Bawipa ih Duh Zawng Lungput (sim tu Rev. Fr. Lucas Tha Ling Sum) June 16, 2021

Bawipa ih Duh Zawng Lungput

Thuthangtha sim tu Rev. Fr. Lucas Tha Ling Sum

June 16, 2021

Siarding: 2Kor 9: 6-11; Saam 112: 1-4, 9 (1); Mt 6: 1-6, 16-18.

            Zumtu u le nau, Pathian zangfahnak in nan dam ciau ding ka zum. Tui tlawngkai nithum, June 16, sunih Baibal kan siar dingmi Mathai 6 sungta thawn pehpar aw in “ Bawipa ih duhzawng lungput” timi thu kan ruat tlang pei. Hmaisa ah Baibal ngai ta hrih uh si.

Mt 6:1-6, 16-18

            “Biaknak lamih thil ttha nan tuah mi hi mi in, in hmu hai seh tiin mizapi hmaiih tuah lo dingin ralring uh. Cu tiih mipi hmai ih nan tuah ahcun vancung ih a ummi nan pa hnen ihsin tthat man zianghman nan ngah lo ding. Curuangah mi tlasam hnenah thil pakhatkhat nan tthen tikah mititeraw pawl ih sinakok le zalamzin ih an tuah vek in tawtawrawt tum in uang aw hlah uh. Annih cun mipi pawl ih lom dingah an tuah. Fiang tein ka lo sim. An ngah dingmi cu an ngah ttheh zo. Sikhalsehla nannih cun mitlasam nan bom tikah nan vorhlam kut ih tuah mi kha nan kehlam kut khal in thei lo dingin va tuah uh. Cuticun a thupte ih nan tuah mi a hmutu nan pa in tthatman a lo pe ding.

            Thla nan cam tikah mititeraw pawl vekin cam hlah uh. Annih cun mi hmuahhmuah in, in hmu hai seh tiin sinakok le zalampi ah ding tahrat in thlacam an duh ngaingai. Fiang tein kan lo sim: an ngah dingmi an tthatman cu an ngah ttheh zo. Sikhalsehla nannih cu thla nan cam tikah nan inn khan sungah lut uhla sangka khar hnuah mit hmuh lomi nan pa hnenah thlacam uh. Cule a thup te ih nan tuah mi a hmutu nan pa in nan tthatman a lo pe ding.

            Rawl nan ulh tikah mititeraw pawl vekin riahsia mithmai in um hlah uh. Mihrek in rawl an ulh kha mi hmuahhmuah in, in thei hai seh tiah an mithmai in an langter. Fiang tein ka lo sim. An ngah ding mi an tthatman an ngah ttheh zo a si. Nannih cu rawl nan ulh tikah nan hmai phiah in nan sam tla tthaten hriat uh. Cuticun zo hman in rawl nan ulh kha an lo thei lo dingih mithmuh lo nan pa lawng in a lo thei ding. A thup teih nan tuah mi a hmu tu nan pa in tthatman a lo pe ding.

            Zumtu u le nau, milai cun thinlung hnak in pawnleng kan zoh sawn ttheu. Asinan, kan biak kan Pathian cun a lenglam hnak in milai thinlung hi a zoh sawn. Ziangtluk thil ttha kan tuah hman ah kan lungput a dik lo a si ahcun ziang hman tthat hnemnak a nei lo a si. Pharisees kan timi mititer aw pawl vek, thinlung nei hlah uh, tiah Bawi Jesuh in, in sim. Pharisee pawl ih thinlung um dan pa thum in zoh hnik uh si. 

            Pakhatnak ah, Pharisee pawl hi mi tlasam pawl bawm ttheu tu an si. Ih, a ttha tuk. Asinan, Bawi Jesuh cun mi tlasam pawl an bomh dan hi a lung a kim lo. Ziangruangah a si tilen, an lungput a dik lo ruangah a si. Mi in thil ttha kan tuah mi hi thei hai she; Mi in in lawm hai seh, timi thinlung thawi mi an bom ruangah a si. Curuangah Bawi Jesuh in hitin in sim: “mi tla sam hnenah thil pakhatkhat nan tthen tikah mititeraw pawl ih sinakok le zalamzin ih an tuah vek in tawtawrawt tum in uang aw hlah uh,” in ti.

            Cun a pahnihnak ah, Pharisee pawl hi thlacam ttheu tu pawl an si. Ih, a ttha tuk. Asinan, Bawi Jesuh cun an tlacam dan hi a lung a kim lo. Ziangruangah a si tilen, an lungput a dik lo ruangah a si. Mi in thlacam an zuam tiah in ti hai seh; mi in in lawm hai seh, timi thinlung thawi thla an cam ruangah a si. Curuangah Bawi Jesuh in Pharisee pawl vek in, thla cam hlah uh, in ti. 

            Cun a pathumnak ah, Pharisee pawl in rawl ulh ih thlacam hi hmual a nei zet timi an thei. Curuangah rawl ul ih thlacam ttheu tu an si. Asinan, Bawi Jesuh cun rawl ul ih thla an cam dan a lung a kim lo. Ziangruangah a si tilen mi tu ih kan sim zo vek khan mi in rawl a ul ti in thei hai seh, mi in in lawm hai seh, timi thinlung an nei ruangah a si. Curuangah Bawi Jesuh in Farisee pawl ih thinlung nei hlah uh in ti.

            Zumtu u le nau, tuittum Bawi Jesuh ih in zirh mi pawl a tawi zawngih kan sim asilen mi tlasam pawl kan bom tikah siseh, thlakan cam tikah siseh, thinlung thianghlim kan nei a ttul, timi a si. Thinlung thianghlim nei tu si thei dingin Pathian in nan zaten thlawsuah lo peh hram seh. Amen.