“Thlaici ṭha tuh aw”

2020 Jan 31, (Friday)                 

“Thlaici ṭha tuh aw”

    Bawi Khrih ah duhdawtmi u le nau pawl, Bawipa ih daihnak nan hnenah um hram seh tiah a hmai sabik ah cibai ka lo buk hai.  January 31 ni hi St. John Bosco ih puai ni a si. A nih hi a cuangce in mino pawl a duhdawt zet tu, mino pawl zoh khentu a si. Cun Salesians (gaing) a din tu a si ih tu ni ah Salesian Saingbawi, Brother le Sister pawl hrang ah siseh, St. John Bosco hmin a la tu hrang ah siseh, St. John Bosco vek in mino pawl lamṭha lamhman ih a hruaithei tu pawl an um vivo thei nak ding ah siseh, thla kan cam cio pei ti khal ka lo sawm duh.   

        Tuni January 31, 2020 (tlawngkai ninga) ih kan siar ding mi thuthangṭha siarnak kan nei ta hrih pei.

Mk 4:26-34 

26. Jesuh in, “Pathian Uknak cu hi bangtuk a si. Mi pakhat in a lo ah thlaici a vorh.

27. Zan ah a it, zingah a tho ih sunah hna a ṭuan, cuih sungah thlaici cu an rak kho ih an ṭhang.  Asinain ziangtin cuvekin a cang, ti a thei lo.

28. Leilung in thlaici kho cu a ṭhangter ih rah a rah ter, hmaisabik ah hnah no an suak, cuih hnuah an vui ih neta bikah a fang an um.

29. A fang a cut tikah hnaṭuantu pa in fang ah caan a cut ruangah fangahnak favah in a fang cu a at,” tiah a sim.

30. Jesuh in, “Pathian Uknak cu ziang bangtuk a si tiin so kan ti ding? Simfiangnak ah ziang tahṭhimnak so kan lak ding?

31. Anṭam ci bangtuk a si. Mi pakhat in leilung tlunih thlaici fate bik anṭam ci cu a lak ih leilung ah a vorh.

32. Tikcu malte hnuah a kho ih rawl kung dang hnakin a tum bikah a cang. Hnge le ṭeek tumpipi tla a nei thei ih vate tla cu a hnah hneem ah bu tla an sak,” tiah a ti.

33. Hi bangtuk tahṭhimnak dangdang tla hmangin an hnenah an theih theinak ding tawpin thu a sim.

(Bawipa ih thuthagṭha a si)

        Bawi Khrih ah duhdawt mi u le nau, tu ni kan sir mi thuthangṭha ah Bawi Jesuh in Vancung Uknak kha thlaici thawn tahṭhimnak a sim ih, a pakhat nak ah ‘Mi pakhat in a lo ah thlaici a vorhnak’ thu le a pahnih nak ah ‘anṭamci thawn tahṭhimnak’ a si. Tahṭhimnak a pakhatnak kan ruat tlang hmai pei ‘mi pakhat in a lo ah thlaici a vorh.  Zan ah a it, zingah a tho ih sunah hna a ṭuan, asinain ziangtin cuvekin cuih sungah thlaici an rak kho ih an ṭhang’ ti a thei lo. Cutivek in kan nih khal in hna kan ṭuan ih kan hna ṭuannak par ah hlawh tlinnak a hmu ter tu, rah a rah ter tu cu Pathian a si. Kan ṭuanvo cu ṭha te ih hnaṭuan ding hi a si. Ziang a cang leh ding ti cu Pathian kutsung ah ap ding kan si. Paul in 1 Corin 3:6 ah ziang a ti si le “kei in a ci ka tuh ih Apollos in ti a toih, asinain a ṭhantertu cu Pathian a si.” a ti. Duhdawt mi u le nau pawl kan ṭuanvo te kha ṭha te in kan ṭuan tum pei ih cu lo cu Pathian kut sung ah ap cio uh si. Cun ‘a fang a cut tikah hnaṭuantu pa in fang ah caan a cut ruangah fangahnak favah in a fang cu a at’ a ti. Hi tawk ah ka sim duh bet mi cu Galati 6:7 ah “milai cun an tuhmi vek cekci in an khawm ding” a tivek in thlaici ṭha na tuh a si le na thei lo sungah a ṭhang vivo ding ih rah ṭha na khawm leh ding. Thlaici ṭha lo na tuh a sile tla cuih thlaici cu a ṭhang vivo ding ih rah ṭha lo na khawm leh ding. Curuang ah thlaci ṭha a vorh ih mah ṭuan vo ṭha te ih a ṭuan thei tu si ding in Pathain hnen ah thazang thluasuah dil in kan zuam cio pei tiah ka lo forh duh.

        A pahnihnak ah ‘anṭam ci tahṭhimnak’ in thazang kan lak tlang hrih pei. Vancung Uknak cu an ṭamci bangtuk a si.’ a ti. Hi mi tahṭhimnak thawn pepar in kan zate ih kan thei mi Mother Theresa ih nunnak kan zoh a si le fiang zet in kan thei thei ding tin ka ruat. Mother Theresa hi a thih hlan ah Nobel Peace Prize “Edkb,fvfjidrf;csrf;a&;qk” ti ih kawh mi lak sawng tum pi a ngah lawng silo in mi dangdang ih bawnnak pek mi thawn khuaruahharza in minung tam pihrang daih in hna a ṭuan thei a si. Hnaṭuan a thok lai ah India Rupee 5 lawng a nei a si. Zianghman nei lo te in farah zet in hnaṭha a ṭuan thok tik ah a nunnak a netnak lam cu ziang thawn a bang ti sile a fate zet mi anṭam ci tahṭhimnak thawn a bang. “Tikcu malte hnuah a kho ih rawl kung dang hnakin a tum bikah a cang. Hnge le ṭeek tumpipi tla a nei thei ih vate tla cu a hnah hneem ah bu tla an sak,” ti mi thawn a bang a si. Duhdawt mi zumtu u le nau pawl thilṭha tuah ding ah fimthiamnak sang zet nei hmai sa a ṭul lo. Milian si hmai sa si fekfek a ṭul lo. A tu na tuah thei mi, na ṭuan thei mi thilṭha, thlaici ṭha te kha Pathain rinsan in duhdawtnak thawn ṭuan aw, tuh aw la Pathian in na par ah rah ṭhaṭha, rah ṭampi a rah ter ding ih, midang hrang tiang ih ṭhat hnemnak pe thei tu ah a lo cang ter ding a si.

Fr. Peter Lal Zin Thang

Hakha Diocese