Bawipa ih thupek thlunsuaktu St.Joseph

Bawipa ih thupek thlunsuaktu St. Joseph

Bawipa ih thupek thlunsuaktu St Joseph
Thuthangtha sim tu Rev. Fr. Joseph Ro Nei Thang
March 19, 2021. St. Joseph Puai Ni.
Siarding: 2Samuel 7:4-5, 12-14,16; Ps 89:1-2, 3-4, 26+ 28; Rome 4:13, 16-18, 22; Mt 1:16, 18-21, 24

Bawi Khrih ah duhdawt zetmi nu le pa, u le nau pawl, “nan zate hnenah hnangamnak le thinnuamnak um hram seh” tiah thlaza cam phahin cibai ka run lo buk hai. Tuihni cu Vua tikcu caan ih Karlinak, Tlawngkai ni nga ni, 2021 March ni 19 ni asi. March ni 19 cu St Joseph ih puaini asi tla asi. St Joseph ih hmin latu nan zate “Happy feast day” tiah cibai ka run lo buk. St Joseph cu Kawhhran kilkhawitu, lettama pawl humhualtu, innsungsang pawl kilventu tiah Kohhran in rinsan asi ttheu asi. Tuihni ih kan siar tlang ding mi Pathian ttongkam pawl cu 2Samuel 7:4-5, 12-14 le 16 tiang; Ps 89:1-2, 3-4, 26+ 28 pawl; Saam a sawnnak ah “A siangpahrang uknak cu kumkhua in ahmun ding” tiah asi pei; Bible voihnihnak cu Rome 4:13, 16-18, cun 22 tiang; Thuthang ttha ahcun Mt 1:16, 18-21 le 24 pawl ansi pei. Tuihni ih kan ruah khawm tlang dingmi cu “Bawipa ih thupek thlunsuaktu St Joseph” tiah asi pei.
Tuihni ih kan siarmi Thuthang ttha kha siar sal uhsi. Mt 1:16, 18-21 le 24 ah “Jacob ih fapa cu Joseph asiih Joseph cu Mary ih pasal asi, Mary in Messiah timi Jesuh a hring. Jesuh Khrih ih suahnak cu hitin asi. A nu Mary cu Joseph thawn an ham awih an tthit awk hlanah Thlarau Thianghlim thawngin fa ka nei ding ti a thei. A hamtu Joseph cu mittha a si ruangah Mary kha mi hmai ah ningzak ih um ter a duhlo ih an ham awknak cu a thup tein phelh sal a tum. Cumi thu a ruat rero lai ah Bawipa ih vancungmi pakhat cu a hnenah a rung langih “David ih tefasin Joseph, Mary hi na nupi ih tthit dingah ttih hlah. Ziangahtile fa a vunnak hi Thlarau Thianghlim thawngin asi. Amah in Fapa a hring dingih a hmin ah Jesuh tiah na sak pei; ziangahtile a minung pawl kha an sualnak ihsin a run suak ding asi” tiah a ti. Cun Joseph cu a hung tthang ih Bawipa ih vancungmi ih fialmi vekin Mary cu a tthit” tiah asi.
Israel miphun pawlin ham awknak cu phun hnih an nei asi. Mirang ttong in cun engagement timi le betrothal timi pawl ansi. Engagement timi ham awknak cu nu le pa ih tawlrelnak thawn asi ttheu. Nauhak te lai ihsin khatlam le khatlam ih nu le pa pawl an fapa le an fanu te hi ham awk dingah ngaituah sakmi asi. Himi hmun ah fala le tlangval duhdawtnak le ngai awknak a tello. Remlonak pakhatkhat a um ahcun hitin ham awknak cu pelh sal a ttheu asi. Nu le pa tawlrelmi vekin an letkhan asi ahcun kum upat tikah cumi ham awknak cu an nemhnget cih ttheu asi. Betrothal timi ham awknak cu fala le tlangval an si tikah an ngai aw, an duh aw ih ham awknak asi. Cumi ham awknak cu puai tuahnak thawn nemhnget asi ttheu. Cumi ham awknak cu duhdawtnak le ngai awknak a tel ruangah a thu umlo in pelh sal a thei nawnlo. Nunau maw mipa maw an uire asi ahcun an mak awk tiang asi. A thu umlo in mak awk a theih nawnlo. Betrothal ham awknak ah tisa pawl awknak a tel hrihlo nain nupa dinhmun ah an cohlang aw mi asi zo asi. Bawinu Mary le Joseph te ih ham awknak dinhmun tla cu betrothal timi ham awknak asi. An ham awknak cu betrothal dinhmun an rak si zo ih tthit awk ding lawng an bak thlang asi. Himi dinhmun ah Bawinu Mary cu Thlarau Thianghlim ih huham cahnak thawngin naute Jesuh hi a paai asi. St Joseph in a phunphun ruatin donhar in a rak um rero asi. St Joseph cu mittha asi ruangah Bawinu Mary parah buainak tuahlo in a thup tein phelh dingin a tum rero lai ah Bawipa ih vancungmi in a mangah “David ih tefasin Joseph, Mary hi na nupi ih tthit dingah ttih hlah. Ziangahtile fa a vunnak hi Thlarau Thianghlim thawngin asi. Amah in Fapa a hring dingih a hmin ah Jesuh tiah na sak pei; ziangahtile a minung pawl kha an sualnak ihsin a run suak ding asi” tiah ati asi. St Joseph cu Pathian thu ngaitu asi ruangah a ihthat nak ihsin a hung tthang tikah Bawipa ih vancungmi ih fialmi vekin Mary cu a tthit asi tiah Mt 1:24 ah in sim asi.
U le nau pawl, St Joseph cu Pathian thu a ngaitu, Pathian ih thupek a thluntu asi. Pathian ih thupek a thlun ruangah midang pawlih zomtai nak le nautatnak pawl cu ziangtlukin so a tuar ding? Midang pawlih zenhnak le hnihsan nak pawl cu ziangtlukinso a tuar ding asi. A hammi Mary kha mak dingah a rualpi le hoipi pawlin an sawm tengteng ding. Asinain Pathian ih thupek cu ello tein a ttuan suak asi. A ngaingai ahcun St Joseph in Judah pawlih daan vekin thlun hai sehla sualnak a umlo. Nu Mary kha mak dingah le ningzat in ret dingah siseh Puithiam hnattuan 20:10 ih ta vekin Nu Mary cu uire asi tiah tiah lungto thawn denthat thei dingin buainak tuahnak siseh Joseph in a ti thei asi. Cumi cu an daan in a onmi asiih Joseph parah mawhnak a umlo. Joseph cu Judah daan a thlun ringringtu asi fawn. Sihmansehla cumi a thlunmi daan pawl hnakin Pathian ih thupek kha Joseph in a thlun sawn. Amah milai sinak ih duh nak le daan pawl cu Pathian ih duhnak le daan in a neh ter sawn.
Duhdawtmi u le nau pawl, St Joseph in Pathian ih parah ding felnak a nei vekin kannih zumtu pawl tla Pathian ih parah titsa nei ding rengreng kan si asi. Milai kan si vekin kanmahih hrin le hnam daan pawl kan nei ve ih kan thlun lai ah Pathian ih daan a lut asi ahcun Pathian ih daan le duhnak thlun pawl uhsi. Kanmah daan asi ko si, ka fanu cu an pa ih Kohhran ah va feh ko hai seh tiah ol tein on men hlah uhsi. Kanmah daan vekin puai tuah ding kan si ruangah khawm lo in um men ko uhsi ti hlah uhsi. Kanmah daan vekin puai tuah ttul kan siih Bawipa Jesuh ih thihni Thianghlim Tlawngkai ni 5 ni rori hman ulhlo in puai na tuah men maw, na va tel ve maw? Fang-er puai, Dawngpui puai kan tuah ttul si tiah Zarhpini ulh lo in le khawmlo in na um men maw? Vutcam culhni ah ulhnak tuahlo in mahih hrin le hnam puai ah siseh, mopuai ah siseh puai na va zawh men maw, puai na men tuah, sa ei in Catholic Kohhran ih daan buarin na um men maw? Cumi pawl ruat sal in Bawipa le a Kohhran ih thuzirhmi pawl le fialmi pawl thlun ding rori kan si sawn asi.
St Joseph ih puaini ah St Joseph vekin Pathian ih duhnak cu kanmah hrin le hnam ih duhmi hnakin uusaa pekin kan thlun ringring theinak dingah zuam cio uhsi.
Maw Mithianghlim Joseph, Pathian ih thu kan thlun suak ringring theinak dingah kanmah hrangah thla in cam sak hram aw.
Amen.

Add new comment

12 + 4 =