Baptism of the Lord Puai ni (Rev. Fr Joseph Ro Nei Thang) January 10, 2021

“Pathian ih fate ah kan cang zo”

Thuthangtha sim tu Rev. Fr. Joseph Ro Nei Thang

Baptism of the Lord Puai ni (Year B), January 10, 2021.

Siarding: Isaiah 55:1-11; Ps/Isaiah 12:2-3, 4, 5-6; 1John 5:1-9; Mark 1:7-11.

          Bawi Khrih ah duhdawt zetmi nu le pa, u le nau pawl, “kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghlim ih pumkhat sinak pawl cu nan zate thawn um hram seh” tiah hmaisabik ah cibai ka run lo buk hai. Tuihni cu 2021, January thla 10, Zarhpini asi. Tuihni cu Bawipa Jesuh Khrih ih tikholhnak a ngahni puai tla kan tuahnak thawngin caan menmen (asilole) caankel Zarhpini voikhatnak ah kan thleng zo asi. Tuihni ih kan siar dingmi Pathian ih ttongkam pawl cu Isaiah 55:1-11; Ps/Isaiah 12:2-3, 4, 5-6; Saam a sawn:- Nannih in lungawinak thawn rundamnak tikhur ihsin tidai nan khai ding asi tiah asi pei. Cun 1John 5:1-9; Thuthang ttha ahcun Mark 1:7-11 tiang pawl tla an si pei. Tuihni ih kan ruah khawm dingmi “Pathian ih fate ah kan cang zo” tiah a si pei. 

          Tuihni ah Bawipa Jesuh ih tikholhnak a ngahnak puai cu Catholic Kohhran in kan tuahnak thawngin Christmas tikcu caan cu kan ttheh zo ih a tuih ahcun tikcu caan menmen lole caankeel ah kan rak thleng sal thlang asi. Tuihni kan siarmi Thuthang ttha Mk 1:9-11 hi siar sal uhsi. Cuih hnu reilo te ah Galilee peng Nazareth khua ihsin Jesuh cu Jordan tiva ah John kut ihsin tipilnak lak dingah a va feh asi. Jesuh cu ti sung ihsin a hung suah ve tein van cu a ong ih Thlarau cu tthuro bangin a parah a rung fut asi. Van ihsin aw pakhat a rung thangih “Nangmah cu ka duhdawt bikmi ka fapa na si. Na parah ka lung a kim ngaingai” tiah a run ti tiah asi.

          Bawi Khrih ah u le nau pawl, Bawipa Jesuh in John ih kut ihsin tikholhnak nak a lak tikah a sualnak pawl thlah saknak hrangah ti hi a si cuanglo, ziangahtile Bawipa Jesuh in sual hrampi siseh, a tuahmi sualnak siseh a neilo lawlaw. Sihmansehla Bawipa Jesuh in tikholhnak a lak asi. Kan thei a ttul zetmi cu Jordan tiva ruangah Bawipa Jesuh cu sualnak ihsin a thianghlim tiah silo in Bawipa Jesuh in Jordan tiva a dai ngah, a tham ngahnak thawngin a cuih tiva sawn kha a thianghlim cih hi asi. Jordan tiva cu leitlun ih ti hmuahhmuah ai-awhtu asi. Bawi Jesuh in tipilnak a ngahih ti sung ihsin a hung suah ve tein van cu a ong ih Thlarau cu tthuro bangin a parah a rung fut asi.

          Pathian thu a ngaitu u le nau pawl “Thlarau Thianghlim cu tthuro bangin” timi hi ruat tlang uhsi. Thlarau Thianghlim ih laksawng cu phun 7 a um ih cumi pawl cu tthuro ih umtu daan ziaza thawn St Thomas Aquinas in a tahtthim ih a Summa Theologica ah a ngan asi. Kan zoh tlang pei uh. Kan thei ttul zetmi cu kan hnenih tthuro pawl le St Thomas Aquinas te hnenih tthuro pawl hi an si daan a bang aw lomi tla a um phahphah ding ti hi ruat cia kan ttul.

          1> Tthuro pawl cu a luang rero mi tiva kapah an um tam ttheu, ziangahtile vate dehthat theitu mu pawlih ral ihsin luatnak an ngah theinak dingah asi. Cumi cu Thlarau Thianghlim ih laksawng lakih FIMNAK (wisdom) hi asi. Thlarau Thianghlim ih zirhmi vekin a nung cangtu mithianghlim pawl cu khuasia ih sualforhnak ihsin an luat theinak dingah fimkhurnak thawn an nung cang thei asi tiah asi.

          2> Tthuro pawlin rawl an hawl tikah ei ding ttha rawl tampi lak ihsin an duhmi rawl ttha lawng kha an hril ttheu asi tiah asi. Cumi cu Thlarau Thianghlim ih laksawng lakih THU THEINAK (knowledge) hi asi. Thlarau Thianghlim ih laksawng thu theinak thawn a khahmi mithianghlim pawlin Kohhran ih a tthami zirhnak pawl lawng hi an sarih an thlarau rawlah canter asi tiah asi.

          3> Tthuro pawlin vate dang pawlih fano pawl tla rawlcawm a bawm ttheu asi tiah asi. Cumi cu Thlarau Thianghlim ih laksawng lakih KHUARUAH THIAMNAK (counsel) hi asi. Thlarau Thianghlim ih laksawng khuahruah thiamnak thawn a khahmi mithianghlim pawlin an thuzirhnak thawn siseh, midang hrangih thlacam an cemnak le nuncan ziaza ttha an hmuhnak thawn siseh, midang pawl hrangih thlarau rawl an cawm bawm asi.

          4> Tthuro pawlin an hmur thawn thil an thlek dahlo tiah asi. Cumi cu Thlarau Thianghlim ih lakawng lakih THEI THIAMNAK (understanding) hi asi. Thlarau Thianghlim ih laksawng thei thiamnak thawn a khahmi mithianghlim pawlin Kohhran ih zirhmi pawl hi an thlek dahlo asi. Cuhnakin cumi pawl hi an kilkhawi sawn hi asi.

          5> Cun tthuro pawlin hnit-kha an neilo tiah asi. Cumi cu Thlarau Thianghlim ih laksawng lakih BIAKNAK LAMAH ZUAMNAK (piety) hi asi. Thlarau Thianghlim ih laksawng biaknak lakah zuamnak thawn a khahmi mithianghlim pawlin thinhengnak le huatnak an neilo tiah asi.

          6> Tthuro pawlin buu an sak tikah a fek zetmi lungkua kar lakah an sak ttheu tiah asi. Kan laitlang ih tthuro thawn an bang awlo men thei. Cumi cu Thlarau Thianghlim ih laksawng LUNGFEKNAK (fortitude) hi asi. Thlarau Thianghlim ih laksawng lungfeknak thawn a khahmi mithianghlim pawlin Bawipa ah beunak an hawl. Bawipa Jesuh Khrih cu an beunak lungpi asiih a hliam hma sungah ruahsannak thawn an beu asi.

          7> Netabik ahcun tthuro pawlin ninghan riahsiatza awte thawn an khuang ttheu asi. Cumi cu Thlarau Thianghlim ih laksawng lakih BAWIPA TTIHZAHNAK (the fear of the Lord) hi asi. Thlarau Thianghlim ih laksawng Bawipa ttihzahnak thawn a khahmi mithianghlim pawlin sualnak pawl hrangah ninghan riahsiatnak thinlung an nei, an sualnak an fih sinih an sir aw sal, mah ih sualnak hrang le midang ih sualnak pawl hrangah sual cawhkuan an liam sak ttheu asi. Pathian thawn rualremnak an tuahsal ttheu asi. 

          Cumi Thlarau Thianghlim ih laksawng phun 7 cu Bawipa Jesuh ih parah a rungttum asi. Cun van ihsin aw pakhat a rung thangih “Nangmah cu ka duhdawt bikmi ka fapa na si. Na parah ka lung a kim ngaingai” tiah a run ti tiah asi. Tikholhnak kan ngahnak thawngin kan sualnak hmuahhmuah cu in tlengfai thluh ih mithianghlim ah kan cang, Pathian ih fa le ah kan cang zo. Pa Pathian in tla kanmah pakhat fingfing cu “Nangmah cu ka duhdawtmi ka fa na si. Na parah ka lung a kim ngaingai” tiah in ti ve asi. Kan parah tla Thlarau Thianghlim ih laksawng phun 7 cu in toih ve ih Pathian lungawitertu si dingah siamtharmi Pathian ih fate ah kan cang zo asi. Curuangah tikholhnak sacrament kan ngahlai ih kan tuahmi thukamnak pawl hi mang ringring uhsi.

          Pathian siseh, Bawi Jesuh siseh, Thiang Thlarau siseh, Catholic Kohhran ih zirhmi hmuahhmuah siseh ka zum kan ti ih satan siseh, satan ih hnattuannak le bumnak hmuahhmuah ka hlon asi tiah kan thukamnak pawl hi mang ringring kan ttul asi ti kha tuihni Jesuh Khrih ih tikholhnak a ngahnak puaini ah ka lo sim duh sal. Kan ngahmi tikholhnak sacrament hi vun ruat sal uhsi. Tikholhnak sacrament kan ngah ruangah kan ngahmi tthathnemnak pawl cu kan tuahmi sualnak zate le sual hrampi ihsin thlahnak in ngahter; Hrin tharnak ih zaangfahnak veel le tthatnak thluasuah in pek; Pathian ih fa le ah in cawisang; Khrih thawn siseh a Kohhran thawn siseh pumkhat taktak in pehtlaihnak in nei ter; A phiat theilomi taceih in khenih kumkhua nunnak ngah theinak khuan in pek; cumi pawl tla ansi. Cumi pawl thawn Pathian ih fale ah kan cang asi. 

          Tikholhnak sacrament thawn Pathian ih fale ah a cang zo nan zate parah Pa le Fapa le Thlarau Thianghlim in thluasuah lo pe hram sehla Pathian ih fa le ah in hmunter ringring hram seh. Amen.