Caanttha na neih lai-ah (Sim tu - Rev. Fr. Dominic Hnin)

"Caanttha na neih lai-ah" timi thu luu thawn Rev. Fr. Dominic Hnin ih Thuthangtha sim mi

Caantluang zarh hleinganak, tlawngkai nihnih ni (July 14, 2020)

Siarding: Is 7:1-9; Ps. 48:2-8; Mt 11:20-24

• ''Pathian" kan ti ve te'n kan mitthlam ih a cuang hmaisabik cu nunnem Pathian, rundamtu Pathian, thin sau Pathian, etc. ti in a tthanak lam lawng lawng a si.

• Asinan tuisun kan siarmi thuthangttha ahcun Fapa Pathian a simi kan Bawipa Jesuh in Corazin, Bethsaida le Capernaum khua pawl a kawk nak thu kan hmu.

• Hi khua pawl hi Tyre khua, Sidon khua le Sodom khua pawl thawn tahtthimnak a pek. Tyre le Sidon khua pawl cu Pathian zumlo khua pawl an si ih an depdetnak le thinlung siava an neihnak ruangah mawhthluk an si thu kan hmu. (Jl 3:4-7). Isaiah (23:1-18) sung khalah Tyre le Sidon khua thu tampi kan hmu ih cutawk khalah mualpho ih an um thu le aihram ih an um ding thu pawl kan hmu. Pathian ih hremnak ruangih hivek thil thusia an tonnak san a si. Sodom khua khal ziangvek in an rak nungcang ih ziangvek hremnak an tuar ti khal sinsal dang ttul loin kan thei thluh.

• Cun Bible sungah Tyre, Sidon le Sodom khua pawl cu "tthatlonak le sualnak" ih hmuithlam an rak si, a hleice in nuncan tthalo, mi ler, mi dawngdah pawl ih hmuithlam an rak si.

• Capernaum khua thawn pehpar in thuthangttha ngantu Matthai cun "Nazareth khua ah um lo-in Capernaum khua ih um dingah a feh (Mt. 4:13)" a ti ruangah Capernaum khua cu amah kan Bawipa Jesuh ih khua tiah ti a si ttheu. Asinan tu-ahcun Babylon khua thawn tahtthim a si. Babylon khua cu amah le amah a khaisan awk tum ruangah nanthlak a si thu (Is 14:13-15) kan hmu. Prophet Isaiah cun "Van ah kai na tum ih a sangbik arsi tlunah na tonkham ret na tum. Khuavang pawl an tokhawmnak saklam tlang parah siangpahrang bangtuk ih to ding na rak ruat. Khawdur tlun ah ka kai dingih Cungnungbik bangtuk ka si ding na ti. Asinain a thuknakbik hmun mithi khua a dirh thlak na si zo (Is 14:13-15)" ti in a rak ti. Cui ttonglam cu tu-ah Capernaum khua parah hman a si.

• Capernaum khua cu Babylon khua bangih uangsuang awknak thinlung le puarthaunak thinlung a neih ruangah ahnenih a ra um mi Fapa Pathian hman kha a rak ngaihsak lo. A hnen ih a thlengmi thluasuah kha a rak cohlang lo. Curuangah a hmuh ding le ton ding thu ah Sodom khua hnak in besia in na tuar ding a ti. Sodom khua le Gomorrah khua cu "kaat mei-alh" thawn ziam thluh ko in Bawipa ih a siatsuahmi khua a si (Gen 19:24-28). Tucu cuhnak ih nasa in Capernaum khua cun a tuar thlang ding.

•  

• Ziangruangah hitluk ih kawk an tuar ti a si le an lung a ruh ruangah a si. Bawipa in thinlung thlengawknak thu tampi a zirh na'n an thinlung an thleng cuanglo, mangbangza thil tampi a tuahsak na'n an nuncan an thleng cuanglo, hmundang le midang hnak in sunsaknak thawn caanttha tampi a rak pe ko na'n, an rak cohlang cuanglo. Curuangah Bawipa in a kawk. Caanttha an neih laiah an hmang ttangkai lo.

• Ziang ti vek "mangbangza" a tuah timi ngan khum a um lo. Hmansehla "na sungih ka tuahmi mangbangza pawl hi Tyre khua, Sidon khua le Sodom khua ah rak tuah sisehla an sual sir in an um ding ih tuini tiang an him ding" a ti. Curuangah Corazin, Bethsaida le Capernaum khuami pawl an sual sirnak ding hrang ih a rak tuahmi mangbangza cu a menmen lo ti theih a theih. Asinan Corazin, Bethsaida le Capernaum khua ih tuahmi mangbangza pawl cun cui khuami pawl ih thin lung le an nuncan ziaza ah vuirah a rak nei lo. Curuangah ninetabik ni, thutthennak ni ahcun nasatak in an tuar ding.

•  

• Bawipa in mipi hmuh ih mangbangza a tuah mi pawl cu duhsan an nei thluh, tumtahmi an nei thluh. Cucu "mipi pawl an thinlung thleng hai seh" ti a si. 

•  

• "A neitu pawl cu pek bet an si dingih a hleifuan in an nei ding, Asinan zianghman a neilo pa hnen in a neihsunte hman kha laksak a si ding. (Mt. 25:29; Lk 19:26)" ti in kan hmu. An hnen ih pek a rak simi thluasuah pawl cu an rak cohlanlo ruangah laksak sal an si, cui tlunah camsiat an si bet.

• Bawipa Jesuh in "Keimah cu Vancung ihsin a rawngttum mi sang nung ka si. hi sang a ei tu cu kumkhua in a nung ding (Jn 6:51)" ti ah a ti ih kumkhua nunnak hrang ah "thluasuah phurhtu" ti kan hmu. Asinan thluasuah phurhtu hai cu tlingtlak lo ih ei a si le camsiatnak ah a cang ti khal Bible ah kan hmu lala, "hi sang a ei tik le hi hai a in tikah Bawipa ih taksa ih tican a theih lo ahcun a ei a in tikah thutthennak a parah a tuahcih a si (1Cor 11:28)" ti a si.

• Curuangah, tu-ah mangbangza pawl in a tumtahmi a hlensuahlo tikah thluashuah cu camsiatnak ah a cang.

• Nitin kan  nunah "thluasuah co kan duh cio. Kanmah le kan tawk te-in thluasuah khal kan co cio. Asinan cui thluasuah cu kan mai nunah vuirah nei ter loih a lak ih kan fehlan ter men a si le kan hrangah camsiatnak a si sual pang ding.

• Curuangah caanttha na neih lai-ah na comi thluasuah cu Pathian lam ih a lo hruaitu siter aw.