Bawipa ih hril mi pawl (sim tu Rev. Fr. Joseph Ro Nei Thang) May 14, 2021

Bawipa ih hril mi pawl

Thuthangtha sim tu Rev. Fr. Joseph Ro Nei Thang

Pasca caan Zarh 6 nak May 14, 2021 (Friday)

Siarding:Tirh. 1: 15-17, 20-26; Saam113: 1-8; Jn 15: 9-17.

          Leitlun khuazakip ihsin RVA Falam Chin service ah thlarau rawl thianghlim a zawh ringringtu Bawi Khrih ah duhdawt zetmi nu le pa, u le nau pawl, Thlarau Thianghlim in lo umpi sehla hnangamnak tla lo pe hram seh tiah thla za ka run lo cam sak hai. Tuihni cu Pasca caan sungih Kaar 6 nak, Tlawngkai ni 5 ni, 2021 May thla ni 14 asi. Cun May tthla 14 cu St Matthias ih puaini asiih Matthias hmin latu hmuahmuah “Happy feast day” tiah cibai ka run lo buk hai. Tuihni ih kan siar dingmi Bible pawl cu Tirhthlah 1:15-17, 20-26 tiang le John 15:9-17 tiang pawl ansi pei. Tuihni ih kan ruah khawm tlang dingmi cu “Bawipa ih hrilmi pawl” tiah asi pei. 

          Tuihni kan siarmi thuthang ttha Jn 15:15-17 ah Bawipa Jesuh in a Tirthlah pawl hnenah “Nannih tla cu hnen-um tiah ka lo ko nawnlo, ziangahtile hnen-um cun a bawipa ih tuahmi kha a theilo. Hnen-um ti nawnlo in Rualpi tiah ka lo ko, ziangahtile ka Pa hnen ihsin ka theihmi hmuahmuah cu ka lo sim ttheh zo asi. Nannih in in hrillo, keimah sawn in ka lo hril ih kumkhua a hmunmi nan rah theinak dingah ka lo fial asi. Ka Pa in nan dilmi hmuahhmuah cu a lo pe ding asi. Cule ka thupekmi hi hihi asi: pakhat le pakhat duhdawh aw uh” tiah asi. 

          Tuihni cu St Matthias ih puaini asi vekin St Matthias in ziangtinso hrilnak a ngah ti kha ruat hmaisa uhsi. Bawipa Jesuh in a Kohhran hruaitu dingah Tirhthlah 12 a hril asi. Cumi Tirhthlah 12 sung ihsin Judas Iscariot in a Bawipa cu a zuarih amah hmun hi rol tengteng a ttul. Israel miphun pawl cithlahtu dingah Jacob in fapa 12 a nei vekin Israel miphun thar asimi Bawipa ih Kohhranpi tla karhzaai dingah cithlahtu 12 a ttul ve ruangah Bawipa amah rori in Tirhthlah 12 a hrilnak asi. Judas ih hmun roltu dingah Tirhthlah pawlin khawmpi an tuah. Judas ih hmun roltu Tirhthlah si dingah 1> Bawipa Jesuh le a Tirthlah pawl thawn khual a tlawn vivo sung hmuahhmuah ah an lakah a telmi, 2> Johan in baptism thu a sim ni ihsin thokin Jesuh vancung a kai ni tiang anmah lakah a tel vemi, 3> Bawipa Jesuh ih thawhsalnak thutheitu timi pawl an ttul asi tiah anti. Cuti cun milai pahnih an tong ih Barsabbas tiah kawhmi Joseph le Justus tiah kawhmi Matthias te tla ansi. Cule hmual nei zet le duhnung zetin thla an cam: “Maw Bawipa, Nang cun mi thinlung sung na thei ttheh. Himi pahnihte lakah zo deuh na hril ti kha in theiter hram aw. A co dingmi hmunah in tlansantu Judas ih ai-awhtu ah na Tirhthlah pawl lakih ttuanvo la dingah na hrilmi cu run fiangter hram aw” tiah thla an cam asi. Cule camcawhfung an zuukih Matthias in a ngah asi. Cuticun Matthias cu Tirhthlah 12 sungtel ah a cang. Himi hril awknak ih thlacamnak ah Tirhthlah pawlin mithmai pek deuhnak thawn thla an camlo ih “Maw Bawipa, Na hrilmi kha in theiter hram aw” tiah thla an cam asi. Ziangtlukinso hmual a nei. Cutin hmual nei zetin thla an cam ruangah hrilnak camcawhfung a colotu Barsabbas hi a thin a heng lo, a iksik hai lo, Bawipa ih hrilmi parah a lungkim asi. Amah tla Pathian hrangah pumpek in hna a ttuan thotho ding tiah zum a um asi. Matthias in hrilnak a ngah vekin Bawipa hrangah a nunnak pe tiangin a hna a ttuan asi.

           Tuihni kan siarmi thuthang ttha ah Bawipa Jesuh in “hnen-um ti nawnlo in rualpi tiah ka lo ko.”

1> Bawipa Jesuh in a Tirhthlah pawl kha rualpi tiah a ko asi. Ti duhnak ahcun Bawipa Jesuh in a Tirhthlah pawl kha partner timi hnattuanpi si dingah a hril asi. Rundamnak hnattuanpitu tiah kawh asi. Sal tiah Bawipa in in ko lo. Bawi Jesuh san lai ah sal pawl cu Greek miphun pawlih lo thlawhnak thilri vekin an ruahmi asi. Thilri hnakin a uak deuhmi cu sal pawl cu thupek in fial a thei asi. Cawhaal vekin ansi lo, hriamnaam vekin ansilo. Bawipa Jesuh in sunglawi zetin a Tirhthlah pawl kha partner timi hnattuanpi ah a cawisang asi.

2> Cun Bawipa Jesuh in a Tirhthlah pawl kha ambassador timi Kawl ttongin (taan-ta-maan) si dingah a hril hai asi. Taan-ta-maan pawl cu ram pakhat ai-awh in hnattuantu pawl ansi. Yangon ah US taan-yone a um ih cumi cu Yangon ih a ummi US ram asi. US rammi ai-awh in hna a ttuan ding, a cangvai ding asi. Taan-ta-maan timi cu palai thawn an bang aw phah asi. Curuangah 1Peter 2:9 “Sikhalsehla nannih cu hril cia miphun, Siangpahrang ih puithiam miphun, miphun thianghlim, Pathian ih miphun bulce nan si” tiah Peter in zumtu Khrihfa pawl hi ca a kuat asi. Tirhthlah pawl cu puithiam timi Pathian le milai kar lakih hnattuantu palai ah khaisannak an ngah asi.

3> Bawipa Jesuh in a Tirhthlah pawl kha kyaw-nya-tu siding ah a hril asi. Ziangso an kyaw-nya ding? An kyaw-nya dingmi pawl cu kumkha a hmunmi rah, kumkhua vancungram ro thil, Tirhtlah dinhmun in Pathian ih hrilmi vekin nung suak dingah le ttuan suaknak thawngin kumkhua a hmunmi rah tampi an co theinak ding thu kyaw-nya dingah a hril asi.

4> Bawipa Jesuh in a Tirhthlah pawl kha thlacam ringringtu si dingah a hril asi. Hrilnak ngahtu zumtu nang le kei tla thlacam ve dingah Bawipa nih in duh sak asi. Curuangah thla kan cam tikah a> Zumnak thawn thla kan cam a ttul asi tiah James cakuat 5:15 ah in zirh asi. Zumnak kan neimi cu anttamci tia tlukte a si hmanah huham a nei zia Bawipa amah rori nih in zirh asi. b> Thla kan cam tikah Bawipa Jesuh Khrih ih hmin thawn thla kan cam a ttul asi tiah Bawipa nih in zirh. Ka hmin thawn thlacam uh tiah Dungthluntu pawl a zirh vekin nang le kei tla in zirh asi. c> Thla kan cam tikah mipi zate hrangah thla kan cam a ttul asi. Mah hrang lawng silo in mizapi hrangah thlacam dingah Bawipa nih in duh sak ruangah thlacamnak in a zirh tikah “Van-cung ih a ummi kan Pa” tiah a zirh. Vancung ih a ummi ka Pa tiah a zirhlo asi.      d> Thla kan cam tikah kan dilmi thluasuah kan ngahlo pang asi ahcun “Na duhnak vekin siko seh” tiah kan letkhan thiam a ttul asi. Kanmah ih duhmi hi Pathian ih duhdan asilo ahcun kan ngahlo men thei. Tangdor tein “Maw Bawipa, na duhmi vekin si ko seh tiah saang thiam uhsi.

5> Bawipa Jesuh in a Tirhthlah pawl kha a innsungsang member si dingah a hril asi. Bawipa ih innsungsang cang theinak dingah duhdawtnak thukham kan thlun a ttul. Bawipa Jesuh in tuihni kan siarmi sungah ka thupekmi hi hihi asi: pakhat le pakhat duhdawh aw uh” tiah thu in pek asi. Duhdawtnak hi famkim takin kan nei ahcun sualnak hi kan tuah nawnlo dingih mifamkim ah kan cang ding. Kan thlacamnak tla hmual a nei dingih kan dilmi vekin kan ngah ding. Curuangah 1John 3:22 ah “Kannih cu kan dilmi poh kan ngah; ziangahtile a thukham kan thlun ih amah duhmi kan tuah ruangah asi” tiah St John nih in zirh asi. Tuihni kan siarmi ah tla Bawipa Jesuh in Ka Pa in nan dilmi hmuahhmuah cu a lo pe ding tiah thu in kam asi.

          Pathian in a serhsiammi lakah leilung a umih leilung hnakin thingkung le hrampi pawl uak deuhin a serhsiamih, thingkung le hrampi pawl hnakin ramsa le ttilva pawl uak deuhin a serhsiam. Ramsa le ttilva pawl hnakin milai hi tahtthim theilo in sunlawihnak thawn a serhsiam ih cumi milai lak ihsin tla Christian si dingah Pathian in duhdawtnak thawn a lo hril zo. Cumi Christian dinhmun ihsin Bawipa in a Kohhran thianghlim Catholic Kohhran pakhat si dingin kanmah pawl hi in hril asi. Bawipa ih hrilmi lakah nang le kei tla kan tel ti kha thei sal uhsi. Puithiam pawl, Sister pawl lawng hi hrilnak ngahtu ansi lo. Curuangah Bawipa hnenah lungawi thu sim uhsi. Bawipa in duhdawtnak in hril vekin kannih tla fel tein le titsa nei zetin Bawipa rian uhsi. A tthabikmi lungawi thusimnak cu a Kohhran sungah fel tein titsa nei tein umnak hi asi.

          Bawipa in nan zate parah thluasuah malsawm lo pe hram seh.