Biakinn mawi in Biak ding Bawi ah

Biakinn mawi in Biak ding Bawi ah

Paakkum, Caantluang caan zarhpikar XXXIV nak, tlawngkai nihnih ni (Nov. 26, 2019)

Siarding: Daniel 2:31-45; Ps.-Dan 3:57-61; Lk. 21:5-11

Daniel cauk kan siarnak sung ahcun Nebucchanezzar siangpahrang ih mang a man thu kan hmu ih cui a mang ih tiduhsan cu Daniel in a siamfiangnak thu a si. Siangpahrng ih mang sung ahcun sui, ngun, dar le thir pawl hmuh an si. Hlanlai ih san an rak siar le an rak then daan ah lung mankhung thawn an rak tahthim ih san thabik cu sui san ti in siseh, a sangtu cu ngun san ti in siseh, cuisin dar san ti in siseh, netabik le a sebik ah thir san ti in siseh an rak hmin sin. A thabik ihsin a se lam ah a zom vivo. Himi san pa li cu siangpahrang pali ih uknak in a langter. Cule cui siangpahrang pali, san sanli cu a cem ding ih a siatbal dah nawnlo dingmi ram din a si ding thu kan hmu.

Daniel cun "Hi siangpahrang pawl ih san ah van Pathian in lalram a din ding; cun cui lalram cu miphun dang hnenah tanta a si lo ding, cucun hi lalram hmuahhmuah hi a kuai darhter ding ih a cimitter thluh ding, cule lalram cu kumkhua in a hmun ding a si." a ti. Siangpahrang pali le san sanli cu santhalo, setan ih san a sim duh ih cui hnu ah Pathian ih san in nehnak co in a cimitter ding, Pathian ih uknak cu kumkhua a hmun ding.

Kan siarmi Bible pahnih, Daniel le Thuthangtha Lk 21:5-11 kan zoh khawm a si le Daniel sungih a sunglawimi ram le an siangpahrang pawl cu Luke sungih Jerusalem Biakinnpi ih dinhmun ah an lang. Jerusalem Biakinnpi cu ziang tluk in a mawi ti ih mipi ih an lawm rero lai-ah Jesuh cun Biakinnpi ih siatral ding thu a sim. Khuavang ih ram, Setan ih ram le hi leiung tlun thilri pawl cu mawi le tha ti ih kan ruah rero laiah an siatral thluh ding. Cuihnu ah kumkhua a hmun mi ram Van ram a um lai ti in sim.

Himi Bawipa ih simmi, Biakinnpi a siahral ding thu, cu san thuanthu ah AD 70 kum ah a kim taktak. Tuini tiangah hmuh theih a si lai. Biakinn pi ih nitlaknak lam cangdawl lawng a tang ih cucu tuisan ah the Wailing Wall - Aihramnak cangdawl ti in an rawn ko.

Jesuh in mipi hnenah tih a tarh si loin thil a ra cang dingmi hrangah tim an rak tuahcia theinak dingah le ralrinnak an neih theinak dingah a simmi a si sawn. Voi tampi cu kan kiang kan kap kan zoh ih kan hna a ngam, kan unau sungkhat si maw, kan neih kan hlawnthil simaw, kan fimthiamnak si maw, kan hnatuannak si maw, kan rank si maw kan zoh ih cumi ah kan hna a ngam ih ziang dang kan ruat thei nawnlo theu. Leitlun mawinak le sunlawinak, cahnak le thiamnak ah kan thinlung re pang lo dingah ralrinnak in pe.

Cutiih Biakinn ih siahral ding thu a sim tikah mipi cu an thin a phang, an phaw dede thluh ih "ziangtik ah himi a thleng ding" tiah an sut. Ziangruangah mipi in hitluk in "an lung a lut" tile mipi ih thinlung ah Bikinn pi ih siahral ni cu leilung a cemni ti ih an pom le an ruah ruangah a si.

Cui biakinnpi cu mit ih zoh ah a mawi tuk lawmmam ih tlun ah a hnetkhoh, a fek in a tha tuk ih siatbal thei nawnlo ding in an ruat. Cu lawng si loin Israel miphun hrang ahcun Jerusalem hnak ih a thupimi khua a umlo ih cui Jerusalem sung khalah Biakinn pi hnak ih thupi ziangkhal a um lo. Biakinn pi cu sui le ngun le hlawnthil a phunphun thawi an ceimawi thu kan ruah a si le an hrangah ziangtluk in a thupi ti khal kan thei thei.

Jesu ih hrang khalah himi biakinnpi cu a sunglawi tuk ve. Curuangah biakinn ih thil zuar pawl a dawi tlan thluh ih, "ka Pa ih inn cu thlacamnak inn (Mt. 21:13; Mk 11:17; Lk. 19:46; Is 56:7) asinan nannih cu sumdawmnak bazzar menah nan hmang a ti. Biakinn ih a sunlawinak bik cu a mawinak le a feknak si loin Pathian ih umnak a si ruangah a si. Tucu "Pathian ih umnak innpi" timi an theih hngilh cu a poi zet.

Khat lam ah, Pathian in David hnen ih a rak kam mi thukam ruangah himi Biakinn pi khal cu kumkhua a hmun ding ti in an ruat ih cui Biakinn pi cu Pathian ih humhimnak ih hmuithlam ah a rawng cang. Cun Daniel cauk 2:31-45 sung khalah Nebuchadnezzar ih mang  ih duhsan a simnak ah "kumkhua a hmun dingmi ram" a ti. Cumi cu Israel rampi siseh, Jerusalem khuapi le Biakinnpi siseh, zo khal in an ti siat thei lo ding tinak a si ti-in an ruat.

Curuangah Biakinn pi a siat ticu Pathian ih humhimnak a cem ti thawn a bangaw ih cucu thil cang thei a si lo ti in an pom. Pathian ih duhdawtnak le humhimnak cu a cem dah lo nain kannih minung ih ruahdaan vek cekci cu a si lem lo. Thusimtu (Ecclesiastes) 3:1-8 sung ih kan hmuh bang in "thil ziangkim hrangah tikcu a um" ti a si vekin himi Biakinn pi khal cu hrial a si ve lo, tikcu le caan a rak nei ve.

Hiti ih Biakinn siatral ding thu a si tikah mipi cu an thin a phang ih "ziang tik ah a thleng ding" ti ah an sut. Himi thil thleng ding hi "ziangtikah a thleng ding" ti le "ziangtivekin a thleng ding" tihnak in "ziang a thleng ding" timi a thupi sawn. Biakinnpi a siahbal hlanah tihnungza phunzakip a thleng ding ti in kan hmu. Asinan cui thil thleng pawl cu "ni netabik" ti nak a si cuang lo. Mipi ih thinphannak cu caantha ti ah la in le hmangin mi hrek khat cun "ziang tik ah a cang ding ti ka thei" ti in, thei bik tu vek in, mibum ah an rak phar an rak tlio ciamco. Cumi cu ral rin ding a tul ngaingai. Cui bumnak pawl cu thlun pang loin, thudik le dingfelnak a simi Jesuh Khrih ah kan din hnget ding kha a si, ziagah ti le amah Jesuh lawng cu kan rundamnak a si.

Hmailam hrang ti ih ruahsannak a umlonak hmun ah tuini hrang khalah hnatuan a um nawn lo. Hi leitlun kan nunnak kan zoh a si le ruahsannak saupi a um lo. Kannih minung in khua ka khang nan Pathian ih rem a ti lo ahcun thathnemnak a nei tuk lo. Lk 12:16-21 sungih kan hmuhmi milianpa bangin "nang miaa pa, tuizan rori ah na nunnak cu lak a si ding" in ti ta sehla kan hlawnthil, kan neih kan siah pawl cu a lak an si thluh men ding.

Khatlam kam ahcun, kan thlarau cu kumkhua a nungih thih thiamlo a si ruangah cumi hrangah kan hlawnthil kan khawl a tul, rukru ih an pan theilonak hmun le nget ih a ei thei lonak hmun, sunhrul ih a siatsuah theilonak hmun ah nan hlawnthil re uh! Nan hlawnthil umnak ah nan thinlung khal a um (Lk 12:33-34)" ti mi thei uh si.

Biakinnpi ih mawinak ah na lung hloter hlah, Pathian ih innpi a si ti thei in cui inn ih um thei ding ah tim tuah aw.