Bawipa ih duhdawtnak thawn a khahmi leilung (Thuthangtha sim tu - Rev. Fr. Joseph Ro Nei Thang)

Bawipa ih duhdawtnak thawn a khahmi leilung 

Thuthangtha sim tu Rev. Fr. Joseph Ro Nei Thang

October 22, 2020.

Bawi Khrih ah duhdawt zetmi nu le pa, u le nau pawl, “kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghlim ih pumkhat sinak cu nanmah zate thawn um hram seh” tiah cibai ka run lo buk hai. Tuihni cu 2020, October thla ni 22, Tlawngkai nilini asi. Tuihni ih kan siar dingmi Pathian ih ttongkam pawl cu Efesa 3:12-21 tiang le Ps 33:1-2, 4-5, 11-12, 18-19 tla ansi pei ih Saam a sawn ahcun “Bawipa in leilung cu a duhdawtnak thawn a khahter asi” tiah asi. Cun Thuthang ttha ahcun Luka 12:49-53 tiang asi pei ih Jesuh Khrih cu remnak hrang silo in tthen-ttheknak hrangah asi sawn asi tihnak asi pei. Tuihni kan ruah khawm tlang dingmi cu “Bawipa ih duhdawtnak thawn a khahmi leilung” ti thu asi pei. 

Tuihni kan siarmi Bible a voikhatnak ihsin Efesa 3:17-19 tiang kha siar sal uhsi. “Nan zumnak thawngin nan thinlung cu Khrih in a umnak inn ah tuah hram seh  tiah thla ka cam. Thla ka cam beet hrih mi cu:- nan hram le nan hramttohnak cu duhdawtnak sungah bun uhla, cuticun Pathian ih minung pawl thawn thinlung khatin Khrih ih duhdawtnak a thukih a sanzia le a sau-ih a kauhzia kha theih thei nak nan nei ding ti hi asi. Minung fimthiamnak in a theih thluh thei lo mi a duhdawtnak cu nan thei ko dingih a famkimmi Pathian asinak thawn nan nunnak cu a khat ding asi” tiah asi.  

“Bawipa Jesuh Khrih ih duhdawtnak a thukih a sanzia, a sau-ih a kauhzia” tiah Paul in in zirh. Jesuh Khrih ih duhdawtnak cu ziangtlukinso a thuk, ziangtlukinso a saang, ziangtlukinso a sau, ziangtlukinso a kau ti duhnak pawl ansi. Ziangtlukinso a saang:- A saangbik vancungram ihsin duhdawtnak thawn a rungttumih a ttumnak ahcun minung a cang, minung cannak a lakih kan sualnak hrangah thihnak a tuar. Thihnak a tuarih thlan sungah an phum. A thlarau cu leitang ram timi mithi khua ah a ttum. A thukbik mithi khua tiangah a ttum. Cutawk ih thlarau thawngtlakmi pawl hnenah thuthang ttha a va sim. Cun Bawipa ih duhdawtnak a sau le a kau zia tla cu a zazam in thinglamtah parah a thi tikah a lang asi. Bawipa ih duhdawtnak cu thinglamtah parih thihnak a tuarmi cu leitlun khuazakip hrangah asi. Nisuahnak, nitlaknak, saklam le thlanglam tiangin a khihhmuh ttheh asi. Curuangah tuihni kan siarmi Saam a sawn ah “Bawipa in leilung cu a duhdawtnak thawn a khahter asi” tiah asi. Bawipa ih duhdawtnak cu leilung ah lawng tla silo in van ah tla a duhdawtnak thawn a khat thotho asi. 

Tuihni kan siarmi Thuthang ttha sungah Bawi Jesuh in “leilung tlunah hin meisa kangter dingah ka ra thleng; a tu-ahhin alh thlang sehla ka va duh so” tiah Luka 12:49 ah in zirh. Bawipa Jesuh in hi leitlun ah duhdawtnak meisa kangter dingah ka ra ati. Meisa kan ti tikah Pathian ih minung pawl asimi nang le kei hnenah tleunak le khuahlumnak a pek. Meisa cu Pathian ih ttongkam thawn tla an tahtthim ttheu. Jeremiah 20:9 ah “Bawipa, na ttongkam cu meisa bangtukin ka sungah a alh ciamco; ka ruh sungah a ceeng asi; daite-ih um ka tum nain ka umpi thei hrimhrim lo” tiah kan hmu thei. Meisa khal a kang hnuhnu cun kham thei asi nawnlo vekin Pathian ih ttongkam khal prophet Jeremiah hnenah a ra thleng tikah simlo in a um theilo, dai tein um a theilo tinak asi. Bawipa ih duhdawtnak cu meisa bangtukin kangter dingah asi. Amah cu duhdawtnak hram asi. A tu-ah kang ciamco thlang dingah Bawipa nih a duh asi. A duhdawtnak cu meisa bangin kan nunnak ah a kang dingah Bawipa nih a duh. Mei a kang hnu-hnu cun a zatein kang asi vekin Bawipa ih duhdawtnak tla kan nunnak sungah a lutih a kang asi ahcun minung hmuahhmuah kan duhdawt ve ding asi. Leilung khuazakip ah a duhdawtnak cu meisa bangin kang ttheh ding Bawipa in a duh asi. Cumi a duhdawtnak cu hi leilung pumpuluk ah a khat ttheh hlan ahcun Bawipa ih thinlung cu a bang zet asi. Leilung ah a duhdawtnak cu a cohlangtu a um vekin a cohlang duhlotu pawl tla an um ding. Bawipa ih duhdawtnak a sunlawihtu a um vekin dungtuntu le zianghman siarlotu pawl an um ding. Cumi pawl lakah remlonak tla a um ding. An lakah hau awknak le tawh-awknak a suak ding. Bawipa ih duhdawtnak thuthang ttha a cohlangtu le a hnongtu pawl parah rem awlonak a um ding. Curuang ah Bawipa in Luka 12:51 ah “Leilung tlun ahhin remnak a run keng tiah maw si in ruat? Ailo, remnak silo-in tthenttheknak sawn ka run keng asi” tiah in rak sim ta. 

U le nau pawl, nitin kan nunnak ah Bawipa nih in duhdawtnak hi ruat ringring uhsi. Bawipa nih in duhdawt tuk ruangah Amaih hmuihmel vekin in serhsiam ih, sualnak sal sungah milai a tla hnu ah rundam sal dingin milai tisa semnak a lak asi. Milai in Pathian parih a sualnak cu a tum ngaingai, kuan cawk asilo. Curuangah Amah Pathian rori hi milai a cangih milai pawlih sualnak cu a kuan sak thluh asi. Tangka thawn kuan theih asilo ih Amahih nunnak thawn kan leiba cu in sam sak sal asi. Paul in Rome 5:8-10 “Sikhalsehla Pathian in ziangtlukinso in duhdawt ti cu a langter: misual kan si hrih nacingin kan hrangah Khrih cu a thi. A thisen thawngin kannih cu Pathian thawn kan rem awk zo ruangah ziangtlukinso Pathian ih thinhengnak ihsin Amah in in runsuak sinsin ding! Hlan lai ahcun Pathian ih ral kan rak si dah, sikhalsehla a tu ahcun a Fapa thihnak ruangah a rualpi ah in tuah zo. Pathian ih rualpi kan cang zo ruangah Khrih ih nunnak in ziangtlukinso in run suak sinsin ding” tiah Bawipa duhdawtnak thu kan hmu thei asi.

Cun John in tla 1John 3:1 “Pathian kan Pa ih in duhdawt zia hi ruat hnik uh! In duhdawtnak hi a maksak ruangah Pathian ih fale tiah kawh kan si hi; cuti ih in ti vekin kan si ngaingai” tiah Bawipa ih duhdawtnak a thukzia cu kan hmu thei asi. Kannih tla Bawipa kan duhdawt vekin pakhat le pakhat duhdaw aw ve dingin Bawipa nih thukham thar in pek asi. John 13:34 “Cule nan hnenah thukham thar ka lo pek:pakht le pakhat duhdaw aw uh! Keimah in ka lo duhdawt vekin pakhat le pakhat nan duhdaw aw ve pei” tiah asi. St John Marie Vianney in Bawipa ih duhdawtnak na thei taktak ahcun na lungawi tuk dingih na thi cih men ding tiah Bawipa ih duhdawtnak a thupi zia in sim asi.

Kan zatein Bawipa ih duhdawtnak thawn a khahmi kan si thei cionak dingah Bawipa nih in run thluasuah hram seh. Amen.