“Pathian Uknak”

“Pathian Uknak”

2023 November 16 (Tlawngkai nili) ni RVA Falam service in thuthangṭha simnak: “Ziangtikah so Pathian Uknak a ra thlen ding?” tiah Jesuh cu an sut. RVA Falam service in thuthangṭha a ngaitu Bawi Khrih ah duhdawtmi nu le pa, u le nau pawl, Bawipa ih daihnak cu nan hnen ah um ringring hram seh. Tuni ih kan ruat tlang dingmi cu Pathian Uknak thu a si ding. Tuni kan siar dingmi Gospel sung ih thusuhnak cu ‘Ziangtikah so Pathian Uknak a ra thlen ding?’ ti a si i Bible cathiang hlim siarnak kan nei hmaisa ta hrih pei. Luke 17: 20-25 Farasi mi ṭhenkhat in, “Ziangtikah so Pathian Uknak a ra thlen ding?” tiah Jesuh cu an sut. Jesuh in, “Pathian Uknak cu mithmuh in a ra lo. Zohman in ‘Zoh hnik uh! Hinah a um hi! Khinah a um khi!’ tiah an ti lo ding. Ziangahtile Pathian Uknak cu nan sungah a um a si,” tiah a ti. Cule a dungthluntu pawl hnenah, “Milai Fapa ih caan ni khat tal hmu ve thei sehla tiah saduh nan thah tikcu a ra thleng ding, asinain nan hmu lo ding. Nan hnenah ‘Zoh uh! Khinah a um! Zoh uh! Hinah a um!’ tiah a lo titu an um ding. Sihmansehla zoh dingah va feh hlah uh. Nimthlakau in van khatlam kap ihsin khatlam tiang a hrawh ih a tlet ṭheh vekin Milai Fapa cu amah ih ni ahcun a si ve ding. Asinan hmaisabik ah amah in tuarnak nasa zet a tong dingih tuih san minung pawl in an hnong ding. (Bawipa ih thuthangṭha a si.) Pathian Uknak timi hi leitlun siangpahrang vek in siangpahrang pakhat in a uk ding ih ram kulh sungah ram pakhat vek in um ding ah an rak ruat dah. Cuvek uk nak kha Jew miphun pawl in an hngak hlap zet dah mi a rak si. Asinan Pathian Uknak cu an ruahnak vek in si lo in an ruah ban lo zawng in a rak thleng. Tuni kan siarmi Gospel sungah Farasi pawl in Bawi Jesuh kha, “Ziangtikah so Pathian Uknak a ra thlen ding?” tiah an sut tikah, Bawi Jesuh in ‘Pathian Uknak cu nan sungah a um a si’ tiah a sim hai. Pathian Uknak cu nan sungah a um a ti ruangah leitlun ram vekin ram ri um mi a si lo ih hmuh theih mi khal a si lo tinak a si. Leitlun ram uk nak ram thu kan zoh hmaisa pei. Leitlun ram uknak ah cun Myanmar ram kulh sungah kan um a si le ziangtin kan um khal siseh thilṭha kan tuah siseh, thilsia kan tuah siseh Myanmar uknak sungah kan um kha a si ko. US ram kulh sungah kan um a si le ziang tivekin kan um a si khal le an ram kulh sung kan um sung poh cu US uknak tang ah kan um a si mei. Lei tlun ram uknak cu ram kulh thawn a saing. Asinan Pathian Uknak cu ram kulh le umnak thawn a siang lo. Khui nah ram ah kan um khal siseh Pathian Uknak sungah kan um thei vekin Biakinn sungah kan um rero lai hman ah Pathian Uknak leng ah kan um khal a rak si thei vel ala. Umnak hmun, khua le ram thawn a saing lo. Asile Pathian Uknak sungah a um mi cu zo pawl an si pei? Ziang tin kan thei thei ding? Pathian Uknak ram sung um le um lo cu a mah a thu kan ngai maw ngai lo, kan nunnak ah a mah duhnak nih in uk maw, satan uknak nih in uk ti hi Pathian Uknak tangah kan um le um lo ti tahfung cu a si. Khui nah khua le ram ah kan um a si khal le a mah duhnak vek in kan um kan zuam, a thu kan ngai i ni tin kan tlan len nak ah a mah in in uk a si le cu Pathian Uknak sungah kan um ti nak a si. Khat lam ah Biakinn sungah kan um hman sehla, hmun thianghlim bik ah kan um hman seh la, a mah Pathian duhnak vek in kan nung lo a thu kan ngai lo ih kan nunnak a mah duhnak in in uk lo a si le cu Pathian Uknak leng ah kan um tinak a si. Thuthangṭha a ngai tu nan zate par ah Pathian in thluasuah lo pek hram seh la, a mah uknak sungah um ringring theinak ding in lo bawm hram seh. Fr. Peter Lal Zin Thang (Hakha Diocese)

Add new comment

8 + 5 =