Bawi Jesuh ih Zirhmi Lawng (sim tu Rev. Fr. Peter Zin) November 13, 2020

“Bawi Jesuh ih Zirhmi Lawng”

Thuthangtha sim tu Rev. Fr. Peter Zin

November 13, 2020.

Siarding: 2 John 1:4-9; Saam 119: 1-2, 10-12, 17-18; Luka 17:26-37.

          Kan thuthangṭha simmi, kan zirh awk mi pawl hmuahhmuah hi kan Bawipa Jesuh Khrih ih in zirh mi thawn a kaih awk a ṭul ringring asi. Duhdawtmi nu le pa, u le nau pawl, nan dam cio maw? Pathian pekmi thluasuah: harhdamnak, lungawinak le daihnak pawl cu nan zate hnenah um ringring hram seh. Tuni November 13, 2020 (Tlawngkai ninga) ni ih kan siar dingmi Bible pawl thawn pehpar in ‘Bawi Jesuh ih Zirhmi lawng’ timi thulu thawn thlarau thazang kan lak tlang ding in ka lo sawm duah. Kan siar dingmi Bible pawl cu a veikhat siarnak ah 2 John 1:4-9 tiang, Saam 119: 1-2, 10-12, 17-18 le Gospel kan siar dingmi cu Luka 17:26-37 tiang pawl an si. Gospel kan siar mi sungah Bawi Jesuh in netabik caan ah Noah san lai vek le Lot san lai vek a si nak ding thu a sim ih himi thawn pehpar in veikhat ka sim dah zo ruang ah tuni ah  cu veikhatnak kan siar mi thawn pehpar in sim ka duh tikha hmai sa ah sim ta ka duh.

          Bawi Jesuh minung cannak a lak ih a mah ih lam hruainak, a mah ih thuzirhnak thawng in Christian kan timi zumtu pawl kan um thok ih a tu kum 2000 lai a si thlang. Leitlun ah zumtu pawl, Christian pawl an umnak asilole kan umnak kan ti pei ih, a rei vivo thlang a si vek in Jesuh Khrih a zum tu khal kan tam vivo. Jesuh Khrih a zumtu pawl kan tam vivo vek in kan feh daan tete siseh, kan zirh aw daan tete siseh a dang aw nak khal a um vivo, a tam vivo ve a si. Christian pawl kan titik ah a thei lo tu hrangah cu Christian a si mi kan zaten kan bang aw ṭheh in a hmutu khal an um. Asinan a thei tu kan nih hrangah cu kan zirh aw daan le kan feh daan a bang aw lo mi tampi a um ti cu a fiang zet mi a si ko. Himi kan zumnak a bang aw lo nak cu kan suahnak in sungsang, kan umnak hmun thawn khal pehparnak tampi a um ih a hram thok ah cu kan ruahnak a bang lo ruang ah khal a si. Hitivek in kan thu zirhmi a bang aw lo nak a um tik ah kan zoh sal ding ah a thupi zet tin ka hmu mi cu kan zumnak ih a hram thoknak lam kha kan zoh sal a ṭul tin ka hmu. A hmai sabik ah kan thuzirh mi hi kan Bawipa ih in zirhmi thawn a kaih aw aw maw? cun kan hlan ih a um dah mi zumtu kan pupa pawl ih zumnak thawn teh kan zumnak hi a kaih aw aw maw? tivek pawl kan zoh a ṭul ṭheu ding a si.

          Kan hlan ih a um dah mi zumtu kan pupa pawl ih zumnak kan titik ah a dang silo in kan Bawipa ih in zirh mi vek in an zum ih an zirh asi. Bible thar kan zoh tik ah a tam sawn cu St. Paul ih ngan mi pawl an si. St. Paul ih ngan mi, zirh mi pawl khal cu a hrampi kan zoh a si le Bawi Jesuh hnen ih sin a ra mi pawl asilole Thiang Thlarau ih hnaṭuan nak in a ra mi pawl an si. Tuni ih a veikhat kan siarnak sung ah St. Paul in a sim mi cu, ‘ka duh dawtmi le upatmi Nu, pakhat le pakhat duhdaw aw uh si tiah ka lo dil. Hitiih ka nganmi hi thukham thar a si lo; a hramthok ihsin kan rak theihmi thukham a si,’ a ti. St. Paul in a thu zirhnak hi a thar a silo ih kan Bawipa Jesuh ih in rak cah cia dah mi pakhat le pakhat duhdaw aw uh timi kha a sim bet, a zirh bet mi a si. Thuthangṭha kan sim tikah kan zirh aw tikah a thar timi hi a um thei lo. Kan Bawipa ih iin zirh cia mi kha kan sim sal mi a si ih kan sim daan kan ṭongfang pawl lawng te a dang aw thei mi a si ih a hram pi cu kan Bawipa ih in zirh mi, Bible ih in zirh mi a si tengteng a ṭul a si. Bible ih in zirh mi kan ti tik khal ah Bible sung ih a um mi cafang vek ciahcaih ti si lo in Bible thawn a kaih aw mi, Bible thawn a kalh aw lo mi a si a ṭul tinak a si.

          Kan zirh mi Bible thawn a kaih aw le kaih aw lo, thuṭhimnak Pakhat ah, tuni Bible a veikhatnak kan siarmi sung thotho ah kan zoh hrih pei: ‘hi duhdawtnak ka timi cu Pathian thukham kan thlun a ṭul tinak a si,” ati. ‘hi duhdawtnak ka timi cu Pathian thukham kan thlun a ṭul tinak a si.” Kan nih in kan thuzirhnak ah thukham thlun a ṭul lo kan ti bang seh la kan zirh mi hi Bible thawn a kaih aw thei pei maw ti ruat sal a ṭul. Jesuh Khrih hmin hmang in thuthangṭha kan sim rero hman sehla kan sim mi Bible thawn a kaih aw lo ih kan duhnak fang te lawng kan lak ih kan sim a si pang le cu kan thlarau hrang ah ṭih a nung zet mi a si. A tang lam kan siar bet a si le St. Paul in, ‘zokhal Khrih thuzirhnak sungah um lo in a hleifuan in a nungtu cu Pathian a nei lo,’ a ti. Kan simmi Bible thawm a kaih lo a si le, Jesuh Khrih ih rundamnak a mak thei tawk in sim duh ruang ih thukham thlun a ṭul lo in rundam zo tivek in a hleifuan in kan zirh aw a si le cu Bible ih in sim mi vek in Pathian nei lo mi ah kan cang thei asi. Curuangah hmai sa ih ka simmi vek in kan zirh aw mi a bang aw lo tik ah Bawipa ih in zirh mi, Bible ih in zihrh mi thawn a kaih aw maw ti hi kan zoh sal ringring a ṭul ding a si. 

          Bible veikhat siarnak ih a netnak ah cu, ‘sikhalsehla Khrih thuzirhnak sungih a umtu cu Pathian a nei ih a Fapa khal a nei a si,’ a ti. Tuni kan siarmi Saam sung khal ah ‘Bawipa ih daan vekih a nungtu pawl cu mi lungawi an si,’ ati. Kan zumnak, kan zirh awnak hmuahhmuah ih a hram pi cu Khrih ih zirhnak asi ringring a ṭul a si. A har tuk aw, kan thlun thei lo ding tiin mah duh deuh zawng in, a ol deuh zawng in lak ih zirh aw men si lo in ziang tulk in a har mi khal siseh la Bawi Jesuh ih in zirh mi cu a mah ih zirh mi vek in sim ve le zirh ve kan ṭul a si. Kan Bawipa ih in zirh mi vek in a sim le a zirh aw thei tu kan si thei nak ding in Pathian in in thlua suah cio hram seh.

Fr. Peter Lal Zin Thang (Hakha Diocese)