Bawipa cu kan hnenah a um ahcun tihphan ding a um lo

Bawipa cu kan hnenah a um ahcun tih ding a um lo

Rev. Fr. Joseph Ro Nei Thang ih Thuthangtha sim mi (December 12, 2019 – Nili ni)

Siarding Bible pawl:  Isaiah 41: 13 – 20 le Mt. 11: 11 – 15.

          Kan ruah khawm dingin ka hril mi cu “Bawipa cu kan hnenah a um ahcun tih ding a um lo” ti nak a si pei.  Tuni kan siar mi bible a vei khat nak cu Prophet Isaiah sungin a siih a mah cu Adventu prophet tiah tla kawh a si theu. Tuini kan siar mi sung ih sin Bawipa in cun zianghman tih hlah, ka lo bawm ding maw Israel miphun fate le mi tawntai na si. Asinain zianghman tih hlah ka lo bawm ding Israel Pathian Thianghlim kei mah cu a lo run tu a si tiah Is 41: 13 – 14. Cu hlei ah tuni kan siar mi asilo nan Is 41: 9 – 10, Bawipa in nang cu ka siah hlawh na si ka lo ti, ka lo hnong lo, ka lo hril sawn a si. Zianghman tih hlah. Na hnenah ka um a si. Keimah cu na Pathian ka si. Zianghman in ol phang ter hlah she. Ka lo bawm ding ih ka lo cak ter ding. Ka lo humhim dingih ka lo run ding tiah thazang pek nak cathianghlim kan siar their asi.

1/ Kan nunsungah tih phan nak tampi kan tong ding, kan hmu ding, kan tuar ding asi. Sihmansehla zum tu pakhat din hmun in cun Emmanuel Bawipa kan hnenah a um ring ring ahcun tih phan nak ding zianghman a um lo. Bible sungah Pathian ih thlarau in ral that nak in pek a si tiah kan hmu. IITim. 1: 7 Ziangah tile Pathian nih in pek mi thlarau in tih hrutmi ah in tuah lo cu hnak in huham duhdawtnak le mah le mah uk awknak in khah ter asi.

Tihphannak timi cu Christian hrang ah hmun a um lo ding mi asi. Kan sungih a nung tu Jesuh Khrih hmin ni tihphan nak hmuah hmuah cu nei thei nak in pe zo asi.

2/ Cu hnak in ralttha zet in um ding kan si. Daan 31: 6, 8. ⁶Cakzet le ralṭha zetin um uh. Hi miphun pawl cu ṭih hlah uh. Nan Pathian Bawipa amah rori cu nanmah thawn a feh ding. A lo tlansan lo ding ih a lo hnong lo ding,” tiah a ti. Curuangah na thinnau hlah seh, na thin khal phang hlah seh,” tiah a ti.

3/ Bawipa nih in um pi ahcun zianghman tih phan ding a um lo.

Saam 23: 4, A thimmi thihnak horkuam sung zawh hman ningla, Maw Bawipa, ka ṭih lo ding; Ziangah tile nang cu ka hnenah na um, Na talhtum le na kianghrol in ka hna in ngamter.

Isaiah 41: 13 – 20.

¹³Keimah cu Bawipa na Pathian ka si; Na tha ka lo cakter ih, ‘Zianghman ṭih hlah; ka lo bawm ding,’ tiah ka lo ti,” a ti.

¹⁴ Bawipa in, “Maw Israel, miphun fate le mi ṭawnṭai na si. Asinain zianghman ṭih hlah, ka lo bawm ding. Israel ih Pathian Thianghlim keimah cu a lo runtu ka si.

¹⁵Nangmah cu fang vuaknak fung, a thar, a hriam mi ha a nei mi bangtuk ah ka lo tuah ding. Tlangsang pawl na ciil dingih an siat ding; Tlangmual pawl tla leivut ah an cangṭheh ding.

¹⁶Van ah na khirh hai dingih Thli in a semhlo ding; Thlisia in khuazakip ah a ṭhekdarh ding. Asinain keimah hi na Pathian ka si ruangah nang cu na lung a awi ding. Israel ih Pathian Thianghlim hi i thangṭhat ding.

¹⁷“Ka minung pawl mangbang vansaangin an um ih Tihal in an dang a caar tikah, Bawipa keimah in an thlacamnak cu ka thei ding; Israel ih Pathian keimah cun ka dungtun dah lo ding.

¹⁸Tlangcar lakih sin tiva an puut dingih Phairawn in cerhti fim an luang ding. Nelrawn cu ticawm in ka khahter dingih Ramcaar cu cerhti luannak ah ka canter ding.

¹⁹Nelrawn ah sidar zanthing ka kho ter ding, Lawithing, lenhmui le olif thing tla ka kho ter ding. Leenkolh ah tupi ka umter dingih cuih tupi ahcun farthing, hualthing le tufar thing an kho ding.

²⁰Cumi cu mi in an hmuh tikah Bawipa keimah ih tuah mi a si kha an thei ding. Israel ih Pathian thianghlim in hi hmuahhmuah cu a cangter a si tikha an theithiam thlang ding,” tiah a ti.

Mt. 11: 11 – 15.

¹¹Fiangtein ka lo sim. Nunau ih hrinmi lakah baptisma petu Johan tlukih a tummi zohman an um dah lo. Sikhalsehla vancung Uknak ih mitenau bik hman khi Johan hnakin a tum sawn lai a si.

¹²Johan ih thusim caan thokin atu tiang vancung Uknak cu dodalnak nasa zet a tong ih mi hel-hlong pawl in hramhram in laak an tum.

¹³Khuahlan ihsin Johan san tiang profet pawl le Moses Daan pawl in hi vancung Uknak thu hi an sim.

¹⁴An thu simmi nan zum duh a si ahcun Johan hi a ra ding tiih rak sim ciami Elijah kha amah hi a si.

¹⁵Curuangah theihnak hna a neitu in thei uh.