Antam ci tia zumnak

Antam ci tia zumnak nan neih ahcun himi tlang hi thawn aw na ti le a thawn aw ding

Sermon for Tuesday of XXX week of Ordinary Time, Year I (Oct. 29, 2019)

 

Siarding: Rom 8:18-25; Ps. 126:1-6; Lk. 13:18-21.

 

Tuisun kan siarmi Thuthangtha ahcun Pathian uknak cu Antam ci in siseh, thilnu in siseh tahthimnak a pek. Ziangruangah Antam ci le thilnu kherkher ti ah ruah ding a um.

Himi tahthimnak theithiam dingah himi Bible ngannak hmun Palestine ram ih antam um tudan kan theih hmai sa a si le a fiang deuh ding. Palestine ram ahcun Antam ci hi rawl ci lak ih a fatebik ih ruahmi a si. Antam ci cu an vawn vawrh ih a hawng to, a hawng kho ih a hawng upat tik ahcun pi kua tluk tiang a sang thei, a um theimi thlaikung a si ruangah cui antam kung parah vate in bu an sak thei.

Daniel 4:9-22 ahcun Nebukhadnezzar ih mang cu Daniel ih a lehsak ih a sullam a simnakah "a thangmi thing kung, ramsa phunkim ih beunak thing kung" timi kan hmu. Cun Psalm 104:12 khalah "Cui tidai kiang ahcun van vate in umnak an nei dingih, thingtek lakah hla an sak ding" ti in kan hmu. Tuisun kan siar mi Thuthangtha thawi kan zoh kop a si le a fiang vivo ih "Pathian ih uknak cu mi hmuahhmuah hrangah a si ti a lang." 

2005 kum ah Joseph Cardinal Ratzinger cu Pope siding ih hril a si laiah Pope Benedict XVI dinhmun ih hmaisabik thu a simnak ah "Tlam a tling lo mi thilri thawn khal in Pathian cu hna a tuan thei ti ka theihnak in ka hna ii ngamter ih ka hnem aw" ti ah a rak ti. Pathian ih hnatuannak hi a famkim ciami in a thok lemlo.

Kan Lairam hi tuihlan kum zakhat hrawng ahcun a nung Pathian an rak thei lo ih khuavang an rak bia. Asinan tu ahcun zumtu pawl ih ram - Christian ram - ti hman in kan rawn ko thlang. Cui kum zakhat sungih thleng awknak cu vuk le vek ti-in a ra cangsuak lo. Thuthangtha phurtu ih ke karkhat le aw kamkhat in hram a thok.

"Antam ci tia zumnak nan neih ahcun himi tlang hi thawn aw na ti le a thawn aw ding" tiah Bawipa Jesu in a dungthluntu pawl a rak ti (Mt. 17:20; Lk. 17:6) vek in Pathian ih in telpi a si ahcun a fate bik hmanin thil ropibik a thlenter thei a si.

Cun ka leilungtlun pursum leilawnnak lam kan zoh a si le Leilungtlun milianbik ti ih ruahmi Bill Gate hman kha thuthangca leinak remcang a rak neih lo thu kan thei. Kan Asia ih milian pawl khal sumpai hmanding dollar zakhat - tui kawlram sumthleng in tingkhat le hrek - hman rak nei lo an tampi tikhal theih a si, online khalah siar theih a si. Ropitnak le hlawhtlinnak timi hi a tum a sen thawn a deng aw cekci lo theu.

Kanmah in rundamtu Bawipa Jesu khal a san lai ih biaknak lam ih khualipi Jerusalem ah a rak suak lo, Ramkhel lam ih khualipi Rome ah a rak suak lo. Zo hman ih ruahbanlo Bethlehem khuate ah a rak suak (Mt. 1:18 - 2:12; Lk. 2:1-14).

Voi tampi cu "kha vek men", san tlai lo, ti ih kan ruah mi khi thil ropi ih hramthok a rak si theu. Vancung ram khal cu Pathian thu kan simnak tong kamkhat te in hram a thok ih midang thinlung sung ih a hawng to ngaingai tik ahcun a zar to tu a tam aw tuk.

Rundamnak thu phuang dingih dungthluntu pawl a rak hril laiah Bawipa Jesuh in mifim mithiam pawl a ti cuanglo, mi zaaraan pawl, ngakai ih pumcawm aw tu pawl, siahkhongtu, phunhnamtantu ti vek a rak hril (Lk 6:12-16; Mt. 10: 1-4; MK. 3:13-19). Anmai fimthiamnak le hlawhtlinnak ruangah si loin Pathian ih zaangfahnak ruangah hril an si sawn (1Cor 1:26-29) ti kan hmu. Mifim mi thiam le ni langsar an si lo. Asinan, cupawl hmang in rundamnak thuthangtha - vancungram thu - phuan a si tikah zumtu an karhzai vio ti kan thei, tu ih kan mah tiang hi kan rawng si vivo. Bawipa ih thil tuah mi hi a maksak ngaingai (Ps 126).

 

Thil nu hi zu tuahnak ih hman theumi a si. Kan Bible sung kan zoh a si le thilnu hi ralrin peknak ah a hmang in kan hmu.

Mt. 16:6, 11-12 ah "Farasi le Saddusi pawl ih thilnu kha va ralring uh: a ti.

Mk 8:15 khalah "Farasi pawlih thilnu le Herod ih thilnu lakah va ralring uh" a ti thotho.

Cun Lk 12:1 "Hrokhrawlnak a simi Frasi pawl ih thilnu lakah va fimkhur uh" a ti.

1Cor 5:6-8 le Gal 5:9 "thilnu malte in sanghlom cu a pumpuluk in a thoter" a ti. Simduhmi cu kan Bible in thilnu hi a thazawng in a hmang lem lo.

Asinan tuisun kan siarmi Lk 13:21 le Mt. 13:33, 16: 12; ahcun thilnu hi Pathian ih uknak kan theihthiamnak dingah a tha zawng ih tahthinak ah a hmang.

Himi thilnu ih thil ti thei daan langter dingah "Sangvut tahthum" thawi a rawi thu a rel cih. Sangvut tahthum ti cu ziang ti tluk a si ding. Himi san lai ih an rak hman mi dinhmun ahcun "Tahkhat" ah minung zakhat tluk in an khop ti a si ruangah "Tahthum" cu minung zathum tluk ih ei khop ding din hmun a si. Kan Bawipa ih thuthim pekmi ah minung paziat in an ei thluh thei ding timi hnak in thilnu ih hnatuan thei dan a langter duh sawn a si.

Khatlam zawng ih kan zoh a si le nang le kei hi himi thilnu vek si dingah in sawm. Midang kha a "tho" tertu thilnu, a thlengawtertu thilnu, si dingah in sawm. Kan umnak leilungpi le a sungih um minung pawl hi thuthangtha thawi khatter ding in, "thilnu" ih cang dingah in fial, tuanvo in pe.

Minung pawl ih rundamnak dingah antam ci tiate a va si khal le na ti theitawk in hram thok aw. Thilnu in sangvut a thoter bangin, na sinak - Christian na sinak - in leilungpi hi ciahneh vivo hram seh.

 

Add new comment

2 + 14 =