Bawipa A Tho Sal Zo, Alleluia Alleluia! (Easter Sunday)

Bawipa A Tho Sal Zo, Alleluia Alleluia!

Rev. Fr. David Mangte ih thuthangtha sim mi (April 12, 2020 - Thosal ni) Easter Sunday

Lk. 24: 13-35

¹³Cuih ni thotho ah Jesuh a rak thluntu mi pahnih cu Jerusalem ihsin peng sarih hrawng a hlami Emmaus timi khua ah an feh.

¹⁴Cule tubaite ih thil a cangmi pawl cu an ruah aw vivo.

¹⁵Cutiin an ṭong ih an relkhawm rero laiah cun Jesuh amah rori in a hun fuuk hai ih an feh tlang.

¹⁶Amah cu an hmu nain an thei thiam lo.

¹⁷Jesuh in an hnenah, “Nan feh phahah ziang thu so nan rel rero?” tiah a sut. Cule an riahsia mithmai thawn an ding.

¹⁸Pakhat pa, Kleopas an timi pa in, “Jerusalem khua a ra tlawngtu mi hmuahhmuah lakah nangmah lawng hi maw tuih ni hnih thum sungah Jerusalem khawsungih thil a cangmi pawl a thei lotu hi na si?” tiah a ti.

¹⁹Anih in, “Ziang thil maw?” tiah a sut. Annih in, “Nazareth Jesuh parih thil a cangmi pawl!” tiah an let. “Himi pa cu Pathian hmai le miseenpi hmaiah zozo khal in profet a si ih a ṭongmi ah siseh, a tuahmi ah siseh, huham a nei ngaingai tiih an ruah ṭhehmi a si.

²⁰Kan puithiam upa pawl le in hotu pawl in a thihnak rel dingah mi kut ah an pek ih cuticun thinglamtah parah an that.

²¹Cule amah cu Israel mi tlentu a si ding, tiah ruahsannak kan rak neih zetmi a si. Cuih tlunah cubangtuk thil a can hnu tuih ni hi a ni thumnak ni a si.

²²Kan lakih nunau ṭhenkhat in kan mang in bangter fawn; tuihzing zingthlapit ah thlaan ah an va feh;

²³a sinain a ruak an va hmu lo. An ra kir ih ‘Vancungmi kan hmu ih Anih cu a nungsal zo, tiah in sim,’ tiah an ti.

²⁴Kan lakih mi ṭhenkhat thlaanah an va feh ve ih nunau pawl sim vek cekci in an va hmu ve; a sinain amah cu an hmu thotho lo,” tiah an ti.

²⁵Cule Jesuh cun an hnenah, “Nannih hi nan va aa so! Profet pawlih an rak sim ciami nan va zum har lawmmam so!

²⁶Messiah hrangah hi thil pawl hmuahhmuah hi a tuarta ṭheh hnuah a sunlawinak sungih luh ding cu a ṭul lo maw si?” tiah a ti.

²⁷Cule Jesuh in Ca Thianghlim sung Moses cauk pawl ihsin thokin profet pawlih nganmi tiang, amah ih thu an ngannak hmuahhmuah kha an hnenah a simfiang.

²⁸An feh tumnak khua an thlen zik zawng ah Jesuh cu a feh hrih ding vekin a um awter.

²⁹Asinain annih in, “Kan hnenah riak ve ko aw! Khua a tlai zo ih a thim thlang fawn,” tiah an kai. Curuangah an hnen riak dingin a thlun.

³⁰An hnenah cun a to ih rawl an hil tlang. saang a lak ih thla a cam hnuah a phel ih a zem hai.

³¹Cutikah an mit a hung vaang ih Amah a si kha an thei thiam; a sinain an mithmuh ah a hlo sal.

³²Anmah le anmah cu, “Lamzin kan feh tlang laiih kan hnenih a ṭong le Ca Thianghlim a simfiang rero laiah khan kan sungah meisa kang vekin a um tho lo maw kha?” tiah an ti aw.

³³Hmakhatteah Jerusalem ah an kir sal ih dungthlun hleikhat le a dang pawl an rak tonkhawm lai kha an va hmu ih,

³⁴“Bawipa cu a tho sal taktak a si! Simon hnenah a lang!” tiih an rak sim awk rero kha an thei.

³⁵Annih pahnih khal in lamzin ih thil a cangmi thu le saang a phel zawng ih Bawipa a si ti an theihthiamnak thu pawl kha an sim ve.

Bawipa ih thuthangtha a si.