Bawipa a rat tikah kan theithiam pei maw (sim tu Rev. Fr. Peter Zin), December 12, 2020

“Bawipa a rat tikah kan Theithiam pei maw?”

Thuthangtha sim tu Rev. Fr. Peter Lal Zin Thang

December 12, 2020.

“Elijah cu a ra thleng zo ih mi in zo a si, ti an theih lo ruangah an duhtawk in an tuahsiat a si. Cuvek thotho in Milai Fapa khal hi an tuahsia ve ding.”

            Bawi Khriah ah duhdawtmi nu le pa, u le nau pawl, nan dam cio maw? Nan umnak cio ah Pathian in lo kilkhawi hia seh la nan hnenah hnangam daihnak um ringring hram seh. Tuni December 12, 2020 (Zarhte ni) ah kan siar ding mi Bible Cathinghlim pawl thawn pehpar in “Bawipa a rat tikah kan theithaim pei maw?” timi kan ruat tlang ding in ka lo sawm duh. Kan siar dingmi Bible pawl catlang pawl cu veikhat siarnak ah Sirach 48:1-4, 9-11 tiang asi ih Elijah ih a hnaṭuannak, a thuhla pawl a tawi zong in kan hmu thei. Gospel kan siar dingmi cu Matthai 17: 9a, 10-13 tiang a si i kan ngai tlang ta hrih pei. 

Matthai 17:9a, 10-13

^9aTlangpar ihsin an rung ṭum tikah, ¹⁰dungthluntu pawl in Jesuh cu, “Ziangahso Daanthiam pawl in Elijah a ra hmaisa ding tiah an ti?” tiah an sut. ¹¹Jesuh in, “Elijah cu a ra hmaisa taktak dingih ziang hmuahhmuah amah in a rak timtuah cia ding a si. ¹²Asinan ka lo sim: Elijah cu a ra thleng zo ih mi in zo a si, ti an theih lo ruangah an duhtawk in an tuahsiat a si. Cuvek thotho in Milai Fapa khal hi an tuahsia ve ding,” a ti. ¹³Cutikah dungthluntu pawl in a simmi hi baptisma petu Johan ih thuhla a si, ti kha an theithiam.

(Bawipa ih thuthangṭha a si.)

           Vei khat lai ah khua pakhat ah an khua ah siangbawipa a thleng ding tiah thu an thei ih cuih siangbawipa hmuak dingah an timtuah aw ih an hmuak, an hngak. Siangbawipa a ra tikah saya pakhat thawn an ra. Khua an thleng tikah mipi in siangbawipa kha tampi biak lem lo in sayapa sawn kha thupi deuh in an cibai, a thilri phurmi an sawng ih upat zet in ṭha deuh in an biak an hmuak ciamco ti asi. Mipi in cu a thupi bik ah siangbawipa hmuak dingin cu an tim tuah, apoinak cu zohman in siangbawipa hi ziangvek a si, a hmel ziang vek a si ti an thei lo, an hmu dah lo. Sayapa cu siangbawipa hnakin piang deuh, zohmawi deuh in le ṭha deuh in thuam aw in a um ih siangbawipa cu kawlṭongin phit-ta-lu an timi vek in a thuam aw ih curaungah an thei sual nak a si an ti. Sayapa kha siangbawipa sawn ah an ruat. Sim duh mi cu a caancaan ah kan tong duh zet mi, kan hmu duh zet mi asilole kan thei duh zet mi tikvek pawl hi kan mah ruah nak vek in a ra lo, a thleng lo tik ah a tik cu caan a kim ngaingai tik ah kan thei lo caan a rak um thei ṭheu. Kan hmuak mi pa hi ziang vek a si, kan hmu duh mi pa hi zo a si ih ziang vek in a ra ding, asilole ziangvek in a ra thei tivek pawl kan thei lo asile asilole kanmah ruahnak vek in asi ding ti lawng in kan ruat a si le kan hmuak mi pa a ra ngai ngai tik ah kan thei lo men thei.

           Messiah a rat hlan ah Elijah a ra sal ding nak thu hla hi Bible hlun sungah kan hmu thei i Daanthiam pawl in an sim ṭheu mi khal a si. Malakhi 4:5 nak ah, ‘a maksakmi le ṭihnungza a simi Bawipa ih ni a ra thlen hlanah nan hnen ah profet Elijah ka run thlah ding,’ a ti. Cun Elijah cu ziang hrangah thlah a si ding tisi le Malakhi 4:6 nak ah, ‘amah in pa le faale pawl hmunkhat ah a finkhawmsal ding,’ ati. Hitin Bible hlun ah Elijah a rat sal nak ding thuhla a um ruangah Daanthiam pawl in himi thu an sim ṭheu ih tuni kan siarmi Gospel sung khal ah dungthluntu pawl in Bawi Jesuh kha “Ziangahso Daanthiam pawl in Elijah a ra hmaisa ding tiah an ti?” tiah an sut nak a si.  Bawi Jesuh nih , ‘Elijah cu a ra thleng zo ih mi in zo a si, ti an theih lo ruangah an duhtawk in an tuahsiat a si,’ a ti. Jew upa pawl in Elijah a ra ding cu an thei, an hngak hlap zet ko nan a ra thleng ngaingai tik ah ziang vek in a ra ti kha an thei thei lo. Bawi Jesuh in Elijah a ra zo a titikah hlan lia ih a um dah mi Elijah a mah vek cek ci rori in a ra sal mi silo in Elijah ih hnaṭuanan, a ra ding ti ih a simmi kha Johan hnen ah a kim nak sawn kha a si. Elijah a ra hmaisa ding tiah Bible in a sim mi cu a fam kim ko, a sinan minung pawl ih ruah nak vek si lo in, Elijah a rasal ding ih a tuah ding mi pawl kha Pathian in Johan hmang in a rak kim ter a si.

           Cun Bawi Jesuh in ‘Elijah cu a ra thleng zo ih mi in zo a si, ti an theih lo ruangah an duhtawk in an tuahsiat a si,’ tin a sim ṭheh hnu ah ‘cuvek thotho in Milai Fapa khal hi an tuahsia ve ding,’ tiah a sim bet. Jew miphun pawl ih an hngak hlap bik mi cu Messiah a rat nak ding hi a si. Asinan Elijah a rat salnak an  thei lo vek in Messiah a rat nak khal an thei cuang lo ih misual that in an that ta. An hngak hlap zet, an tong duh zet na in a ra ngaingai tikah an thei lo. Ziangruangah an thei lo ti sile an ruat nak vekin a ra lo ruangah asi.

           Kannih khal tu caan hi Bawipa a ratnak ding hrangah mah le mah a tim tuah rero tu, Bawipa hmuak dingah a tim tuah rero tu a hngak rero tu kan si. A ra ngaingai tikah kan thei pei maw? Kan Bawipa hi kan ruah nak vek si lo in kan hnen ah ar thleng pang pei maw? Kan ruah nak vek si lo in a phun dang zet in a ra pang le teh kan thei thiam pei maw? Kan thei lo sungah in liam san ta lo ding an ziang tin kan ral ring pei? Chriatian pawl kan nunnak ah a thupi bik mi cu ‘duhdawtnak’ hi a si. Duhdawtnak kan nei sung poh cu Bawipa kan tong ngah thei ringring ding a si. Kan thei vek in duhdawtnak kan ti tikah Pathian kan duhdawtnak le pakhat le pakhat kan duhdawt awnak pawl asi ih, Pathian le pakhat le pakhat duhdawtnak thawn a kalh aw mi leitlun nuamnak lam sawn in Chrismas ah nuamnak hawl tu si lo in Pathian duhnak vek in nuamnak a hawl thei tu si ding in zuam cio uh si. 

          Leitlun nuamnak lam lawng ruat in Chrismas puai tuah kan tum a si le  cu kan hmuak duh zet mi kan Bawipa kan tong ngah lo pang ding. Kan Bawipa cu mifarah, miharsa le bawmnak a ṭulmi pakhatkhat vek in khal kan hnen ah ra thei. Bawipa kan hnen ih a rat tikah kan thei lo sual pang lonak dingah pakhat le pakhat duh dawtnak thawn bawm aw in kan nun khua sak cio uh si.

Fr. Peter Lal Zin Thang (Hakha Diocese)