“Tuanman maw Tuanmi a thupi deuh”

Thursday, August 20, 2020

Aug 19, 2020/Ezek 34:1-11/ Saam 23:/ Mt 20:1-16//
Pathian Tongkam sunlawih zet le hiarhal zet ih Thuthangtha ngai theutu u le nau pawl,
Bawipa ih, hnangm daihnak, lungawinak thluasuah cu nan hnenah thlenghram seh. Nan tulmi,
nan duh mi le nan tumtahmi pawl parah, hlawhtlinnak le famkimnak Pathian in mal lo sawm
hramseh, Amen. Aug 19 ni ih kan siarmi Bible ca; Ezek 34:1-11, le Mt 20:1-16, sungin “Tuanman
maw Tuanmi a thupi deuh” timi hlawmawk tlang ka duh.
leipar kan nunnak ah hin hna a phunphun kan tuan. Hrekkhat cun mai huamzawng,
maithiam zawng an tuan ih sumlut, nihlawh an ngah. Hrekkhat cun sumlut tamnak zoh in maih
huamlo mi le thiamlemlo mi khal tuan rero an um ve. Mt. thunthangtha sungih kan siarmi ah
Sabit hmuanih hna tuantu pawl thu kan thei. Zingpit ih sin, sunvu rori tuantu pawl le zanlam ih
tuantu pawl khal, an zaten bangrep in tuanman an ngah. Minung tisa lamih kan ruah ah cun
thildik lo le awmang lo zet a si. Tampi tuanin tampi ngah, malte tuan in malte ngah kan ti theu ih,
leipar thiltah dan, ruahdan a si. Tisa lamah cun kan tuanman ngah dingzat kan ngah a tul ih, kan
bangman khal laksawng phalh tlak kan si. Kan covo a si. Asinan kan bible ih in zirhduh mi sawn
cu Thlarau thu a si. Vancunguknak cu hibangtuk a si tiih thuthimnak ih in simmi a si sawn.
Curaungah vancunguknak thu kan ruat sawn dingih thlarau lamin zoh sawn u sih.
Sabithmuan cu Pathian uknak a siih, Hmuannei tu cu amah Pathian a si. Hmuansungih hna
tuan tu pawl cu, profet pawl, Judah mi pi le zumtu krifa kan zaten kan tel thluh. Biaknak lamih
hnatuan tu pawl cu tikcu can tampi pe ih sunvu hnatuantu pawl an si. Sentet lai ih sin tilpilnak
ngah ih Krifa simi pawl khal nunsung can reipi biaknak ah tuan rero tu an si ih sunvu tuan tu
thawn an bang aw. Tlai deuh le lehhnu ih tuantu pawl cu upat hnu ih krifa simi pawl an si ih vei
hnihkhat fang lawng biakinn thleng pawl khal a si ve. Mai ngah mi par ih lunghmui thei lo le
phunciar tlawkzai rero tu pawl cu sunvu, can reipi tuantu pawl a si. Biaknak lam kan zoh tik ah
khawm ringring theitu le kum reipi pawlpi kaihruai rero tu pawl hi phunzai le hngirteu kan tam
theu. Mi tampi, vei tampi ton a si. Khawm pelhdah lonai khawmdah lo hnak ih thintawi sawn,
Krifa sinak hmuah kumtamzet sithlang nai lungawinak le zumnak ah le thanglian thei lo mi kan
tampi so khaw.
Rualpi pawl ngahmi par ih iksik tu pawl, hmuannei tu pa hnenkhal ih lungkim thei lo pawl
cu zo ha an si? Ziangvek thinlung an nei si pei? Tuanmi zoh lo in Tuanman zohtu pawl an si.
Hlawhman zoh in maw Pathian hna kan tuan ding, thluasuah laksawng cuan in maw Pathian kan
zum ding. Pathian kan zum man le a hna kan tuan man laksawng, Pathian uknak cu kan ngahtho
ding e, a sinan vancungram ih mithmaisia ih me remrem kan tam ding ka zum. Hi tiih ka simnak
hi dotrine lamah kan ruat ciamco pangkei thlarau thazang ngahnak hrangih forhfial awknak
hrang ka pa lungtum ruahnak a si. Midang hnak in zonzai le bang deuh in ka tuan ti rero le ka
ngahmi a mal, midang hnakih tam ngahding ka si nan ti vek zoh fekfek hi zumnak le biaknak
hnatuan ah cun a ngah lo. Tongmawi a silo, thinlung ih ruah ding khal a si lo. Tuanman le
bangmang kan cuan a si ah cun Tuanmi kan hlo ter pang ding. Tuanman hnakih thupi sawn
tuanmi cu ziang a si?

Hmuan nei tupa cun zingpit in hlawhfa, hnatuantu a hawl, thlai deuh le sun le zanlam
tiangkhal ah hnatuan tuding a hawl rero thotho. Ziangruangah tile sabit hmuanih hnatuan ding a
thupi tuk ih, zamrang teih tuan a tul tinak a si. Tlunzik zawngih tuan pawl khal sunvu nihlawh zat
pek a siang. Phaisa cemmi hnak in, hnatuan theh ding a thupi sawn, a tul poimawhtuk tinak a
langter. Nuamnai ih tuan ding phun a si lo ih, zamrang thei patawp le tam thei zat ih tuan ding a
si ti thu a fiang. Tuancan a cut lai fangte ah a cuh ih cuh rori ih tuan a tul. Fangcang aah a cut
laifangah nihlawh pelhpawng men a ngah lo. A siat thluh ding. Sabit a dum, a cut laifang teah lawh
thluh a tul, kan lo lohli lo a si ah cun an tawt, an til thluh ding. Hmuannei tupa ih tumtahnak le
duhnak theih ah cun nazi pakhat sungte tuan hman ziangtluk in man a nei. Cumi hmu fiang, thei
fiang ding in Jesuh in in zirh. Pathian uknak, vancung uknak, Thuthangtha karhzainak le mission
hnatuan kan ti mi pawl hi, nuamnai le khulfung ih tuandingmi an si lo. Cakkhai hnatuan sokhaw a
si. Nawtaw rero le tlio rero ih tuan a tul tuk tihi hmuan neitu Pathin in a hmuih, a hna tuantu pawl
le zumtu a fa le pawl cun kan hmu ban lo. Kan theihsak lo. Kan ngaihven lo. A poi tuk!
Tuini siarmi Ezek 34:1-11 sungah cungnungbik Bawipa in, a maih hnatuan tupawl, biaknak
hruaitu tuukhal pawl cu a kawk siat neknek. “Tuuhlo khal nan hawl lo, tuunaa khal nan tuam
hlawm lo, nanmah le nan mah pumpuar in nan cawm awaw, sinfen mawizetzet in nan thuam
awaw” a rak ti. Thuthangtha sung khalah hmuanneitu pa in zingpit ihsi tuan pawl, sunvu tuan
pawl a kawk siat neknek thotho. “Netabik hnatuantu pawl parah nan nahsik a si lo maw, nan
hlawhman la ula tlung uh” a ti. Pathian kan zumnak le biaknak hna kan tuannak ah hin, Bawipa ih
kawknak, tong lo ding in, a duh lo zawng hrial u si. Bawipa ih mawhphurhnak tong lo ding in a
duh zawng in nung u si. Tuisun ih kan ruah khawmmi sung in Bawipaih a duh lo mi pawl cu
-- kum reipi biaknak hna ka tuan, pawlpi la tu kan si ti le ka suahpek tein tipil ka ngah, krifa ka si
tivek pawl ruangih hminthatnak le laksawng cuangce co duhnak,
-- biaknak hna tuannak ih ka baangtuk, ka har tuk, a rei tuk, tawk thlangseh tiih phunzainak,
-- biaknak hna tuan ruangih, mah le mai innsang sungkhat hlawknak, miatnak hawl rero,
-- Pathian hrang pumpe aw cing le khawm ringring ko nain phunzai ding hmu ringring
-- midang co mi thluasuah le talent zoh ih iksiknak neih,
-- mai ngahzat, co zat ih lungkim ti um lo, tawk ti thiam lo,
-- mai hna tuanpi le hnatuan petu Pathian mawhtluk, sual puh, ti pawl an si.
Bawipa ih duh mi cu;
--- tuan uh, tuan man cu a tawkzawn in ka lo pe ding timi par ih lungkim theimai ding,
--- sundir ni a sa tuk ti um lo, a nehhnu tuk zo ti um loin, kawh vetei pawhkam mai ding,
--- dinhmun, tohkham ah hmaisabik, netabik ti rero loin, tamdeuh, maldeuh tilo ten cozat, sizat te
ah lunghmui thiam ding pawl tla an si.
Himi pawl hnak ih thiltha sinsin, Bawipaih a duh bik mi cu: Tuanman hnak in Tuanmi a
thupi sawn ti theih fiang ding hi a si. Bawipa ih in pekmi lei thluasuah le van laksawng hnakin a
rianthiang hi thupi bik ah re thiam u si. Caakkhai hna a si, hmanhmawh le nawtaw rero in tuan u
si. Ziangkhal uimi nei lo, Fapa neihsun hman in pek siangtu Bawipa Pathian ih uknak hrang le
uknak sungah lungawi thatho ten tuan u si. Tuanman hnak in Tuanmi uar sawn tu sithei ding in le
hnatuan neitu kan Bawipa le a thutum hmu thiamtu si thei ding in fimnak, cahnak le tuansuak
theinak Thlarau Thianghlim in thluasuah in pe cio hram seh, Amen.