Bawipa a tello ahcun (sim tu Rev. Fr. Joseph Ro Nei Thang), April 9, 2021.

Bawipa a tello ahcun

Thuthangtha sim tu Rev. Fr. Joseph Ro Nei Thang

April 9, 2021 (Thosal zarh ninga ni)

Siarding: Tirhthlah 4:1-12; John 21:1-14

          Leitlun hmun tinkip ihsin RVA Falam Chin Service ah thlarau rawl a zawh ringringtu Bawi Khrih ah duhdawt zetmi nu le pa, u le nau pawl, Thosal Jesuh Khrih hmin in nan zaten cibai ka run lo buk hai. Thosal Jesuh in hnangamnak lo pe ringring hram seh’ tiah nan zate hrangah thlaza ka run lo cam sak hai. Tuihni cu Paska puai sung Tlawngkai ni 5 ni asi. Kan Kohhran daan vekin Thosal puaipi cu nikhat lawng kan tuah lo. Rawl ei khawmnak thawn cun nikhat lawng asi men thei nain Sacrament thawn ahcun ni 8 sung kan tuah ttheu asi. Tuihni ih kan siar ding mi Pathian ih ttongkam pawl cu Tirhthlah 4:1-12 tiang le John 21:1-14 tiang pawl ansi pei. Tuihni ih kan ruah khawm tlang dingmi cu “Bawipa a tello ahcun” tiah asi pei.

          U le nau pawl, Tuihni kan siarmi Thuthang ttha ahcun dungthluntu pawl hnenah thosal Jesuh Khrih a langnak thu kan siar asi. Himi hmunah Simon Peter, Thomas, Nathanael, James, John le a dang dungthluntu pahnih pawl hi an ton aw khawmih Peter in “kei cu sur ka vorh ding” tiah ati. Midang pawl khalin “kannih tla kan lo thlun ve ding” tiah anti fingfing. Zan varin sur an vorh rero nain zianghman an ngah lo. Khua a hung vang tikah Jesuh cu tikapte ah a ding, asinain Jesuh asilam kha an thei thiamlo. Jesuh in “fale pawl ziangtal nan ngah maw?” tiah a sutih annih in “zianghman kan ngahlo” tiah an let. Jesuh in “nan lawng ih vorhlam kamah khan nan sur hei vorh uhla malte tal nan ngah ding” tiah ati. Cutin cun an sur cu an hei vorh ngaingai tikah ngan tamzet an awkih an sur hman an dir thei nawnlo. Simon Peter cu lawng sungah a hung kai ih nga tumpipi a khatmi sur cu tikap ah a dirh. Nga cu 153 ansi. Cutluk in an tam nain sur cu a tleklo asi. Himi cu Jesuh thihnak ihsin a thawh hnu ah dungthluntu pawl hnen ah a langnak voithumnak asi tiah John 21 sungah kan hmu thei asi. 

          U le nau pawl, Moses ih thuanthu kan ruat sal hrih pei uh. Kan thei cia vekin Moses cu Levi hrinsor asiih Egypt siangpahrang Faro ih fanu in a cawm asi. Tirhthlah 7:22-23 ah ‘Moses cu Egypt mi ih fimnak hmuahhmuah a zir thluhih a ttongkam le a tuahnak in mi nasazet asi ti a langter. Cun a kum 40 a ti tikah a phunpi Israel mi pawl ziangbangtuk in an nung, hmu duhah a leng’ tiah kan hmu. Ti duhnak cu Moses in kum 40 sung Egypt mi pawlih fimthiamnak hmuahhmuah a zir thluhih ttongkam in siseh, a tuahnak in siseh raltthatnak thawn a khat asi. Fimthiamnak thawn a khahmi Moses, raltthatnak thawn a khahmi Moses ah a cang asi.  

          Moses cu a phunpi pawl a va zoh tikah a phunpi Israel mi pakhat cu Egypt mi pakhat in a rak hrem kha a hmu tikah a phunpi lamah a ttangih Egypt pa cu a that mai. A thaisun ah a phunpi mi 2 kha an buai ruangah remte in um dingin Moses in a fial tikah pakhat pa in ‘Zo in so kan tlunah uktu le thutthentu ah a lo tuah, mizan ih Egypt pa na thah vekin thah ve i duh maw si?’ tiah ati. Cumi cu Moses in a thei tikah a thup tein thil a tuahmi kha a tu ahcun a lang zo tiah a ruatih Midian ram ah a va tlanih an puithiam Jethro hnenah a ben asi. Neta ahcun Jethro ih fanu thawn an tthit awkih fapa pahnih a nei asi.

          Tirhthlah 7:30-35 ah Kum 40 a liam hnu ah Sinai tlang kiangih ramtthing ah hram bur alh sung ihsin Moses hnenah vancungmi pakhat a rung lang. Harmbur sung ihsin Bawipa in Moses kha “Keimah cu nan pupa pawlih Pathian, Abraham ih Pathian, Isaac ih Pathian, Jacob ih Pathian ka si; na kedam phuak aw, ziangtile himi hmun cu hmun thianghlim asi. Egypt ramih ka minung pawl an tuarmi le an zonzaihnak ka hmu. An aihramnak aw cu ka thei ih anmah run dingah ka lo thlah ding’ tiah ati.  Ti duhnak cu Moses kum 80 a kim tikah Pathian in a miphun pawl luattertu si dingah a ko asi. A kawh tik khalah Moses in minung daan vekin “ka ti thei lo ding, ka ttong thiamlo pi, ka phunpi pawlin ziangtinso in zum ding, ziangtinso ka thusimi in awi ding?” tiah a phunphun in a ti asi. A ngaingai ahcun Moses cu Egypt miphun pawlih fimthiamnak hmuahhmuah a zir dahtu asi, ttongkam le thil ti theinak ral tthatnak thawn a khahmi a silo maw? A tuh ahcun a ttih thlang! Asi, Bawipa a tello ahcun zianghman kan santlai theilo ti kha fiang zetin kan hmu thei thlang asi lo maw? Bawipa in a um pi lawngah Moses cu raltthatnak a ngahih a phunpi Israel miphun pawl kha kum sawmli sung hniksaknak tampi tuarin a hruai thei. Moses bawmtu Joshua hi Bawipa in a umpi ruangah, Bawipa in a ttanpi ruangah ral pawl neh ko tiangin a do thei, ni le thlapi hmanin a thupekmi an ngai ih an cawl asi tiah Josuah 10:12-13 ah kan hmu thei.  

          U le nau pawl, Bawipa nih in ttanpi lo le in umpi lo ahcun zianghman kan si lo, zianghman kan santlai theilo zia cu Bible ah siseh, Mithianghlim pawlih thuanthu ah siseh, rel cawklo in kan hmu thei asi. Tuihni kan siarmi Thuthang ttha ah tla cun Thosaltu Bawipa Jesuh in Dungthluntu pawlih hnattuannak ah a telpi lo ruangah zanvar sur an vorh nain zianghman an ngahlo. Bawipa Jesuh in sur vorhnak hmun a sim lawngah le Bawipa in a umpi lawngah nga tampi an ngah asi. A ngaingai ahcun Dungthluntu pawl cu nga kai in pumcawmtu pawl ansi. Annih in khuimi tawkah nga a um ding ti an thei ringring. Asinain Bawipa Jesuh cu nga kai in pumcawmtu a rak si dahlo. Bawipa Jesuh cu lettamaa timi kutthiam hnattuan thawn pumcawmtu a rak si dah asi.

          Kan thei a ttul zetmi thu pakhat cu Dungthluntu pawlih thungainak hi asi. A ngaingai ah Dungthluntu pawlin a tu thupektu hi zo asi ti tla an thei cuanglo; Bawipa asi ti an theilo. Asinain el lo tein an sur cu an hei vorh ih nga tampi an awk asi. An hnattuannak ah Bawipa in a telpi ruangah, Bawipa in a umpi ruangah, Bawipa in thluasuah a pek ruangah an hnattuanmi hi an hawhtling asi. 

          Kannih tla kan hnattuannak tinkip ah le kan tonmi thil hmuahhmuah lakah Bawipa nih in umpi, Bawipa nih in telpi ahcun hlawhtlinnak le hnangamnak le nehnak kan ngah ding asi. Dungthluntu pawl hi Bawipa in a telpilo, a umpilo ahcun nga an kai theilo vekin kannih tla Bawipa nih in umpi lo ahcun zianghman kan si theilo. Bawipa nih in telpi lo ahcun thlisia a hran lai ih in bawm dingah a ratmi Bawipa tla muthla vekin kan hmu ding. Bawipa a tello ahcun kan nun sungih harsatnak pawl tla a karh sinsin ding. Bawipa nih in telpi lo ahcun do dingmi ral pawl tla a rak tam sinsin vekin kan hmu ding. Bawipa in dungthluntu pawl a telpi lo ahcun dungthluntu pawlih nga kainak sur pawl tla a tlek thluh ding asi. Emmanuel Bawipa nih in umpi lo ahcun Bawipa ih din suakmi a Kohhranpi tla tuihni tiang a hmun theilo ding, a tlek thluh ding asi. 

          Maw Bawipa, kan harsat caan le kan vansanglam caan ah a hleice in in run umpi hram aw. Nangmahih thupekmi pawl kan ngai, kan thlun theinak dingah le kan zumnak a fek sinsin theinak dingah maw Bawipa in run umpi hram aw. Amen.