Bawipa ih zonzai tuarnak ah tel ve uhsi (sim tu Rev. Fr. Joseph Ro Nei Thang), March 26, 2021

Bawipa ih zonzai tuarnak ah tel ve uhsi
Thuthangtha sim tu Rev. Fr. Joseph Ro Nei Thang
March 26, 2021

Bawi Khrih ah duhdawt zetmi nu le pa, u le nau pawl, “Nan zate ih hnenah thinnuamnak le hnangamnak pawl cu Bawipa in lo pe hram seh” tiah thla za cam phahin cibai ka run lo buk hai. Tuihni cu Vua tikcu caan Kaar 5 nakih Tlawngkai ni 5 ni, 2021 March ni 26 asi. Tuihni ih kan siar dingmi Pathian ih ttongkam pawl cu Jeremiah 20:10-13 tiang, Saam 18:1-2, 3-4, 5-6 tiang an si pei ih Saam a sawnnak ahcun “Harsatnak ka ton lai ah Bawipa cu ka ko ih ka kawhnak aw cu i thei asi” tiah asi pei. Thuthang ttha ahcun John 10:31-42 tiang asi pei. Tuihni ih kan ruah khawm tlang dingmi cu “Bawipa ih zonzai tuarnak ah tel ve uhsi” tiah asi pei.

Tuihni ih kan siarmi Bible a voikhatnak hi siar sal uhsi, ngai sal uhsi. Jeremiah 20:10-13 tiangah Jeremiah in ‘mi hmuahhmuah in a thupte in in rel. “Khuazakip ah ttihphannak a um; amah hi hnong uhsi, amah hi hnong uhsi’ an ti mi ka thei. Ka ngam zetmi ka rualpi pawl hmanin ka tluk ding cu an hngakhlap asi. ‘Amah hi kan bum thei ko ding. Kan kaih thei ahcun phu kan la ding’ anti. Asinain maw Bawipa, Nang cu keimah lam ah na ttang. Micak le mimaksak nasi. Keimah i hremtu pawl cu an sung ding; kumkhua mualpho in an um ding; ziangtik hmanah an hlawhtling thei lo ding; an ningzahnak cu hngilh ansi nawn lo ding. Cungnungbik Bawipa, nang cun dik tein na hniksak. Mi ruahnak le thinlung sungah ziang a um ti na thei. Curuangah ka ral pawl parih phu na lak cu i hmuter hram aw. Ziangahtile ka thuhla cu na kut sungah ka lo pek asi. Bawipa hnenah hla sa uh! Bawipa cu thangtthat uh! Mi tthalo pawlih kut sung ihsin namnuaimi pawl a run suak asi” tiah asi.

Duhdawtmi u le nau pawl, tu ahhin Bawipa ih zonzai tuarnak le thih tuarnak lamah kan pan rero thlang asi. Hmai Zarhpini ahcun Palm Sunday kan tuah thlang ding. A ngaingai ahcun Vua tikcu caan kar nga nak ihsin Bawipa ih zonzai tuarnak caan ah ka lut zo. Missa sungih kan siarmi Bible pawl, thlacamnak le Preface timi Pathian thangtthatnak pawl ah tla Bawipa ih zonzaih tuarnak thu pawl ansi. Tuihni ah Prophet Jeremiah ih harsat tuarnak thu kan siar asi. Prophet Jeremiah ih harsatnak a tuar daan zia le Messiah Bawipa Jesuh ih a tuarzia pawl hi pehtlaihhnak a um ringring asi. Prophet Jeremiah cu Mirang ttong in “suffering servant of God asilole suffering prophet” tiang kawh a si ttheu. Lai ttong in cun “Prophet Jeremia cu zonzaih rethei a tuar ringringtu Pathian ih siahhlawh asilole zonzaih rethei a tuar ringringtu Prophet” tiah kawh asi. Kan Bawipa Jesuh tla cu zonzai rethei a tuartu Messiah tiah kawh asi. Tuihni ih kan siarmi ah tla prophet Jeremiah in ‘mi hmuahhmuah in a thupte in in rel. “Khuazakip ah ttihphannak a um; amah hi hnong uhsi, amah hi hnong uhsi’ an ti mi ka thei. Ka ngam zetmi ka rualpi pawl hmanin ka tluk ding cu an hngakhlap asi. ‘Amah hi kan bum thei ko ding. Kan kaih thei ahcun phu kan la ding’ anti asi. Cun tuihni kan siarmi ih hlan deuh te Jeremiah 20:1-3 ah Cuih thu pawl ka phuanmi cu biakinn uktu Immer ih fapa puithiam Pashhur in a thei tikah i vuakih thircikcin thawn i khih hnu ah biakinn sung tlunlam Benjamin kotka kiangah i ret. A thaizing ah in khihnak thircikcin cu a phoih ih i thlah tikah a hnenah ‘Bawipa in Pashhur tiah hmin a lo sak lo. Hmin a lo pek ngaingaimi cu khuazakip ah ttihphannak tiah asi’ tiah asi. Prpophet Jeremiah cu hnonnak, vuaknak, thircikcin thawn khihnak, phiarnak, tidai umlonak tikhur sungih hlon tuarnak, hremnak a phunphun a tuar. Asinain prophet Jeremiah in harsatnak a tuar tintein Bawipa hi a ben ringring. Tuihni kan siarmi ah tla ‘maw Bawipa, Nang cu keimah lam ah na ttang. Micak le mimaksak nasi. Keimah i hremtu pawl cu an sung ding; kumkhua mualpho in an um ding; ziangtik hmanah an hlawhtling thei lo ding; an ningzahnak cu hngilh ansi nawn lo ding’ tiah harsatnak kan ton caan ah Bawipa kan pan ttulzia, Bawipa kan ben ttulzia pawl Amah Bawipa ih ttongkham thawn in zirh asi.

U le nau pawl, Bawipa Jesuh a thluntu nang le kei in tla kan zawhmi lamzin cu thinglamtah lamzin asi ti kha thei ringring uhsi. Bawipa Jesuh Khrih in Mt 16:24 ah “Zokhal keimah i thlun duhtu cu amahih duhnak kha taansan in a thing lamtah phurin i thlun seh” tiah in zirh asilo maw? A olmi lamzin zawh men ding kan silo asi. A olmi lamzin kan zawh ngah pang asi ahcun hell kan tla ding asi tiah Bawipa Jesuh in Mt 7:13-14 ah “A fiakmi kotka ihsin lut uh, ziangahtile hell fehnak kotka cu a kau ih a lamzin khal a ol; curuangah a zawhtu khal an tam. Sikhalsehla nunnak sungih luhnak kotka cu a fiakih a fehnak lamzin khal a har; curuangah a thleng suaktu khal mi malte ansi” tiah in zirh. Cumi thinglamtah lamzin zawh duhlo, thinglamtah phur duhlo kan si asi ahcun Jesuh Khrih a thluntu, Christian taktak kan cang thei lo asi; a hmin menmen ih Christian kan si ding asi. Mt 10:38 ah Jesuh in “Zokhal sisehla amahih thinglamtah phur tahratin ka dungih i thlunlotu cu ka minung si dingah a tlaklo asi” tiah fiang zetin in zirh asi. Prophet pawl, Dungthluntu pawl, Tirhthlah pawl, Martyr le Mithianghlim tampi pawlin tla hniksaknak le harsatnak a phunphun tuarin Bawipa ih thinglamtah cu an phur cio asi. Bawipa Jesuh in amah a thluntu zumtu kan si ruangah thinglamtah phurin harsatnak le hremnak kan tuar thei tikah mithluasuah kan si tiah Mt 5:11 ah in zirh asi.

Mithianghlim Peter in zumtu Christian pawl ca a kuat tikah “harsatnak tuar dingah Pathian ih kawhmi nan si, ziangahtile Khrih amah rori in harsatnak nan hrangah a tuarih a keneh nan thlun theinak dingah zohtthim dingin a lo tanta mi asi” tiah 1Peter 2:21 ah in zirh asi. St Paul khalin thinglamtah timi harsatnak thawn pehpar aw in Colose cakuat 1:24 ah “Jesuh Khrih in harsatnak a tthenkhat cu a ruang pumpi asimi Kawhhran hrangah a tanta asi. Curuangah harsatnak ka tuar tin tein Khrih ih in tanta mi kha ka kimter asi” tiah in zirh asi. Cun kannih tla Jesuh Khrih ih harsatnak ah hlawm ve ding, tel ve dingah Pathian in a ttongkam thawn in zirh asi. 2Timothy 2:11-12 ah “Amah thawn kan thi khat ahcun amah thawn kan nung tlang ding. Harsatnak kan tuar khat ahcun amah thawn kan uk tlang ve ding; Amah kan hnon ahcun Annih khalin in hnong ve ding” tiah in zirh. Thinglamtah timi harsatnak kan duhlo ahcun Bawipa hnontu kan si asi ding asi. Thinglamtah le thihnak kan tuar zuamlo, kan duhlo ahcun Peter hnenah Bawipa in “Satan, ka hnen ihsin tlan aw, na ruahnak cu minung ruah daan asi, Pathian ih duh daan thawn a kalh awmi asi” tiah kawk asi. Cun kan tuarnak parah aihram hlah uhsi, siatcam hlah uhsi, phunzai rero hlah uhsi; cuhnak in tuar theinak thazaang cu Bawipa hnenah dil sawn uhsi. Prophet tampi, Martyr tampi, Mithianghlim tampi in harsatnak, hremnak le hnonnak a phunphun an tuar zo. Kannih tla Bawipa thawn kan thinglamtah cu phur khat ringring uhsi, Bawipa thawn harsatnak tuar ringring uhsi. Bawipa thawn kan tuar khat ahcun kan tuarmi le kan phurmi thinglamtah tla a zaang ding asi.
Nan zate parah Pa le Fapa le Thlarau Thianghlim in thluasuah lo pe hram seh. Amen.