“Zumnak ṭhang sinsin, thluasuah tam sinsin”

“Zumnak ṭhang sinsin, thluasuah tam sinsin”

Feast of St. Nicholas (Bishop) 2019 December 6, (Friday)

RVA a ngai tu Bawi Khrih ah duhdawtmi u le nau pawl, nan zate hnen ah thinlung, thlarau le taksa damcahnak pawl Pathin in lo pe hai hram seh tiah thlacam saknak thawn a hmai sabik ah cibai ka lo buk hai. Tuni December 6, 2019 (Tlawngkai ninga) ni hi St. Nicholas ih puai ni a si ih St. Nicholas hmin a la tu pawl hrang ah a cuangce in thla kan cam sak cio pei tiah ka lo sawm duh. Mithianghlim Nicholas hi Bishop pakhat a si ih mifarah pawl bawm thei zet tu a si. Farahnak ruang ih khuaruahhar vangsang ih a um mi pawl a bawm ih an lung a awi ter ṭheu. Mithianghlim Nicholas puai ni kan tuah nak thawng in mifarah harsa mi pawl St. Nicholas ih thlacam sak nak in thinnuamnak, nunnuamnak hmu thei cio hram seh la kan nih khal in kan ti thei tawk in mifarah pawl lungawi ter thei tu, bawmtheitu kan sih theinak ding in zuam cio uh si. Tu ni ih kan siar ding mi cathianghlim pawl cu Is 29:17-24 tiang le Mt 9:27-31 tiang a si ih a tu ah thuthangṭha (Jesuh Khrih ih ṭongkam) ka siar ding ih kan ngai tlang ta hrih  pei tiah ka lo sawm duh.

Mt 9:27-31 

²⁷Jesuh cu cuih hmun ihsin a suak ih a feh rero laiah mitcaw pahnih in an dawi ih, “Maw David Fapa, in zaangfah hram aw,” tiah an au.

²⁸Jesuh cu inn sungah a lut ih mitcaw pahnih cu a hnenah an ra ih Jesuh cun, “Ka lo damter thei ding tiin nan zum maw? tiah a sut. “Asi, Bawipa, kan zum,” tiah an ti.

²⁹Cutikah Jesuh in an mit a tham ih, “Nan zumnak vekin cang seh,” a ti ih,

³⁰Khua an hmu thei sal. Jesuh cun an hnenah, “Hi thu hi zohman nan sim lo pei,” tiah fek zetin a tiam.

³¹Asinain an feh ih Jesuh ih thuhla cu cuih kiangkap khuazakipah an than.

(Bawipa ih thuthangṭha a si.)

Himi Jesuh Khrih ih mangbangza a tuah mi mitcaw pawl khua an hmu sal ding thu hi Bible hlun san in sim cia, than cia mi a si. Tuni Bible a vei khat kan siarnak sung ah khal kan hmu thei. Isaiah 29:18, cuih ni a thlen tikah hnaset pawl in cauk thangzet ih an siarmi kha an thei dingih caan reipi khawthim sungih a um zo mi mitcaw pawl in an mit an meng dingih khua an hmu thei ding. Profet pawl ih an sim, an than cia rero mi pawl Jesuh Khrih hnen ah a kim ṭheh asi. Jesuh Khrih ih mangbangza thilṭha a tuah mi tam pi lak sung ih sin tu ni kan siar mi Gospel sung ih mitcaw pawl a dam ter hai ih khua an hmu sal nak thu thawn pehpar in thlarau thazaang kan lak tlang ta hrih pei. Jesuh hnenah mitcaw pahnih in – “Maw David Fapa, in zaangfah hram aw,” tiah an au. Cutikah Jesuh in “Ka lo damter thei ding tiin nan zum maw?” tiah a sut. An nih khal in “Asi, Bawipa, kan zum,” an ti ve. Cutikah Jesuh in ziang a ti -  “Nan zumnak vekin cang seh,” a ti.  “Nan zumnak vekin cang seh.” Bawi Jesuh in kan hrang ah thluasuah in pek duh tik ah, kan hrang ah hna a ṭuan duh tikah, a mah hnen ah kan zum ding hi a duh asi. A mah kan rin san ding a duh, a mah in in bawm thei, a mah in a tuah thei ti kan zum ding a duh a si. Jesuh in a mah a ṭhan nak khua Nazareth ah a tlung tik ah a khua pi pawl in an zum lo, an rin san lo, an cohlang lo tik ah zaing a cang, mina malte a dam ter mi siar lo mangbangza zianghman a tuah lo. Jesuh a mah kan zumnak, kan rinsan nak a mal tik ah thluasuah khal a mal, kan ngah ding zat  in kan ngah lo. Jesuh in mangbangza in mi a dam ter tik ah “na zumnak in a lo dam ter zo” ti hi vei tam pi kan hmu ṭheu mi a si. Curuangah Pathian thluasuah tam sinsin a co tu kan si thei ding in Pathian a mah a zum sinsin tu, a mah a rin san sinsin theitu kan si theinak ding in ‘Bawipa kan zumnak ṭhangter aw’ tin thlacam phah in kan zuam cio pei. A ngai tu nan zate par ah Pathain in Zumnak thluasuah a thar in lo pe ha ihram seh. Tampi ka lungawi.

Rev. Fr. Peter Lal Zin Thang

Hakha Diocese