Bawipa a rat salnak ni kan hngak tikah

Bawipa a rat salnak ni kan hngak tikah

33^rd Sunday of the Year (17. 11. 2019)

1^st Reading – Malachi 3:19-20

Ps 97 – The Lord comes to rule the peoples with fairness.

2^nd Reading – Thessalonians 3:7-12

Gospel – 21:5-19

            Bawi Khrih ah duhdawtmi u le nau pawl, Bawipa ih daihnak cu nan hnen ah um sehla taksa damnak le thinlung nuamnak Pathian in lo pe cio hram seh tiah a hmaisa bik ah thlacam sak phah in cibai ka lo buk hai. Tuni 2019 Nov 17 ni hi zarhkel zarhpi ni vei 33 nak a si ih hmai zarh zarhpi ni cu “Christ the King” Jesuh Siangpahrang puai ni a si. kan mah biaknak daan lam in kan zoh asile cuih ni cu kum a cemnak zarhpi ni khal a si. Jesuh Siangpahrang puai ni a sivek in Falam kan RC biakinnpi ih puai in khal a si.

            Tuni kan siar ding mi Bible: Pathian ṭongkam pawl cu a vei khat siarnak ah Malachi 3:19-20 tiang a si ih Bible an ngan daan a bang lo mi a um ruangah Bible hrek khatah cun Malachi 4:1-2 ting a si ih “Bawipa a rat nak ni caan a nai zo” ti mi thu in sim. Bawipa a rat tik ah cun mi puarthau le mi ṭha lo pawl cu fangkung ro asilole hnawm vek in ur an si leh ding ih Pathian a ṭih zah tu pawl par ah cun damnak pe tu ni tleu a tlang ter ding asi.

           -Saam hla cu Saam hla no. 98 sung ta a si ih cuih sung ah cun “Bawipa in a minung pawl dikfel nak thawn uk ding in a ra ding thu in sim ih a mah kha thangṭhat le lawm cio ding in in sawm.

Bawipa ih mi uk daan cu a dik, a fel ih mi thleidan tivek, bawi le mi nauta tivek, milian le mi farah tivekin mi mit hmai zoh a nei lo. Miṭha a si le a ṭhatnak vek in miṭhalo a si le a ṭhat lo nak vek in thu a tan leh ding ih ziang vek mi phun le ziangvek din hmun kan si khal le kan tuh mi vek in kan at leh ding a si.

           -A vei hnin siarnak Pathian ṭongkam cu Thesalon kuat 2 nak 3:7-12 tiang a si ih “Bawipa a rat sal ding ni kha kan hngak tik ah zaangzel lo te in hnaṭuan zuam zet in hngak ding kan si” ti in forh, in zirh a si. A caan caan ah Bawipa rat nak caan a nai zo tin mi hrek khat cu Bawipa rat ding lawng kha hngak in hnaṭuan a ṭul lo tin zianghman ṭuan lo in a hngak men khal kan um thei ṭheu.  “Na nuncan ziaza kha thaisun ah thi ding vek in nung aw la hna naṭuan tik ah tun hnu kum zakhat lai nung ding vek in hnaṭuan aw” tin an ti ṭheu vek in tuni, thaisun hi ka hrangah netabik caan a si thei ti ruat in nuncan ziaza ṭhate ih a nung thei tu si ding kan zuam a ṭul ih hnakan ṭuan tik ah cun kum tampi hrang ruat in hna kan ṭuan a ṭul. Cun Christian pawl kan nun kuasaknak ah thlacam le hnaṭuan hi ṭhen a theih lo mi a si. Bawipa a rat sal ding caan kan hngak tik ah thlacam phah ih hngak ding kan si vek in hnaṭuan phan in khal hngak ding kan si. Thlacam lo in hnaṭuan lawng hi a famkim lo vek in hnaṭuannak tel lo in thlacamnak pakhat lawng khal cu a famkim lo a si. Curuangah thlacam phah in le hnaṭuan phah in Bawipa a rat sal ding tik cu caan kha kan hngak a ṭul.

            Tuni kan siar ding mi Jesuh Khrih ih thuthangṭha cu Lk 21:5-19 ting a si ih “Bawipa in a rat sal nak ding thu, lei tlun a cemnak ding thu a sim. Cuih caan a thlen hlan ah ṭihnungza le harsat nak phunkim a thleng ding thu pawl, mi ih bumnak tuar lo nak ding in ral ring te ih um dingin in cah ih a mah a thlun tu pawl hremnak an tuar ding mi thu pawl khal in sim cia. Cu ti vek ih harnak hremnak a thlen tik ah tih lo le beidong lo te in a net nak tiang fek zet in kan ding thei nak ding in khal thu in cah a si. Hi mi pawl lak sung ih sin tuni ah a cuangcein ka sim duh mi pakhat te cu Lk 21:8 – Mi in an lo bum thei lonak dingah ralring uh; mi tampi ka hmin in an ra ding ih ‘keimah hi Amah cu ka si,’ tiin le ‘a tikcu a kim zo,’ tiah an sim ding. Sikhalsehla va thlun hlah uh.” tiin  Bawi Jesuh in in cah a si. Lei tlun ah kan zoh tik ah a sit hnak in a ṭuh pawl hi a mawi sawn a ṭha sawn a bang mi tam pi kan hmu thei. Cun a ṭuh le a sit kan thei hman ah a ṭuh hi a man a awl deuh a si lo le ngah a ol deuh ih mi tam pi in a ṭuh kha kan hril men tivek khal a um lala. Sihmahsehla a ṭuh cu a sit hnak in a ṭhasawn a bang, asilole a ol sawn, a mawisawn hman seh la a sit cu ziang tik hman ah a ban thei lo a tluk thei dah lo. A sit cu a sit a si ih a ṭuh cu aṭuh a si mei. Tun san lawng si lo in hlan lai ih sin thok in kan zumnak  lam khal ah aṭuh hi a um ringring. A caan caan ah a par ih kan sim zo vek in a ṭuh hi a hmaan sawn vek a bang theu. Asilole a ṭuh hi a sit hnak in a nuamsawn, a ol sawn ih  a ṭuh a cawngya tu pawl hi an thiam sawnṭheu tik ah minung tampi bumnak an tong ṭheu a si. Curuangah kan ralring cio pei ti ah ka lo forh duh hai a si.

            Tuni ih kan siar mi Bible pawl kan zoh ṭheh tik ah Bawipa ih rat salnak thu asilole caan cemnak thu, cule Bawipa rat sal nak ni caan kha ziang tin kan hngak pei ti kan thei a si. Pathian ih ṭongkam Bible kan zoh tik ah caan cu a nai ngaingai ti kan thei ih a ni cekci cu zohman in kan thei lo ti kal kan thei. Curuang ah a tik cu le caan kan thei lo ruang ah kan nih ih kan tuah ding mi cu Bawipa ih a ratsalnak ding ni kan hngak tik ah ralring te in thlacam phah le hnaṭuan phah in kan hngak ding hi a si ti lo forh phah in ka bang ta hrih ding. A ngaitu nan zate parh ah ka lung awi. Pathian in a thar in lo thluasuah hramseh. Amen.

Rev. Fr. Peter Lal Zin Thang

Hakha Diocese.