Bawipa Na Duhnak Vekin Si Ko Seh

 “Bawipa, Na duhnak vek in si ko seh,”

2019 December 20, (Friday)

Is 7:10-14 / Lk 1:26-38

          RVA a ngai tu Bawi Khrih ah duhdawtmi u le nau pawl, Pathian ih thluasuah taksa, thlarau hrahdamnak le thinlung daihnak pawl cu nan zate hnen ah um ringring hramseh. Tu ni December 20, 2019 ih kan siar ding mi thuthangṭha cu Vancungmi in Bawinu Mary hneh ah rapan in nau a neih nak ding thuthangṭha a thannak thu a si. Thuthangṭha Pathian ih ṭongkam kan ngai tlang hmaisa ta hrih ding in ka lo sawm.

Lk 1:26-38 

26.  Elizabeth ih favun a thlaruknak ah Pathian in vancungmi Gabriel cu Galilee ram Nazareth an timi khua ah a thlah.

27. Siangpahrang David ih tesinfa a si mi Josef thawn ṭhi aw dingih thukamnak a neimi fala hnenah thu pakhat sim ding in a thlah. Cuih fala hmin cu Mari a si.

28. Vancungmi cu a hnen ah a ra ih, “Na parah daihnak um ko seh! Bawipa na hnenah a um ih thlawsuahnak tampi a lo pek a si,” tiah a ti.

29. Cuih vancungmi ih thusimmi a theih tikah Mari cu a don a har ngaingai ih a ṭongmi ih tican cu ziang a si pei tiah khawruahhar in a um.

30. Cule vancungmi in, “Mari, ṭih hlah! Pathian mithmai ṭha na co a si.

31. Fa navun ding ih fapa na hring ding. A hmin ah Jesuh na sak ding.

32. Mi maksak a si ding ih Cugnungbik Pathian in a pu David bangtuk in siangpahrang ah a tuah dingih, 

33. Jacob tesinfa pawl ih  tlunah a kumkhua in singpahrang a si ding. A uknak cu a cem dah lo ding,” tiah a sim.

34. Mari in vancungmi hnenah, “Kei cu fala him ka si. Cubangtuk cu ziangtinso a si thei ding?” tiah a ti.

35. Vancungmi in, “Thlarau Thianghlim cu na hnenah a ra thleng ding ih Cungnungbik ih cahnak huham cu na parah a um ding. Curaungah na hrin dingmi fa cu fapa thainghlim a si ding ih Pathian Fapa tiah kawh a si ding.

36. Na sungkhat Elizabeth kha na thei a si lo maw? Fa a nei thei nawn lo tiah simrelmi a si na’n a tarzet hnuah fa a vun ih atuah thlaruk a si zo.

37. Ziangtin a si tile Pathian ih tuah thei lomi zianghman a um lo,” tiah a ti.

38. Mari in, “Kei cu Bawipa ih salnu ka si. Na sim vek cun ka parah si ko seh,” tiah a ti. Cule vancungmi cun a fehsan. 

(Bawipa ih thuthangṭha a si.)

    Tuni kan siar kan ngai mi thuthangṭha hi minung pawl rundamnak kan ngahnak dingih a hram thoknak a si. Himi sung in Bawinu Mary in ‘na sim vek cun ka parah si ko seh’ a ti mi hi a thu pi zet mi a si. Kan Pathian hi ziangtinkim tuahthiam, tuahthei le thuneihtu a si ko nan kan mah milai pawl ih duh nak tel lo in cun ziangtik hman ah hramhram in thil tuah in fial dah lo. Bawinu Mary khal cu rundamtu naute Jesuh hrin ding ah Pathian ih a cuangce in hril mi nu a si. Sihmansehla cuih Pathain ih hrilnak kha a duh le duh lo cu a mah Bawinu Mary ih thu a si. Vancungmi ih a simmi par ah Bawinu Mary in ‘si ko seh' asilole ‘Amen’ a ti mi hi a sunglawi tuk mi ṭongkam a si. Kan pupa san ih sin minung zate ih kan hngah hlap zet mi rundamnak sangka on nak ṭongkam a si. Kan zate hrang ah lungawi za le Pathain a mah le thuthangṭha a than tu vancungmi hrang khal ah lungawiza zet a si. Evi in Satan pa thu a ngai ih sualnak sung ah kan tla ṭhehnak ding sangka on asi bantuk in Bawinu Mary ih Pathian thu a ngai nak ruangin rundamnak kan co nak ding hrang sangka on a si sal. Bawinu Mary ih minung taksa duh nak silo in Pathian duhnak thlun in “Kei cu Bawipa ih salnu ka si. Na sim vek cun ka parah si ko seh,” a ti thei mi ih ziang tlukin so lungawi za a si. 

         “Bawipa na sim mi vek in si ko seh" asilole “Bawipa na duhnak vek in si ko seh" ti mi ṭong kam hi a thupi tuk vek in a caancaan ah cu thil har zet khal a si. Jew miphun nu nau pakhat hrang ah pasal nei lo in nau vun hi ziang tluk in ṭih a nung ti cu Nu Mary in a thei ko. Sihmansehla a ṭih nak hnak in Pathain a zumnak, Pathain a duhnak a tum sawn, a tam sawn ruang ah ‘Na sim vek cun ka parah si ko seh' a ti thei nak a si. Duhdawt mi nu le pa le u le nau, kan nih khal “Bawipa na duhnak vek in si ko seh" kan ti thei ringring ding ah cu Bawinu Mery vek in kan zum nak a dik a ṭul ding, Bawinu Mery vek in Pathain kan duhdawt taktak ih, kan rinsan taktak a ṭul ding. Ka duhmi, ka tumtah mi, ka ruah mi hnak in Pathain ih duh mi, Pathian in tumtah mi, Pathian ih ruahnak hi a ṭha sawn, a ṭha sawn ringring ti kan pom ngam a ṭul. “Bawipa na duhnak vek in si ko seh" ti mi ṭongkam hi zumnak thawn a thungai in peh tlaih nak a neimi a si ih, “Bawipa na duhnak vek in si ko seh"  kan ti thei nak ding in cu zumnak dik kan nei ṭul. Bawipa Jesuh in thlacam in zirhnak ah siseh, Jesmani hmuan sungih a thlacam nak in siseh “Kapa na duhnak vek in si ko seh" ti ih thla a cam thei tu si ding in in zirh a si. Pathian hnen ah thla kan cam ding, kan duh mi kan sim ding, kan dil ding, sihmanseh la a neta bik ah cu “Bawipa na duhnak vek in si ko seh" a ti thiam tu, a ti thei tu kan si cio thei nak ding in kan zuam tlang pei. Kan zate parah Pathian in thazang thluasuah a thar in in pe cio hram seh. “Bawipa na duhnak vek in si ko seh."  Amen. 

 

Riv. Fr. Peter Lal Zin Thang

Hakha Diocese

 

Add new comment

1 + 9 =