“Tirhthlah Bartholomeo”

Monday, August 28, 2023

“Tirhthlah Bartholomeo”

2023 August 24 (Tlawngkai nili) ni RVA Falam service in thuthangṭha simnak:
Jesuh in Nathanael a rat kha a hmuh tikah, “Israel mi taktak hi zoh hnik uh! A thinlung ah
zianghman hrokhrawlnak a um lo,” tiah a ti.
RVA Falam service in thuthangṭha a ngaitu Bawi Khrih ah duhdawtmi nu le pa, u le nau
pawl, Bawipa ih daihnak cu nan hnen ah um ringring hram seh. August 24 hi St Bartholomeo ih
puai ni a si ih, A hmaisa ah Bible siarnak kan nei ta hrih pei. Tuni kan siar ding mi Gospel cu Johan
1:45-51 tiang a si.
Johan 1:45-51
Filip in Nathanael a tong ih a hnenah, “Moses in Daan cabu sungah a thuhla a nganmi le profet
pawl khalin a thuhla an ngan mipa kha kan tong zo. Amah cu Josef fapa Jesuh, Nazareth khuami a
si,” tiah a ti. Nathanael in, “Nazareth khua in thil ṭha a suak thei pei maw?” tiah a ti. Filip in, “Ra
zoh hnik awla!” tiah a ti. Jesuh in Nathanael a rat kha a hmuh tikah, “Israel mi taktak hi zoh hnik
uh! A thinlung ah zianghman hrokhrawlnak a um lo,” tiah a ti. Nathanael in, “Ziangtinso i theih?”
tiah a sut. Jesuh in, “Filip ih a lo kawh hlan theipi kung hnuai ih na to lai ahkhan ka lo hmu zo,”
tiah a ti. Nathanael in, “Sayapa, nang cu Pathian Fapa na si! Israel Siangpahrang na si!” tiah a
ti. Jesuh in, “Theipi kung hnuai ih na to lai ka lo hmu, ka ti ruangah i zum a si maw? Hi hnakih thil
maksak tampi na hmu lai ding!” tiah a ti. Cule an hnenah, “Thungai in ka lo sim: Vancung khi a
ong aw dingih Milai Fapa parah hin Pathian ih vancungmi an ṭum le an kai kha nan hmu ding,” tiah
a ti.
(Bawipa ih thuthangṭha a si.)
St Bartholomeo hi Bawi Jesuh ih Dungthluntu asilole Tirhthlah hleihnih lak sung ih tel mi
pakhat a si. Trihthlah hleihnih sung in a hrek khat pawl ih thuhla kha tam deuh in kan thei mi a um
ih a hrekkhat pawl ih thu hla cu kan thei tuk lem lo. Bartholomeo hi a thu hla kan thei tuk lem lo
lawng siloin a hmin hman a thei lo mi tla kan tam zet men thei. Curuangah tuni ah a mah puai ni
kan tuah a si vekin a mah thuhla tampi kan thei lo hman sehla a hmin te tal kan cing thei deuhnak
ding in sim ka duh.
Bartholomeo hi Tirhthlah 12 sung in pakhat a si vekin Tirhthlah 12 pawl ih thuhla khal
asilole an hmin pawl khal zoh ta hrih uh si. Tirhthlah 12 pawl ih hmin cazin hi Bible sungah hmun
thum ah an ngan mi kan hmu thei ih; Matthai 10:2-4, Marka 3:16-19, le Luka 6:14-16 pawl ah kan
hmu thei ih malte an dang aw nak tete khal a um. Matthai le Marka ah cu an bang aw kan ti thei ih,
kan Falam Bible ah bel te hmin ngan daan malte a dang aw deuh ih mirang in cu a bang in an ngan
ko. Matthai sung ah Tadias tin a um ih Marka sung ah Thaddaeus tin a um. Cun Thaddaeus hmin
kha Luka sung ah cu a tel ve lo ih cumi ai ah Judas tiin a ngan. Judas Iskariot siloin St Jude tiin kan
thei ṭheu mi kha a si. Tirhthlah 12 pawl ih an hmin pawl cu Simon Piter, Andru, Zebedi ih fapa
Jeim, Johan, Filip, Bartholomeo, Matthai, Thomas, Alfias ih fapa Jeim, Simon (Piter asilo mi), cun
Thaddaeus (Luka sung ah Jeim ih fapa Judas tiin ngan mi), le Judas Iskariot an si. Hmin bang lo mi
tete a um tikah mallai kan thinlung in hnaihnok deuh men pang thei. Kan thei fiang ol nak ding ah
thuṭhimnak pakhat kan zoh pei ih, keimah hi inn ih in ko mi ka hmin le a leng ih in ko mi ka hmin a
bang aw lo, cu vek tete hi a rak um thei ṭheu mi a si.
Cun tuni kan siar mi Gospel hi Mithiang Bartholomeo puai ni ah kan siar ṭheu mi Bible a si
ih, asinan Bartholomeo timi hmin kan hmu lo lala. Hinah ah kan hmu mi hmin cu Nathanael timi a
si. Tuni kan siar mi Gospel sung ih kan hmu mi Nathanael hi Bartholomeo a si ti asi. Curuangah

himi Gospel hi kan siar ṭheu nak a si. Bartholomeo asilole Nathanael hi Jew pawl hi u-pa-de lam in
doctor buaih a ngah mi a si ih Filip thawn an kom aw zet mi a si an ti.
Filip in Moses le profet pawl in a ra ding tiin an sim cia rero mi Messiah Bawi Jesuh kha a
hmu tikah a rual pa asi mi Nathanael hnen ah a va feh vurvo ih a va sim. Nathanael khal cun Bawi
Jesuh kha Nazaret mi a si an ti ruang ah a zum tuk lem lo nan a rual pa in ‘ra zoh hnik awla’ a ti tik
ah a rak thlun ve cih ih Bawi Jesuh kha a tong ngah. Hi rualpi te pahnih an tong aw nak hi duh a
nung zet tin ka hmu. Filip in Jew miphun pawl le Israel miphun pawl ih an duh tuk mi le an hngah
rero mi Messiah a hmu ngah tikah a rual pa Nathanael hnen ah a feh loh li ih a va sim cih.
Nathanael kha le a mang bang nawn in a um rero ko nan a rual pa in thu ṭha a sim tik ah ziang ziar
lo in um san men lo in a thlun cih ve tikah Bawi Jesuh a hmu ngah ve ih mifim a sivek in Bawi
Jesuh ih ṭongkam a thei ve ten a rak zum ve cih a si. An background kan zoh asile Filip cu
ngaikaitu a si vekin ca thiam a si lem lo ding, Nathanael cu ca a thim tuk ih doctor buaih tiang
hman a ngah mi a si. Nathanael in nang simmi vek men ti siang lo in tangdornak thinlung thawn a
rual pa ih thu a ngai a si. Bartholomeo asilole Nathanael hi miṭha taktak a si timi hi Bawi Jesuh a
mah rori in a lang ter a si. “Israel mi taktak hi zoh hnik uh! A thinlung ah zianghman hrokhrawlnak
a um lo,” tiah Bawi Jesuh a mah rori in a timi cu ziang tuk in a sung lawi!
Tuni ah pakhat te thapek le sawm ka lo duh mi cu, Filip vek in kan raulpi kan inn hnen pawl
kha Bawi Jesuh hnen ah hruai duhnak thinlung nei kha zuam cio uh si, cun Bartholomeo asilole
Nathanael vek in thil ṭha tuah ding asi ah cun lungruh lo in nunnem le tangdor te in a cohlang thei
tu, tuah a duhtu si thei ding in zuam cio uh si. A ngaitu nan zaten Bawipa in lo thluasuah cio hram
seh.