa pawlin ka hnattuan ihsin in dawi pang ding ti phan ruangah maw Pathian kan phatsan ding? A Kohhran kan phat san ding? “Laidaan a si ko si, nunau cu pasal thlun daan si ko” tiah a tir ihsin a shungkhaan cia hlah aw. Bawi Jesuh le a Kohhran parah tiitsaa-taya nei ringrign uhsi u le nau pawl. Mt 12:30 ah Bawi Jesuh in “Zokhal ka hnenih a ttanglotu cu i dodaltu asi” tiah fiang zetin in sim kha. Jesuh dodaltu maw a ttantu na si pei? Jesuh ih Kohhran a dodaltu maw a ttantu na si pei? Ruat sal thlang aw. Ral ttha zetin kan ttangih Jesuh Khrih le a Kohhran hrang ah tiah caan net tiangin kan tuar ahcun Jesuh Khrih in Pathian hmai ah in ttanpi ve ding. Mt 10:32 “Mi pakhat in mipi hmai ah ka minung sinak kha a ttanpi ngam asi ahcun vancung ka Pa ih hmaika ah amah kha ka ttanpi ve ding” tiah Bawi Jesuh nih fiang zetin in zirh asi.

Baptism kan lak lai ah kanmah rori in siseh, lu in kaitu pawlin siseh thuakamnak kan tuah asi. Cumi pawl cu Satan siseh, Satan ih mibumnak pawl siseh, an thukamnak pawl siseh ka hlon asi tiah thukamnak asi. Cuhlei ah thosal puaini ah a cuih thukamnak cu atharin kan rak tuah sal ttheu asi. Satan siseh, a hnattuannak pawl siseh ka hlon kan ti tikah Pathian pakhat kan biak dingih amah lawng kan rian thlang ding tinak asi. Joshua in mipi thawn thukamnak ah lungphun a hmang asi. 

“Zohmanin lo bum hlah hai seh. Ziangahtile misualralpa cu Pathian ih biakinn sungah a lut dingih to tahrat in Keimah hi Pathian ka si a ti ding” tiah Paul in 2Thessalon 2:3 le pa ah ralrinnak in pek asi. A fekmi zumnak kan nei lo ahcun bumnak kan ton dingih kan zumnak tla kan hlo ter pang ding asi. Tikholhnak Sacrament kan ngah lai ah kan kut sungih kan kenmi meisa vanmi kha hmitterlo dingah siseh, kan lu parih retmi puang rangte kha bal lo dingah siseh, teima zetin zuam ding, ttangkai ding kan si asi. Kan zumnak a ttumtertu “combine service, fellowship worship service, global miphun worship service pawl” kha hrial in Pathian le a maih Kohhran ah hnget khoh zet in ding ding kan si asi. 

Tuihni Bawinu Mary cu biakpinnpi sungih a nu le pa in a aapnak puai kan tuah tikah Bawinu Mary cu ziangzongza Pathian hrangah a nunnak pekin ttan a lak asi. Kannih tla kan biakmi le kan rianmi Pathian hrangah ziangzoza ah ttan la cio uhsi.

Bawipa in lo thlawsuah hram seh.