April 25, Pasca tikcu caan ih zarhli nak, zarhpi ni ih Cardinal Charles ih thuthangtha

April 25, Pasca tikcu caan ih zarhli nak, zarhpi ni ih Cardinal Charles ih thuthangtha

April 25, 2021

Tuukhaltha zarhpi ni

            "Mi nunnem mi tuukhaltha, ka tuu pawl cu ruahsannak, remdai mi rampi, rawl um nak ah hruai hram aw. Khrih ah duhdawt zet mi ulenau pawl, tuukhaltha Bawi Jesuh in pumcawmnak le nunnak hrangih a zuam rero tu, kan mah mipi pawl in kilhim hram seh. Pasca puai ih zarhlinak zarhpini, tuukhaltha zarhpi ni ti khal ih mi theih mi ni cu Pope Francis in "leitlun huap ih kawh nak ni" tiin khal a ko. Pathian in aw theih ding, a dungthlun dingah kan thinlung sangka a king rero. Tui Kawlram ih dinhmun pawl cu a kawlawng rero thlang. Pathian ih a cem thei dahlo mi a duhdawt nak lawng in ziang tinkim a reh ter thei.

Ram sung ih nunnak le tleu nak

            Pathian hnen ih thlacam a tul. Jesuh Khrih in a hlo mi tuu a hawl, a lainat. "Bawipa cu khal tu a si. Sam mi zianghman ka nei lo" tiin Saam ngan tu thawn ram pumpuluk in tep thei dingah thlacam uh si. Tuini ih siar mi Bible catlang pathum in in hnem a si. Bible veikhat siarnak, Tirhthlah sungah Petru in Bawipai hmin in kut ke kim lomi, taksa lam lawng silo in thinlung lam khal a rak dam ter. Hi thawm huham thawn a khat mi Bawi lawng in kan ram ih remdaih lo nak, zangfah nak um lonak, harsat dinhmun ih luat thei dingah thlacam a tul. Bawi Jesuh a mah rori hrem nak a rak tuar ih thinglamta parah thah a rak tuar. Hi thih nak parah thlan kua on puai tuah a si vekin Kawlram khal minung vek in le remdaihnak timi thawhsal nak huham in pe dingah thlaza ka cam.

            Saam 23 ah tuukhaltha rinsan dingin in sawm rero. Bawipa cu i khaltu a si. Sammi ziang hman ka nei lo. Tlim no lakah i bawh ter ih, a thiang mi tiva kam ah i hruai. Ka thazang a tlun ter sal ih, i tiam cia vekin lamzin dingah i hruai. A thim mi thih nak horkuam sung zawh hman ningla, Maw Bawipa ka tih lo ding. Ziangahtile nang cu ka hnenah na um, na talhtum le na kianghrol in ka hna i ngam ter.

            Bible veihnih siarnak ah thazang in pe bet. Mithianghlim John in kohhran pi pawl hnenih a sim mi cu misual pawl in an lo hrem ding, an lo that ding ih nan riah an lo sia ter ding. Asinanin thanau hlah uh. Pathian cu thanau mi hum tu nei lo pawl lam ah a tang. Tang uh. Pathian ih tik cu caan a kim tikah ziangvek thu neih nak hman in Pathian cu a kham thei lo ding. Tui ni ih thuthangtha sungah Bawi Jesuh in amah le amah tuukhaltha vekin le nu pakhat in a fa a lem ih a mitthli a hnulhul sak vekin Pathian khal in a miphun ih riahsiat nak pawl a thei ih a dam ter nak a lang ter. Hi Bible catlang zoh sal asile Khrih Jesuh in a suah pek ihsin a mitcaw mi pakhat khua tleu nak a pek tikah mi ti aw ter pawl le mi thuneih nak a mal pang ding tiih a ruat tu pawl in Jesuh Khrih cu an mawhthluk. Kum 2000 hrawng Jesuh Khrih san lai ihsin thil tha tuah tu pawl cohlang lo in an mawhthluk, tuisan tiang an hrem rero lai.

            Tuukhal tha Jesuh cu zangfah nak le lainatnak pawl thawn mi thinlung ah a um. Tlunlam ih namneh mi vek a silo. Hotu tha tinkim cu tuukhaltha an si. A ruah nak vekin tuu a that lo, a nunnak hman hman a tuu hrang ah a pek. Jesuh Khrih ih hoha nak cu duhdawt nak parah a bun aw. Farasi le Jew miphun hotu pawl cun depde nak parah an thuneih nak a hram an bun. Hi pawl cu hruaitu deu pawl an si.

            Mai tuurun cu an hmin in a thei ih a duhdawt tu tuukhal tu thawn a kaih mi tuukhal tu hnatuan tu pawl thawn an dang aw zet. Tuukhaltha cun tuurual khalh hi hnatuan pakhat tiin an hmu lo. Mai nunram ih thuanthu pe tu vekin a cohlang ih a duh fawn. A mai power khal duhdawt ank a si. Thuneih nak a thih nak a hmuh duh tu hotu pawl thawn a dang aw nasa.

            Hi Zarhpi ni ih ruah ding mi cu vocation ti mi kawhnak a si. Kawhnak (a si lo le) nunram daan pali, phunli a um.

1. Innsang nunram: Hmaisabik ah mipa le nunau a si mi Adam le Eve pawl cu Pathian ih a rak sersiam ih nunnak thar ah cang ter in an nunnak kilhim in, cawm dingah a rak sersiam.
2. Pathian thuruahnak nunram: Jesuh le Maria pawl in kum 30 tiang an rak thlun mi a si. Pawlpi sungah Cathusian, Camelitte le Benadette kaing vek in thinlung remdai ten Pathain thu ruat in milai nunram thatnak a pek tu nunram a si.
3. Leitlun thawn a nungtu: Pathian hnatuantu Sisters pawl le Puithiam kaing pawl ih nunram ih thlun mi a si.
4. Leitlun ah hin mi depde pawl vek in milai nunram ah hnatuan rero n acing in Pathian ih ram hrangah thukam a lak tu nunram tiin kawh daan a phunphun a um.

Kan Kawlram ah hi kawhnak a phunphun thawn khawsa in kawhnak a ngah tu pawl hrangah Pathian hnenah lungawi thu sim uh si. Kawhnak cu kawhnak a ngah tu ih thiam nak ruangah a si lo. Pathian ih thluasuah thawn a suak mi a si.

            Hlanlai kum reipi pawl ah ramdang (Europe ram pawl) ih Pathian hnatuantu pawl cu zuamnak thawn Kawlram ah Pathian rian an rak tuah. Tu ah cun Kawlram mi pawl sungin mi hrekkhat ramdang  ih Pathian hna an tuan hi zohthim tlak zet a si.

            Innsungsang tinkim in Pathian an zum ih mai fa le pawl sungin kawhnak a ngah tut ha pek a si le Pathian ih thluasuah a lethra in ngah a si ding.

            Kawhnak thawn pehpar in Pope Francis in Mithianghlim Joseph cu zohthimtlak ah a ret. Mithianghlim Joseph ih nunram ah (tumtahnak, hniksaknak, duhdawtnak) hi mi pathum hmuh a theih.

1. Tumtahmi neihnak le a tak tak ih phorksuak thiam nak: St. Joseph ih nunram ah Pathian in a tumtah mi thawn lam a rak hruai. Tumtah mi tinkim le sa duh thah mi hi thil ol zet mi a si lo. Hniksaknak thawn a kom aw. Dungsiip hlah uh si.
2. Hniksaknak: Kawhnak hi hniksaknak a si ko. St. Joseph in naute Jesuh le Bawinu cu Herod Siangpahrang kut sungin an tlan tinten ramdang ah pumcawmnak a hawl. Herod Siangpahrang in a mah a hnaihnok ding tiih a ruah mi naute a hawl ih a rak thah tu mi that tu ah leitlunhuap thuanthu ah thuthang a rak suak. Tui san ih santhar mino pawl in an hmuhton mi hniksaknak pawl an pahsuak thei ko ding.
3. Duhdawtnak: Kawhnak tinkim cu midang duhdawt ding le duhdawtnak co dingah a si. St. Joseph in Bawi Jesuh le Bawinu cu duhdawtnak thawn a rak kilhim ih an duhdawtnak khal a rak ngah. Kawhnak tinkim cu minung vek si dingih kawhnak a si. Riahsia za cu mi hrekkhat ih thinlung sungah huatnak ih a uk. At nak in a khat Hmuh theih lo, thei thei lo in a tha lo mi ti daan an thlun rero hi riahsia za a si.  

            Pope tel in Biaknak lam ih a zuam tu tinkim in khuk an bil. Khukbil in an biak. Thla an cam. Kan duhdawt zet mi kawl ram pi khal khuk a bil rero. Riahsiat caan le khua thim caan pawl ah khuk kan bil theu. Tuukhaltha in a nuam zet mi nunram thar ah in hruai hram seh.

            Kawlram ih ummi pakhat ciar hrangah minung vekin kawhnak nunram ngah thei dignah thlaza ka cam. Mi liam pawl, thunei tu pawl le mi zate parah lainat ank khat hram seh. Milai khat le khat lainat nak hmuh aw hram hai seh.

            Pum cawm nak, tihnung za ih luat nak le hniksak nak a phunphun karlak in a cangvai tu Kawlram innsungsang tinkim cu Tuukhaltha in remdaih nak thlasuah pe hram seh. Mi duhdawt nak thawn a khat mi tumtah mi pawl tlam tling hram seh. Himi thuthang cu RVA Myanmar thuthang ihsin kan don mi a si.