Advent Zarhkhat nak thuthang tha sim nak (sim tu Rev. Fr. Joseph)

Adventus Zarhpini a voikhatnak (Year B)

Thuthangtha sim tu Rev. Fr. Joseph Ro Nei Thang

November 29, 2020

Siarding: Isaiah 63:16-17 le 64:1, 3-8; 1Cor 1:3-9; Mark 13:33-37

          Bawi Khrih ah duhdawt zetmi nu le pa, u le nau pawl, “kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghlim ih pumkhat sinak cu nan zate thawn um hram seh” tiah cibai ka run lo buk hai. Tuihni cu Pathian biakthawinak kumthar puai asiih 2020, November thla ni 29, Adventus Zarhpini a voikhatnak asi. Tuihni ih kan siar dingmi Pathian ih ttongkam pawl cu Isaiah 63:16-17 le 64:1, 3-8 tiang; Second reading ahcun 1Cor 1:3-9 tiang; Tuthangttha ihsin cun Mark 13:33-37 tiang pawl tla ansi pei. 

          Adventus caan kan thok zo ih Adventus cu ziangso asi ti kha ruat cio uhsi. Adventus cu Latin ttong asiih “ratnak, thlengnak” tiah asullam a um asi. Bawipa a thlen ding kha hngahnak caan sunglawi cu Adventus caan tiah kan ko asi. Adventus caan cu tthen hnih in a um. Tthen hmaisa cu Adventus Zarhpi a voikhatnak ih a thok ih December thla ni 16 tiang a rei asi. Adventus caan tthen hnihnak cu December thla ni 17 ihsin a thok ih December thla ni 24 tiang a rei asi. Advent caan cu Messiah Bawipa a ratnak ding hrangih timtuahnak caan asi. Adventus caan sungah Zarhpi voili an um. Adventus Zarhpi a voikhatnak ahcun “Bawipa a vohhnihnak in a rat salnak thu” kan hmu. Adventus Zarhpi a voihnihnak ahhin “Bawipa ih rungtumnak hrangah lam lamsial a ttul zia” kan thei thei asi. Adventus Zarhpi a voithumnak cu “lungawinak Zarhpi asi” tiah Kohhran nih in serh sak asi. Adventus Zarhpi a voilinak cu “Emmnuel Bawipa cu kan hnenah a um zo asi timi Zarhpini” asi. Hi Adventus caan sungah tthit umnak pawl hi Sacrament in cu tuah thei asinain nupi tthitnak puai tuah ding cu Catholic Kohhran in kham asi. 

          Bawipa Jesuh Khrih a rungttumnak thu pawl ruat hrih uhsi. Hi leitlun ah Bawipa Jesuh a rungttumnak phunthum a um asi. A voikhatnak in Bawipa a rungtum lai ah mi hmuahhmuah ih hngakhlap zetmi asi. Asinain a voihnihnak in a rungttum sal tikah cun amah duhmi vekin a nungtu pawl hrangah kumkhua nunnuamnak laksawng pek dingah asi. A voikhatnak in a rungttum lai ah zohman in Bawipa cu an theilo, dai zirziar in a rungttum dah asi. Asinain a voihnihnak in a rungttum sal tikah cun Amah kha mi hmuahhmuah in an hmu lai ding. A voikhatnak in a rungttum lai ah Amah cu caw rawl einak kuang sungah puan nem te thawn an tuamih an thlim asi. Asinain a voihnihnak in a rungttum sal tikah cun a tleu zetmi sunlawinak puan thawn a rungttum lai ding asi. A voikhatnak in a rungttum lai ah Bawipa cu ningzakza thinglamtah an phurter ih miburpi nih an thlun. Asinain a voihnih in a rungttum sal tikah cun Bawipa cu vancungmi burpi in an tlun dingih sunlawinak thawn a rungttum ding, cun a kut uknak fung a keng ding asi. A voikhatnak in a rungttum lai ah mipi in Bawipa cu “Pathian ih hmin in a ratu cu thluasuah vanluhnak um hram seh” tiah an au ih a voihnihnak in a rungttum sal tikah cun a thu a thlun suaktu pawl le vancungmi pawl thawn Bawipa cu an hmuak dingih biak phahin “Pathian ih hmin in a ratu cu thluasuah vanluhnak um sehlaw” tiah an thangtthat lai ding asi. A voikhat in Bawipa a rungttum lai ah mipi in “thinglamtah parah that aw” tiah thu an tthen dah asi. Asinain a voihnihnak in Bawipa a rungttum sal tikah cun amah Bawipa sawn in mi hmuahhmuah kha an tuahmi vekin thu a tthen lai ding asi. A voikhatnak in Bawipa a rungttum lai ah mi hmuahhmuah cu duhdawtnak nei dingah le Amah lamah ttang cio dingin thu a zirh dahih a voihnihnak in a rungttum sal tikah cun duh khalah siseh, duhlo khalah siseh mi hmuahhmuah cu amahih kut tangah kan thleng thluh lai ding asi. 

          U le nau pawl, a voikhatnak le a voihnihnak kar lakah a voithumnak Bawipa rungttumnak cu a um asi. Cumi kan hnenah nitin tein a rungttum ringring ttheu asi. Bawipa ih thi le sa kan in kan ei tikah siseh, Puithiam pawlin Sacrament an tuahnak ah siseh, Amah Bawipa ih hmin thawn mi pahnih pathum kom in thla kan cam tikah siseh, A ttongkam asimi Bible kan siar tikah siseh, duhdawtnak hna kan ttuan tikah siseh, duhdawtnak famkim zetin kan nei tikah siseh, Bawipa cu kan hnenah a voithumnak dinhmun in a rungttum asi. Ziangtik poh ah a ttum khalah kannih cu Bawipa hrangah ready in kan um ttul ringring asi. Tuihni kan siarmi Bible a voihnihnak 1Corin 1:8 “a net tiangin amah in a lo kilkhawi hai dingih cuti cun kan Bawipa Jesuh Khrih ih ni ah mawh neilo nan si ding” tiah in forh asi. Curuangah Bawipa a rungttum ding kan hngak rero lai ah kan thinlung cu puar thaunak thawn a khatih tlang vekin a sang lai asi ahcun tangdornak thawn tthum ttheh ding kan si asi. Kan thinlung cu duhdawtnak neilo lamzin kuar vekin a kuar lai a si ahcun tuih caan ah duhdawtnak, zaangfah thinpemnak, zawnruahnak le thinlung tthatnak thawn silh ttheh uhsi. Kan thinlung cu a kel kawi in a kawi rero lai asi ahcun dingnak le felnak, zuamnak le dainak thawn rem thluh uhsi. 

          Tuihni kan siarmi thuthang ttha sungah Bawipa a rat sal ding tikcu caan kan thei theilo ruangah tim tuah cia in um ding kan si tiah Jesuh Khrih nih in zirh asi. Bawipa cu zing ah maw, sun ah maw, zanlam ah maw, khawmthim hnu zanpi ah maw, zanttim ah maw a ra ding? Zohman in kan thei theilo caan a rak si. Rukru fifir bangin a ra ding asi. 

          Nitin kan nunnak ah kan thi cucaan zohman in kan theilo. Curuangah kan nun sungah fel ringring kan ttul asi ti duhnak asi. Sualnak ihsin luatmi rak si ringring hram uhsi. Nu ih pum sung ihsin kan suah lai ah sual hrampi thawn kan suak dah asi. Ka thi tik ahcun sualnak thawn thi ding kan si hrimhrim lo asi. Nu pum sung ihsin kan suah lai ah mifarah kan tam ngaingai ding ka zum. Kant hi tikah cun kan thlarau hi farah ter hrimhrim hlah uhsi. 

          Hi kan khawmnak ah azatein a thiamtu Pathian, Pa le Fapa le Thlarau Thianghlim in kan zatein thluasuah in toih hram seh. Amen.