Bawipa nih in kawh tikah (sim tu Rev. Fr. Joseph Ro Nei Thang) June 25, 2021

Bawipa nih in kawh tikah

Thuthangtha sim tu Rev. Fr. Joseph Ro Nei Thang

June 25, 2021

Siarding: Seem 17:9-10, 15-22; Saam 128: 1-5 (4); Matthew 8:1-4.

            Leitlun khuazakip ihsin RVA Falam Chin Service ah thlarau rawl a zawh ringringtu Bawi Khrih ah duhdawt zetmi nu le pa, u le nau pawl, kan Bawipa Jesuh in hnangamnak lo pe hramseh tiah thlaza ka run lo cam sak hai. Tuihni cu 2021, June thla ni 25, Caankel kaar 12 nak, Tlawngkai ni 5 ni asi. Tuihni ih kan siar dingmi pawl cu Seemtirnak 17:9-10, 15-22 tiang le Matthew 8:1-4 tiang pawl tla ansi pei. Tuihni ih kan ruah khawm tlang mi cu “Bawipa nih in kawh tikah” tiah asi pei.

            U le nau pawl, tuihni kan siarmi Bible a voikhatnak ah Pathian in Abram le a nupi Sarai te a kawhnak thu kan thei asi. Pathian in Abram le a nupi a kawh tikah an hmin pawl tla Pathian in a thleng sak asi tiah kan hmu thei. Semtirnak 17:5 ah Pathian in “Na hmin cu Abram si nawnlo in Abraham tiah na si thlang ding, ziangahtile miphun tampi ih pa ah ka lo tuah ding” tiah in asi. Cule Semtirnak 17:15 ah Pathian in Abraham hnenah “Na nupi hi Sarai tiah na ko nawnlo pei; a tu thokin ahmin cu Sarah asi zo” tiah in sim. Sarah timi cu miphun sangmi nupi tiah asilole siangpahrangnu tiah a sullam a um. Curuangah Semtirnak 17:16 ah “A tesinfa pawl sung ihsin siangpahrang tampi an suak ding” tiah kan hmu thei. Curuangah Sarah ih a sullam cu siangpahrangbawinu asi tiah tla kawh thei asi. Bible sungah Pathian Bawipa ih kawhmi pawl kan zoh tikah Abram ihsin Abraham, Sarai ihsin Sarah, Jacob ihsin Israel, Solomon ihsin Jedidiah, Daniel ihsin Belshazzar, Simon ihsin Peter, Saul ihsin Paul, Joseph ihsin Barnabas pawl ansi ih hmin lar deuh pawl ansi; culo a dang tla an um men lai thei. Hitin an hmin pawl an thlennak thawngin Pathian ih pekmi hnattuan hi felfai zetin teimak tiemanak ttuan suak dingah ansi.

            Hmin thar kan nei lawngah Pathian ih hnattuan ttuan ding tiah tla ruat ding kan silo. Prophet pawl siseh, Pupa pawl siseh, Dungthluntu pawl san lai siseh, Pathian ih hnattuantu pawlin hmin thar an nei cuanglo nain Pathian in a hnattuan tu dingah a kawh tikah el lo tein fel tein an ttuan cio asi. Asinain a tu ih hmin thleng mi pawl cu hnattuan menmen ttuan dingah ansilo. Abraham cu Pathian in a hmin a thleng saknak thawngin Abraham cu zumtu pawlih pa ah a cang asi. Jacob tla Pathian in a hmin thar Israel tiah a thleng saknak thawngin Israel miphun tiah a cang asi. Solomon tla a hmin thar Jedidiah tiah Pathian in a peknak thawngin mifimbik ah a cangih Jerusalem biakinnpi saktu ah a cang asi. Cuhlei ah amah sanah remdaihnak a umih tthansonak tla a um asi. Daniel cu Belshazzar tiah Nebuchanezzar siangpahrang bawipa in a peknak thawngin manglehtu hmuah hmuah lakah zohmanin an neh theilo mi mifim ah a cang asi. Simon tla Peter tiah Bawipa Jesuh in a hmin a thleng saknak thawngin Peter cu Jesuh Khrih Kohhran ih Lu ah ah a cang. Jesuh Khrih ih Kawhhran kilkhawitu le hruaitu ah a cang asi. Saul ihsin Paul ah a cang hnu ah Gentile mi pawl hrangah Pathian ih thuthang ttha simtu Tirhthlah ah a cang asi. Pathian in a rundamnak hriamnam ah a hmang asi. Joseph ihsin Barnabas ah a cang hnu ah Paul thawn siseh, John Mark thawn siseh Pathian ih rongbawltu ah a cang asi. 

            Kannih tla Pathian nih in zaangfah ih amah zumtu ah kan cang zo. Pathian in zumnak thluasuah in pek ruangah baptism kan ngah ih Pathian ih fate ah kan cang zo. Pathian in ziangruangah a fate cang dingah in ko ti asi ahcun amah Pathian kan rian theinak dingah asi. Baptism kan ngah lai ah hmin thar kan co vekin Chrisma tha peknak kan ngah lai ah tla hmin thar kan ngah lala. Curuangah kan thianghlim hmin le kan hmin ngaingai thawn Pa thian kha lungawi tein rian ding kan si asi. Ps 100:1-2 “Maw leitlunmi pawl Bawipa hnenah lungawi aipuang in au uh. Bawipa cu lungawi zetin rian uh” tiah in sawm asi. Bawipa ih kawhnak aw cu lungawi le hmaipante in sawn uhsi, awih uhsi. Puithiam kan si tikah, Sister kan si tikah, thusimtu saya kan si tik lawngah Pathian ih hna kan ttuan asilo. Innsang nei khal le Pathian hi rian ding kan si thotho. Innsang neitu pawlin Domestic Church timi maih innsang Kohhran kha uk ding le kilkhawi dingah ttuanvo tumpi kan nei asi ti kha thei ringring uhsi. Cumi cu baptism kan ngahnak thawgin ttuanvo kan neimi asi, ziangahtile 1Peter 2:9 ah “nannih cu hrilcia miphun, siangpahrang ih puithiam, miphun thianghlim, Pathian ih miphun bulce nan si” tiah in ti. 

             Bawipa nih in kawh tikah “kei cu ka no tuk lai e, kei cu ka tar tuk zo e, kei cu ka man ngelcel lo e, kei cu ka farah tuk e, kei cu cycle ka neilo e, kei cu cycle ka mawng thiam lo e, kei cu ka hmel sia tuk e, kei cu ka nu le pa nih in siang ual lo e, kei cu kan pa nih in on lo e, kei cu kan nu nih in sianglo e” tiah a kyaung pyah ding kan si lo. Sianglo ti hnuaihni ding tla kan si lo e. Bawipa nih in kawh tikah prophet Jonah vekin Bawipa ihsin a tlaantu kan si pang maw? Bawipa nih in kawh tikah Adam vekin “Maw Bawipa, na kawhnak aw cu ka thei, lawngfang-kheh ka si ruangah ka ningzak tukih ka relh” tiah kan sawn pei maw? ruat sal uhsi. Cuhnakin Bawipa nih in kawh tikah Prophet Isaiah vekin “Maw Bawipa hinah ka um; keimah i run thlah hram aw” tiah sawn cio uhsi. Bawipa nih in kawh tikah prophet Samuel vekin “Maw Bawipa, hinah ka um, na hna-ttuan dingah a tu ah ka ra” tiah sawn uhsi. Bawipa nih in kawh tikah Abrahham vekin a thukammi ngai in thlun suak uhsi. Bawipa nih in kawh tikah Bawinu Mary vekin “Maw Bawipa, ka simmi vekin ka parah cang ko seh” tiah cohlang thiam uhsi. Bawipa nih in kawh tikah “Bawipa, keimah duhmi vekin silo in na duh vekin si ko seh” tiah sawn uhsi. 

            Bawipa nih a hnattuan dingin in kawh vekin amah thawn nunnuamnak kumkhua in co dingah siseh, cawhkuan tuar dingah siseh, el theilo in in ko lai ding asi. Amah rian dingah in kawh lai ah feltein kan awih lo, a hnattuan kha fel tein kan ttuan lo asi ahcun a voihnihnak in in kawh tikah ningzakza cawhkuannak kan tuar ding asi. Bawipa ih kawhnak parah fel tein kan nung, kan awih, kan ttuan ahcun amah thawn kumkhua in kumkhua tiang kan nuam tata ding asi.

            A ngaitu nan zateih parah pumsa damnak le thlarau damnak Bawipa nih lo pek sehla a kawhnak aw neemte tla awih thei dingin le thlun suak thei dingin Bawipa nih thluasuah malsawm lo pe hram seh. Amen.