Bawipai tongkam le Zumnak thu (sim tu - Rev. Fr. Polycarp Thawngte)

Bawipai Tongkam le Zumnak thu

             Kohhran sungih zumtu tampi le hruaitu tamsawn pawl hi nitin kan nunnak von cek aw sehla Cathianghlim thawn naih aw tuk lemlo kan tam men ding ka zum.  Keimaih nun rori ah Misaa ka tuah ding ruangah hramhram ih Cathianghlim ka siar a tam phah in ka thei aw.  Himi ka siar ngah sunte khal hi Kohhran in siar tengteng dingih in zirh le thu in pek nak ruangah a si.  Ziangahtile a Tongko tel lo in ziang khal a cang thei lo; ziang hmuahhmuah khal a Tongkam thawi sersiam a si vekin a Tongkam tel lo in Sacrament khal a um thei lo. Sinakn, Cathianghlim, a Tongkamthianghlim thawn pehpar aw ih kan zirh awknak hi a mal deuh in ka thei ih poi ka ti nasa.  A hrekkhat kanmah Siangbawi pawl rori hin Missa tel lo ih Sacrament kan pek caanah Cathianghlim siarlo men vek tlaih kan um pang le a poi zet.  Ka sim theu nan ka rel bet sal ding; Sacrament cu rel lo, sacramental kan timi thlasuahpek thlacamnak pawl hmanah Cathianghlim siar ding, in zirh duh ruangah Puithiam-kutkaih Cabu sungah Bible catlang pawl in ret sak.  Mina thizik Sacrament pek ti siarlo ah luklak me’n ih Sacrament kan pek awk hi a poi tuk; ziang kan siarlo tinak sawn asi. Curuangah kan dungzarh kan relmi Baptism pekdaan thu ah kha Cahtianghlim ngai dingih sawmawk, forhfialawknak thawn kan tawp ta ih ka peh sal kei uh.  

             Cathianghlim siar theh tikah thusimnak tawite tal tuah tahrat in ziangzongza thlacamnak peh ding asi.  Himi thlacamnak ah a thupibik in Baptism ngahtu hrangah a si ih nulepa le lukai tu pawl in an tuanvo famkim ter theinak dingah le mipi kan zaten kan Baptism-thukamnak tharthawh sal theinak ding kan dil mi a si.  Curuangah mi Baptism kan telpi mi hi an hrang thla kan cam sak men lawng silo in kanmaih hrang hlawknak/amiat kan ngahnak khal a si ve ti hi ruah thiam a tul. Hihi Puithiam canank Ordination ka tel tintei ka ruahsan nak a si ve.  Puithiamthar lungawipi le thlacamsak ti lawng a si lo; keimaih hrang tharthawhnak thluasuah ka conak khal a si.  Cun himi ziangzongza thlacam theh in naute Baptism ahcun Mithianghlim pawl Litany thlacamsak a si nan upa Baptism ah cun Mithianghlim pawl Litany aiah sualsirnak thawn sualphuannak thlacam sawn cam a si.  Naute Baptism ah cun sual phuan ding a um hrihlo vekin sualsir khal a tul lo.  Baptism cu kan suahkeh/ semcih sualnak, Adam ih sualnak ihsi in luat tertu a si vekin Mithianghlim pawl lakah in tlang tel ve tertu a si.  Curuangah hih Mithianghlim pawl Litany lole Sualphuannak thlacam theh in Setan dawisaknak le Rundamnak Sahriak timi Baptism lawngih hmanmi Thianghlim Sahriak thuhnak kha awm/tang ah thuhsak a si.  Upa cu a kut-2 khalah siseh, a tul tile a dng taksa ruang par ah tla thuh a si.  Himi in upa cu mahte sual tual thei zo kan si ruangah kut tiangtiang kan thuawk nak a si phah ding.  Mina Sahriak thuhnak thawn a bang aw phah: hlan ah cun mit, kaa, le hna lam tla thuh a si.  Curungah Mina Sahriak thuhnak Sacrament hi famkim teih ngah ah cu kan rundamnak laksawng famkim tertu a si.  Hi cu neta le kan rel leh sal ding.

          Setan dawinak le Rundamnak Sahriak thuhnak thlacamnak cu tui kan relmi pawl thawn a pehpar aw cia ih kan kaan ta hrih ding.  Sahriak thuh theh cun Baptism ih duhsan taktak a simi tihnimnak/tikholnak tuah dingah tidai hmun, Baptistmal font timi a um le culam ah pan a si.  Thluasuah pek cia mi ti a umlo le ti thlusuah pek ding a si.  Cutheh in Setan hlon-nak le Zumnak thuthuk phuannak tuah dingin Puithiam in thazaang peknak le ralrin peknak tuah hmaisa in hitin thu a sut:     

1/ Satan na hlon maw?

2/ Setan hnatuannak hmuahhmuah na hlon maw?

3/ Setan ih sualsawmnak/ leemnak pawl na hlon maw? 

Himi thusuhnak hi phun-2 in a um ih ka hman sawn theumi cu hitin a si:

1/ Pathian ih fale tin zalen zet ih nung dingin sualnak na hlon maw?

2/ Sualnak sal sungih tla lo dingin sualnak thatlonak lamzin, sualsawmnak pawl na hlon maw?

3/ Sualnak ih hrampi a simi Setan na hlon maw?

Cuih thusuhnak hmuahhmuah “hlon, hlon, hlon” kan ti theh lawngah Dungthlungtu pawl ih Zumnak Hrampi kan timi, zumnak thukamnak tuah a si.  Kan thukamnak pawl hi men men an silo ti cu a fiang tuk lawlaw, rel khung a tul lem nawnlo in ka hmu.

          Hiti a si tikah Baptism Sacrament hi luklak le olai zet, nuampazok men ih kan hman lo ding a thupi tuk.  Zo in nuampazok men cun Sacrament a hmang ding tla kan ti ding nan, kan tim tuah awk lo le zirhnak, zirnak tuah ti khal um lo ih Sacrament kan hman mi cu nuampazok le dekcok ah a cang theimi asi.  Hmaizarh le Baptism ih a thupibik, a muril ngaingai kan rel thlang ding ruangah ngai peh kan zuam tlang pei uh.  A ngaitu le a reltu kan zate parah Sacrament timi Pathian thluasuah luannak titler a khamtu le a siatsuah tu, a dekcok tu kan si pang lo nak dingin kan tulsam mi thazaangthar cu Ziangkimtitheitu Pathian in in pe hram seh! Pa le Fapa le Thiangthlarau hmin in.  Amen.