Bawipa cu a hlomi pawl ton salnak ah lungawitu (sim tu Rev. Fr. Joseph Ro Nei Thang)

Bawipa cu a hlomi pawl ton salnak ah lungawitu

Thuthangtha sim tu Rev. Fr. Joseph Ro Nei Thang

October 5, 2020

Siarding: Filipi 3:3-8; Ps 105:1-2, 3-4, 5-6; Luka 15:1-10

            Bawi Khrih ah duhdawt zetmi nu le pa, u le nau pawl, “kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghlim ih pumkhat sinak pawl cu nan zate thawn um hram seh” tiah hmaisabik ah cibai ka run lo buk hai. Tuihni cu 2020, November thla ni 5 ni, Tlawngkai nilini asi. Tuihni ih kan siar dingmi Pathian ih ttongkam pawl cu Filipi 3:3-8 tiang; Ps 105:1-2, 3-4, 5-6 tiang asi dingih Saam a sawnnak cu “Bawipa a hawltu pawlin an lungawi seh” tiah asi pei. Cun Thuthang ttha ahcun Luka 15:1-10 tiang pawl tla ansi pei. Tuihni kan ruah khawm dingmi cu “Bawipa cu a hlomi pawl ton salnak ah lungawitu” asi tinak asi pei. 

            Tuihni ih kan siarmi Thuthang ttha sungah Jesuh in “tahtthimnak ah nanmah lakah mipakhat in tuu zakhat nei in tuu pakhat hlo bang sehla ziangsi a tuah ding? A tuu 99 cu hram lakah a tanta dingih a hlomi a tong sal hlanlo a hawl ciamco ding. A ton sal tikah a lung a awi tukih a liangpulut tahratin inn ah a tlunpi. Cule a ruapi le a innhnen pawl ko khawm in ‘a hlomi ka tuu ka tong salih ka lung a awi ngaingai. Curuangah lungawi in lawm uhsi’ tiah ati. Cubangtukin sualsir a ttullo mi mittha 99 hnakin a sual a sirmi misual pakhat ruangah vancung ah lungawinak a tamsawn ding asi” tiah ati. “Cu asilole, nunau pakhat in tangka fanghra nei sehla fangkhat a thlau ahcun ziangso a tuah ding? Mei-inn vang tahrat in a inn kha a phiat ih a hmu sal hlanlo a kel le a kawm tiangin a hawl ttheh. A hmu tikah a rualpi le a innhnen pawl a ko khawmih ‘ka thlaumi tangka ka hmu sal zo; curuangah lungawi uhsi’ tiah a ti ding. Cubangtukin sualsirnak a neimi misual pakhat hrangah Pathian ih vancungmi pawl an lung a awi zet asi” tiah a ti ti-in ka hmu asi. A hlomi tuu tonsalnak le a hlomi tangka hmu salnak thu pawl thawn Bawipa in sualsirnak a thupi zia in simnak asi. 

            Israel miphun pawlin an pumcawmnak ah mihrekhat nih tuu an zuat, mihrekkhat in mee an zuat, cule tthenkhat nih cun ttilva dangdang an zuat ttheu asi. Tuu pawl cu ttilva dang pawl hnakin an aa deuh asi. An rawl ah hrampi an ei ttheu ih hrampi an einak ihsin khua tla zoh nawnlo in hmai lamah an nor vivo tikah a hrekkhat cu lam an pial ngah asi, a hrekkhat cu horkuam ah asilole kham lakah an tla ngah ttheu asi. Hmailam ah ziang a um ti kha an zoh lemlo, an ruat ttheulo asi. Curuangah ttilva lakah an aa deuh cuang. An aa deuh ruangah tuukhaltu nih a tuu pawl parah ttuanvo tumpi a nei asi. Cule Israel tuukhal pawlin an hlotermi an tuu pawl cu an ton hlan hmuah hawl dingah ttuanvo an nei asi. Tuukhal pawlin ‘ka tuu a hlo zo, ka tuu pawl sahrang pawlin an deh that zo’ tiah ol tein an ti dah lo asi. A khalmi tuu kha a hlo asi, sahrang in a deh that zo asi tiah a ti theinak dingah tetti pakhatkhat hmu a ttul asi. Sahrang pawlin an dehthat zo asile tuu vun maw, tuu phaw maw, tuu ruh maw tivek tal a tong ttul asi. Cutin a tongih tetti a hmuh thei hlan sung cu a hawl rero ding asi. A hlomi a tuu cu a tong sal tikah a liang parah a suang pei ih khua a luh hlan hmanah ‘a hlomi ka tuu cu ka hmu sal zo’ tiah lungawinak thawn a ti ding asi. Cun a lungawinak tla midang pawl le innhnen pawl a hlawm hai ding. Cutluk in Israel tuukhal pawlin an tuu pawl parah kilkhawinak tuamhlawmnak  thinlung an nei ttheu asi. Cumi cekci umdaan kha kan Bawipa Jesuh Khrih in tuihni kan siarmi Luka ih nganmi thuhtang ttha sungah in sim ve asi. Bawipa Jesuh in sual sirnak a ttullomi Pharisee pawl, daan thiam saya pawl le biaknak lamih hruaitu upa pawl hnakin suarsirnak a neitu hlawhhlang pawl, siahkhawng pawl le sual neitu ti ih mipi ih hnonmi pawl kha Pathian uknak sungah an lut hmaisa ding asi tiah a sim asi.

            Mt 21:31 ah Jesuh in “fiang tein ka lo sim: siahkhawngtu le hlawhhlang pawl hi nan hlanah Pathian ih uknak sungah an lut ding. Ziangahtile baptism petu John cu a dikmi lamzin hmuh dingah nan hnenah a ra nain nan zum lo; sikhalsehla ngunkuai khongtu le hlawhhlang pawl cun an zum. Cumi nan hmu hmanah nan thinlung nan thleng cuanglo, zum khal nan zum cuanglo” tiah a ti asi. Cun Bawipa Jesuh in a hlolomi 99 ruangah a daithlanglo; “99 ka nei lai pam ko, pakhat lawng a hlo manah…. tiin a ruatlo. A hlomi pawl kha a tong hlan hmuah ah a hawl asi. Cumi cu Pathian ih thinlung le milai ih thinlung a langfiang asi. Pathian ih thinlung cu a hlomi pakhatte hmanah a duhlo, a sianglo, a pamhai asi. Milai ih thinlung cu pakhatte a hlo khalah zianghman kan poi salo, kan hna a ngam men ttheu asi. Lampeng a zawhtu kan Kohhran member pawl kan hawl a ttul zet asi. Kan tonsal tikah asilole sualsirnak thawn a kir sal tikah lungawinak tumpi thawn hmuak sal ding kan ttul zet asi. Kan lungawinak cu midang tla hlawm ve ding kan si asi. 

            Cun Bawipa Jesuh in tangka fang hra a neimi nunau in fang khat a hlo tikah ttha tein a hawl sal asi tiah tla in sim bet. Israel miphun pawlin Bawi Jesuh san lai ah inn an sak tikah a niam tein an sak ttheu asi.  Mizaran nih cun zial tla an don theilo asi. Cuhlei ah tukvirh timi padinpoh tla a fate pawl lawng an bun thei asi tikah inn sung cu a thim ttheh asi. Cutin ansi tikah an tangka cu inn sungah hlo bang sehla hmun an phiat ta dingih a hlomi tangka cu an hawl sal ttheu asi. Meisa a vang dingih a tong sal tiangin a hawl ding asi. A tong tikah a innhnen pawl a ko khawm dingih lungawi thu a sim ciamco ding asi. A lungawinak cu midang tla a hlawm ve asi. A hlomi thlarau pawl ttha le fel zetin hawl sal ding kan ttul zet asi. Kan zuam zet a ttul ringring asi. Bawipa nih anmah thi ding le hlo ding ah a duh hrimhrim lo asi. Ezekiel 18:32 ah “zohman nan thi ding ka duhlo. Nan sualnak sir uhla nung uh” tiah Cungnungbik Bawipa in a ti. Bawipa cu miding pawl run ding ah a ra lo; zinpeng zawhin misual pawl ko sal dingah le lungkuaimi pawl damter dingah a rung ttum asi tiah Luka 5:32 ah Bawipa Jesuh Khrih nih in zirh asi.

            Nan zarah parah a zateih a thiamtu Pa le Fapa le Thlarau Thianghlim in thluasuahnak lo pe hram seh. Amen.