Bawipa nih a lo hai

"Bawipa nih a lo hai" (Palm Sunday - April 5)

Siarding: Mt 21: 1-11.

Christu sungih ummi duhdawtmi RVA a ngaitu nu le pa, u le nau pawl, cak le dam in nan rak um cio hai maw? “Thlarau Thianghlim in lo umpi hai sehla, hnangamnak lo pe hram seh” tiah cibai ka run lo buk hai. Tuihni cu 2020, April thla ni 5 ni, Palm Sunday ni asi. Tuihni ih kan siar dingmi cu a hmaisabik ahcun Tthulhfau-hnah pawl thluahsuah peknak hmunih siar dingmi cu Mt 21:1-11 tiang asi pei. Cun Missa raithawinak sungih kan siar dingmi Pathian ih ttongkam pawl cu Isaiah 50:4-7 tiang; Ps hla ahcun bung 22:7-8, 16-17, 18-18, 22-23 pawl ansi pei ih Ps a sawnnak ahcun “Maw ka Pathian, ka Pathian, ziangahso i taansan” tiah asi pei. Siarnak voihnihnak ahcun Philipi cakuat 2:6-11 le Thuthang ttha kan siar dingmi cu Mt 26:14 ihsin 27:66 tiang pawl tla ansi pei. Tuihni kan ruah khawm dingmi cu “Bawipa in a lo a hai” timi kha ruat khawm dingah ka run lo sawm.

Hi Palm Sunday kan tuahnak ah “puaipi pahnih kan tuah asi” ti kha thei cio uhsi. Cumi pawl cu Jesuh Khrih ih sunlawi cohnak le zonzai rethei harsatnak thawn thah a tuarnak ciinkennak pawl kan tuah asi. Jesuh Khrih ih siangpahrang a cannak le sal vekin thah a tuarnak pawl kan vun mang sal pawl ansi. Palm timi cu a ol zawngin tthulhfau kan ti phot men ding. Tthulhfau-hnah ih a sullam cu sunlawi peknak asi. Cumi pawl thawn biakinn heel in Jesuh Khrih ih siangpahrang asinak kha kan thangtthat, kan upat, kan lawm, kan cawimawi, kan sunloih asi. Asinain Missa raithawinak sungih kan siarmi Bible ahcun Jesuh Khrih cu sal hmuahhmuah lakih a niambik sal asi tiah tuihni kan siarmi Bible a voihnihnak ah le Bible a voikhatnak ah tla Prophet Isaiah in thungaimi Bawipa ih siahhlawh tiah thulu bun in kan siar asi. Palm Sunday puai kan tuahnak thawngin Kaar thianghlim kan thok zo asi tinak tla asi. Himi pawl cu kumkhat sungih a thupibikmi kaar asi ruangah kaar thianghlim “Holy week” tiah kan ko asi. Kan rundamnak hrangih a thupibik caan asiih timtuah kan ttul zet asi. 

1995-96 cazirnak kum, Yangon Theology ah kumkhat sung liangluang Bible thawn pehparmi kan rak zir dahmi cu “Jesuh Khrih ih zonzai rethei tuarnak, a thihnak, a thawhsalnak le vancungah sunlawinak thawn a kainak” thu pawl lawng kan zir asi. Ziangahso kumkhat liangluang lawmmam rei in zir a ttul asi ti ahcun himi cu Ca Thianghlim ih a thupibikmi asi ruangah asi. Himi cu Mirang ttong in the “Heart of the Scriptures” tiah asi. 

Tuihni ahcun Bawipa ih zonzai reithei harsatnak pawl le a thihnak pawl kha ruat hrih loin himi pawl cu Thianghlim Tlawngkai ningani hrangah ret phot uhsi. Kan ruah khawm dingmi cu Bawipa Jesuh in Jerusalem khawpi sungah sunglawi zetin a luhnak thu pawl kan ruat pei. Hosanna ti lam pang pawl kha kan ruat tlang pei uh. 

Bawipa Jesuh cu Jerusalem khawpi sungah sunglawi zetin a lut theinak dingah laak a ttul asi. Jesuh in dungthluntu pahnih cu “nan hmai khua ah va feh uhla laakpi an hrenmi a faate thawn nan hmu lohli ding. A hri phoih uhla ka hnenah rak hruai uh. Mi in ‘ ziangahso nan hruai’ an lo tile ‘Bawipa in a ttul’ va ti uh. Cuticun hmakhatte ah an lo thlah ko ding” tiin a cah asi tiah Falam ttong ih lehmi Mt 21:2-3 ah kan hmu thei. Mirang Bible hrek khat ahcun “the Master needs them and will send them back directly” tiah tla an letmi kan hmu thei. Kan falam ttong ih cumi cekci kan let asile “Bawipa in a hai asi, reilote ah a ko khirh sal ding” tiah leh thei asi. Ti duhnak cu “Bawipa in a ttul ruangah laak cu a hmang ta sung ding, himdam tein reilo ah a lo aap sal ding, phang hlah aw” ti duhnak asi. A ngaingai ahcun lei le van cu Bawipa ih ta a rak si thluh. Ps 50:10-11 “Ziangahtile hram lakih ramsa hmuahhmuah cu ka ta ansiih siar cawklo tlangpar ih ttilva pawl khal ka ta ansi. Vate le hram lakih a nungmi hmuahhmuah khal ka ta ansi ttheh” tiah asi. Bawipa ih ta a simi cu Bawipa in amah duhduh in a hmang thei asi. Kannih cu a kilkhawitu lawng kan si ti kha thei uhsi. Asinain Bawipa in laak kiltupa ih siannak asimi riannak kha a duh asi. Kanmah pakhat cio pakhat cio ih Bawipa riannak cu a tui san khalah Bawipa nih a duh thotho asi. Asile nitin kan nunnak ah Bawipa hrangah ziangso kan pe? Laak kilkhawitupa in Bawipa ih hrangah siannak tumpi thawn a laak a pek. Nang le kei teh Bawipa ih hrangah ziangso kan pek? Bawipa in na neihmi ti le rawl, hram lakih na ttilva, inn zuatmi na ttilva, na sui le ngun pawl, na cycle le motor pawl a hailo men thei. Asinain Bawipa in a ram tthansonak dingah nang le kei cu in hai ringring, in ttul ringring asi. Bawipa Jesuh in Jerusalem khawpi luhnak dingah laak a hai. Bawipa Jesuh in kumkhua Jerusalem khawpi asimi vancungram luhnak dingah nang le kei in hai asi. Nang le kei lawng silo in minung hmuahhmuah pawl thawn kumkhua Jerusalem khawpi ah luh dingin nang le kei in ttuanvo kan nei. Bawipa ih ttulnak cu kan duh le kan el thei, kan duh le kan letkhaan thei. Kan thei ttul zetmi cu “Bawipa ih dilmi kha kan sianglo, kan pe lo asi ahcun Bawipa khalin a khawpi asimi Jerusalem khawpi thar luhnak dingah in siang ve lo ding. Bawipa ih dilmi kha siang zetin kan pe asi ahcun Bawipa khalin kumkhua Jerusalem khawpi ah nang le kei tla luh in on ve ding, in siang ve ding asi.” Bawipa rian ta lo in Bawipa hnen ihsin thluasuah kan co theilo ding asi ti duhnak asi. Ca Thianghlim in “ngahlam hnakin peklam cu thluasuah a um sawn” tiah Tirhthlah 20:35 ah in zirh asi kha. Bawipa ih hrangah siannak le na thazaang pawl kha hri in na ttem lai maw? Na ttem lai asile zamrang zetin na sianlonak hri pawl kha phoih thluh thlang aw. 

Luka ih nganmi thuthang ttha sung ahcun laak neitu pa in laak kha siang in a pek vekin mipi pawl khalin Bawipa ih ratnak ding hrangah an puan pawl tla lamzin parah an phah. Cule a tlunah Bawipa an feh terih Bawipa kha an thangtthat ciamco asi tiah Luka 19:36-37 ah kan hmu thei. Farasi pawlin Bawipa thangtthattu mipi pawl kha daiter dingin thangtthatnak a ngahtu Bawipa kha an ti tikah Luka 19:40 ah Bawipa in “Fiangtein ka lo sim: Annih pawl daitein an um asile hi lungto pawl hi an hung au ciamco ding asi” tiah a ti asi. 

Bawipa hrangah siannak tumpi thawn hnattuan ringring uhsi. Kan thazaang, kan tikcu caan, kan fimnak le thiamnak pawl, kan neimi thilri pawl le sum le pai pawl hi amah Bawipa hrangah hmang ttheu uhsi. Kan siangphrang Bawipa hnenah hosanna pek cio uhsi. Lungto pawl auter lo in kanmah rori in Bawipa cu thangtthat uhsi.

+ Bawipa in Amah thangtthat theinak le amah rian thei theinak thazaang in run pe hram seh. Amen.