Bawipa ih Khaisang Duhmi (sim tu Rev. Fr. Peter Zin), March 13, 2021.

Bawipa ih Khaisang Duhmi

Thuthangtha sim tu Rev. Fr. Peter Zin

March 13, 2021.

Siarding: Hos 6: 1-6; Ps. 51: 3-4, 18-21; Lk. 18: 9-14.

          “Zokhal amah le amah a khaisang awtu cu namthlak a si dingih tangdortu cu khaisan a si ding.” 

          Thuthangṭha a ngaitu duhdawtmi nu le pa, u le nau pawl, Bawipa kan Pathian in ṭhat lo nak le ṭih nungza ral phun za kip lak in a lo hum him hai hram seh la hnangam daihnak a lo pek hai hram seh. Pathian ih khaisang mi kan si theinak ding ah kan mah lam in sin kan ṭul mi pakhat tu ni kan siar mi Gospel sungah kan hmu thei. Cumi cu ziang dang siloin tangdornak hi a si. Kan siar dingmi Gospel cu Luka 18:9-14 tiang a si ih mah le mah sangzet le miṭha zet ih a hmu aw ih midang pawl ziangsiar lo in a um tu pawl tahṭhimnak pakhat thawn kan Bawipa Jesuh in nun a simnak a si.

          Veikhat ah minung pahnih cu thlacam dingah Biakinn ah an feh a ti. Cumi pahnih sung in pakhat cu Farasi mi a si ih a dang pakhat cu siahkhongtu a si. Tangdornak nei lo mi, mah le mah sibik ah ruat aw mi, midang pawl ziangsiar lo mi Farasi pa cun ziangtin thla a cam ti sile, “Maw Pathian, kei cu midang vekin ka duhham lo, thuphan ka per lo ih ṭaangṭawm sualnak tla ka tuah lo ruangah ka lo thangṭhat. Khitawk ih a ummi siahkhongtu vek ka si lo ruangah ka lo lawm. Zarhkhat ah vei hnih rawl ka ul, ka ngahmi hmuahhmuah sungin ṭhenhra ih ṭhenkhat ka lo pe,” tiah thla a cam. 

           Hi Farasi pa ih thlacamnak kan zoh tikah a thoknak ah Pathian a ṭhangṭhat ve cu a si nan Pathian ih ṭhatnak ruangah a thangṭhat silo in a mah ih ṭhatnak ruangah a Pathain a thangṭhat. Pathian ih ṭhatnak sim lo in a mah ih ṭhatnak lawnglawng a sim ciamco. Pathaian a thangṭhat taktak siloin amah le amah a thangṭhat aw sawn reromi a rak si. Cun amah ih ṭhatnak lawng sim men siloin midang ṭhat lo nak khal a rak sim bet lai. Biakinn ah thlacam dingin a ra ve mi siahkhongtu pa kha khihhmuh in ‘khitawk ih a ummi siahkhongtu pa vek ka si lo ruangah ka lo lawm,’ a rak ti. Pathian ih ṭhatnak ruangah Pathian a thangṭhat siloin a mah ih thilṭha a tuahnak pawl ruangah Pathain a thangṭhat, a mah ih ṭhatnak rel hi atawk a ti hrih lo ih midang ṭhat lo nak khal a rel hrih lai. Hihi Farasi pa ih thlacam daan, Farasi pa ih thin lung a si.

          Culaiah siahkhongtu pa cu hla nawn ah a ding ih vanlam hman hoi ngam lo in a ṭaang a cuum aw ih, ‘Maw Pathain, i zangfah hram aw; kei cu misual ka si,’ tiah a ti. Siahkhongtu pa cun Pathian ih thian hlimnak le a mah ih sualnak a thei ih tangdornak thawn Pathian a pan, a zoh hman a ngam lo. Midang ih ṭhat lo nak khal a rel ve lo. Amah le amah lawng te kha misual ka si tiah a ti aw. Cutikah Bawi Jesuh in ziang a ti: ‘fiang tein ka lo sim: Farasi mi pa si lo in siahkhongtu pa sawn kha inn ih a tlun tikah Pathain hmaiah thuding cotu a si. Ziangahtile zokhal amah le amah a khaisang awtu cu namthlak a si dingih tangdortu cu khaisan a si ding,’ a ti.

          Hi thu kan zoh tikah Farasi pa hi a mah ih a sim mi vek in a tuah ngaingai ko ding. Rawl khal a ul ko ding, a ngahmi hmuahhmuah sungin ṭhenhra ih ṭhenkhat khal cu a pek ko ding. A thil tuah mi pawl hi a ṭha zet ko. Asinan a tuah mi thilṭha pawl in mi hngal ah a cang ter. Cun mi zawmtai nak a nei. Farasi mi pawl ih an thuanthu kan zoh tikah mah le mah miṭha bik ih a ruat aw tu pawl an si. Ca pakhat ka siar mi sungah Rabbi tiih an kawh mi Farasi sayapa pakhat ih ngan mi an ti ih, ziangtin a ngan ti sile: ‘Leilung tlun ih minung hmuahhmuah hnak in Farasi 30 hi man kan nei dueh a ti. Pathian in leitlun ah minung 30 lawng miding an um hei ti bang seh la, cu mi 30 sungah keimah le ka fapa cu kan tel hrimhrim ding a ti. Pathian in leitlun ah minung 2 lawng miding an um hei ti seh la, keimah le ka fapa kan si ding a ti. Cun Pathian in miding pakhat lawng rori a um ti seh la kei mah ka si tengteng tin a ngan ti a si. Farasi pawl hi a tlangpi in cu vek thinlung nei pawl an si.

          Siahkhongtu pawl cu kan thei vek in an mah Jew miphun lakah mi sual cazin ih ret a tuar mi pawl an si. Curuangah Bawi Jesuh cu siahkhongtu pawl thawn an um tlang, rawl an ei tlang tikah Farasi pawl in misual pawl thawn an um tlang tiah an phun zai, sual an puh ringring ṭheu. Asinan Bawi Jesuh in a sim mi cu miding pawl hrangah ka ra lo misual pawl hrangah ka ra a ti. Curuangah Bawi Jesuh kan cohlang thei dingah cu siahkhongtu pa ih thlacamnak vek in ‘Bawipa, i zaangfah hram aw; kei cu misual ka si,’ tiah tangdornak thawn thlacam ringring kan ṭul a si.

          Hi tangdornak hi Pathian lawngin a duh si lo in kan mah mi nung pawl khal in kan duh mi a si. Hngal zet in mah le mah sibik vek ih um ṭheu tu pawl hi zo hman in kan duh lo, kan kom duh lo. Tangdornak a neitu cu kan kom duh cio. Cun Pathian ih khai sangnak khal cu minung hnen in a ra tam ṭheu. Tangdornak a neitu pawl cu mi in an duhdawt ih Pathian in a khaisang tik khal ah cu mi a duhdawt tu pawl hmang in a khaisang a si.  Tuni Gospel sungah ‘zokhal amah le amah a khaisang awtu cu namthlak a si dingih tangdortu cu khaisan a si ding,’ tiah Bawipa in a sim vek in kan nih khal Bawipa ih khaisang duhmi kan si theinak ding in tangdornak thinlung thawng a nung thei tu si ding in zuam cio u si. A ngai tu nan zaten Pathian in lo thluasuah hai hram seh.

           Fr. Peter Lal Zin Thang (Hakha Diocese)