Catbang loin thlacam a tul zia (sim tu - Rev.Fr. Joseph Ro Nei Thang) July 24, 2022

Catbang loin thlacam a tul zia

Thuthangtha sim tu Rev.Fr. Joseph Ro Nei Thang

July 24, 2022

            RVA Falam Chin Service ah leilung hmun tinkip ihsin thlarau rawl a ra zawh ringringtu Bawi Khrih ah duhdawt zetmi nu le pa, u le nau pawl, kan Bawipa Jesuh Khrih hmin in cibai ka run lo buk hai. Tuihni cu July thla ni 24, kum khat sungih caankel Zarhpi a voi 17 nak asi. Cun July ni 24 ni cu St Christina le St Charbel te ih puai ni asiih St Christina hmin latu hmuahhmuah kha Happy feast day tiah cibai ka run lo buk. Tuihni kan siar dingmi Bible pawl tla cu Semtirnak 18:20-32 tiang; Ps 138:1-3, 6-8 tiang, Bible a voihnih siarnak ah Kolose 2:12-14 tiang le thuthang ttha siarnak ahcun Luka 11:1-13 tiang pawl ansi pei. Tuihni ahhin “Cat banglo in thlacam a ttul zia” timi kha ruat khawm tlang uhsi.

            U le nau pawl, tuihni kan siarmi Bible a voikhatnak le thuthang ttha siarnak ihsin thla kan cam tikah cat banglo in thlacam a ttul zia thu pawl in sim. Tuihni ih kan siarmi Bible a voikhatnak ah Sodom le Gomorrah te hi an sual tukih Pathian in a siatsuah tum ttheh. Cumi thu hi vancungmi in Abraham kha a sim tikah Abraham in zaangfah a dil asi. Hi Sodom khaw sungah mittha 50 a um ahcun Pathian in ka siatsuah lo ding tiah a vancungmi thawngin a ti. Abraham in midik 50 a hawlih a tong lo. Mittha 45 a um ahcun ka ngaithiam dingih ka siatsuah lo ding tiah Pathian in a ti ih Abraham in mittha 45 a hawl lala. A tong cuanglo. Pathian hnenah ngaidamnak a dil sak. Mittha 40 a um ahcun kan siatsuah lo ding tiah Pathian in a ti nain 40 tla a um cuanglo. Mittha 30 um bang sehla Bawipa, hi khawpi hi na siatsuah thotho pei maw tiah zaangfah a dil tikah midik 30 ruangah Bawipa in Sodom le Gomorrah cu ka siatsuah lo ding tiah a ti asi. Asinain mittha 30 tla a tong cuanglo. Mittha 20 um bang sehla teh a ti nain Abraham in a va hawl tikah a tonglo ih 10 um bang sehla teh a ti hrih.

Abraham in Sodom le Gomorrah khaw sungah mittha 10 te tla a tong cuanglo tikah Bawipa in a feh san asi. Abraham tla ninghang riahsia ememin a umnak hmunah a kir sal. Bawipa ih fehsanmi khawpi, Abraham ninghang riahsiatermi khawmpi cu rapthlakza asi. Pathian in kaat meisa thawn a siatsuah thluh asi. Abraham in ziangtluk in so Sodom le Gomorrah hrangah thla a cam sak. Catbanglo in thla a cam sak ko nain anmah milai pawl hrimhrim in Pathian an dungtun thluh ruangah asi. Kan thei cia vekin cutawk khua ah Lot le a fanu 2 le a nupi thawn an zate in mittha 4 lawng an um kan ti thei asi.

            Tuihni kan siarmi thuthang ttha Luka 11:1-13 sungah tla catbanglo in thlacam a ttul zia thu in zirh. Luka 11:5-8 ah Jesuh in a dungthluntu pawl hnenah thutthimnak ah nanmah lakah mi pakhat in na rualpi inn ah zantitim ah feh tahratin “Ka rual, sanghlom hlom thum i coih hram aw. Ziangahtile ka rualpi pakhat cu a khualtlawnnak ihsin ka inn ah a ra thlengih rawl pek ding zianghman ka neilo” tiah na va ti. Cutikah inn sung ihsin na rualpi in “I hnai hnok hlah, sangka kan khar ttheh zo ih ka fale thawn kan it zo; thil pe dingin ka tho paih nawnlo” tiah ti sehla ziangtinso na tuah ding? Thungai in ka lo sim: A rualpi na si ruangah hung tho in na dilmi sanghlom cu lo pe lohli lo hman sehla ningzak lo in na dil rero hrat ahcun a tho pei ih na ttulmi cu a lo pe ko ding” tiah ati. Curuangah beizong lo tein cat banglo in dil rero ding, thlacam rero dingah kannih zumtu Christian pawlin ttuanvo kan nei asi.

Ziangahtile Bawipa amah rori in thlacam ringring dingah in zirh asi. In zirh lawng si lo in Bawipa amah rori in tla zanvar thla a cam asi tiah Luka 6:12 ah in zirh. Daan peksalnak 9:18-29 ah Moses in Pathian a dodaltu Israel mipi pawl hrangah ni 40 le zaan 40, rawl ei lo, tidai in lo in a bokin thla a cam sak asi. Tirthlah 12 ah Peter cu thawnginn ah thircikcin thawn an khih ih thawng a tla lai ah zumtu Christian pawl cu catbang lo in thla an cam ruangah Pathian in vancungmi a run thlahih thawnginn sung ihsin a runsuah hai. Tirhthlah 16:25-34 ah Paul le Silas tla thawnginn sungah an hrengih Paul le Silas in zaanttim lai ah napi in thla an cam, Saam hla pawl an sak rero lai ah lin a hnin ciamco ih thawnginn sangka pawl a on ttheh asi. Cutin cu thawnginn kiltupa le a innsungsang tla cu baptism an ngahih zumtu ah an cang asi. Monica in a fapa Augustine hrangah kum 17 rori thla a cam sakih Augustine cu a nunnak thar suah in zumtu Christian a cang. Cun Monica in a pasal hrangah tla kum 17 sung thla a cam sak asi.

U le nau pawl, catlo in thla kan camnak thawngin Pathian thawn pum khat sinak kan ngahih sualsawmnak pawl tla kan neh thei ih thlarau thazaang khohnak tla kan ngah sinsin asi. Tuihni ah St Charbel ih puai kan tuahih a nih tla cu kum 23 sung yatih bawah thawn thlacamnak, mipi hrangih sual cawhkuan kuan saknak hnattuan ttuan in thianghlim takin a nungsuak thei asi.

Cun tuihni ah St Christina ih puai tla kan tuah. St Christina ih thuantu malte ka run lo hlawm duh hai. St Christina cu milian zetih fanu asi. A pa cu Urbain asiih mitkher thiamtu, khawvel pathian zumtu asi. Sui ih tuahmi pathian tampi a nei ih mifarah pawl hnenah a zem ttheh ih a cuih khawvel pathian biak dingah tha a tho emem ttheu. A fanu Christina tla a cuih khawvel pawlih puithiannu si dingah a zuam sak hnasa asi. A kum 11 ah a pa in Christina cu a khaan pakhat sungah a hren khumih a cuih hmunih ret cia mi sui le ngun khawvel pathian milem pawl kha biak dingah le mei-ur rimhmui thawn thlacam dingah a fial asi.

Christina in ong kua te ihsin a lenglam a thlir ttheu ih a hmumi thingkung le hrampi pawl an tuahtu a um ttul. A cuih tuahtu lawng rian dingah a sungphiat. Amah thiam tawk tein a cuih serhsiamtu hnenah na pi in thla a cam. Cutin cu thlarau thazaang a ngah sinsin ih thla a cam sinsin hlei ah rawl ulhnak thawn tla thla a cam asi. Curuangah a hnenah vancungmi pakhat a langih Pathian thu le Jesuh Khrih ih rundamnak thuthang ttha kha a zirh ttheh asi. Jesuh Khrih ih pumtthen kan siih Jesuh Khrih in thih a tuar vekin zumtu pawl tla thih tuar ngam ttul asi tiah vancungmi ih zirhnak thu a thei tikah fala pekte Christina in thlarau thazaang a ngah sinsin.

Thudik a thei ngah tikah a pa ih ret ta mi sui le ngun khawvel pathian milem pawl cu a siatsuah thluh hai. A pa in a fanu nih zumnak thar a nei asi ti a thei tikah a thin a na ngai ngai. A pa in Christina cu a bengih anih in zumnak thar lamzin a thlun ngah zo thu le milem pawl a siatsuah ttheh tla ralttha zetin a phuang asi. A pa in a fanu cu thawnginn ah a hren khum ih a vuakter hai cih. A nu a ra ih khawvel milem biak dingah le a zumnak thar hlon dingah a lem asi. Asinain a fanu Christina in a awi cuanglo.

A pa a ra ih a siatsuah tthehmi sui le ngun khawvel milem pawl ngaithiam dil sal dingah thu a pek nain Christina in zianghman a thlun cuanglo. Christina cu thawnginn lengah an suahih a kut le kee ttemin thirfungpi an hrolhih vok bangtukin meisa parah an em, an rawh asi. A taksa cu a meisa in a kaang ko nain a thi lo. Athi theilo ruangah thawnginn sungah an tul an khum sal. A zaanah vancungmi a runglang ih thazaang a pek hnangamnak a ngah sinsin. A thaisun ah meisa ih suatsuahmi umlo him hlelhlelte in a um kha a pa nih a hmu tikah a thin a heng sinsin ih a kut le kee ttem sakin a hngawng ah lungtum thlaih in tikhurpi sungah a hlonter asi. Cumi dinhmun ah tla vancungmi in a runih himtein a um kha a pa Urban in a hmu. A thaizing a naam thawn satthah dingah a tumih a cuih zan rori ahhin a pa sawn cu a thi.

A pa a thi hnu ah a pa ih hnattuan sangtu in Christina cu hremnak a phunphun a tuarter ih thawnginn ah a thlah sal. A hnenah a ratu hmuahhmuah cu thuthang ttha a simih minung 300 lai hi Pathian zumtu ah a canter hai. Ne ta deuh ah ralnaam thawn a lu an sat tan. A thihni cu July thla ni 24 asi vekin a puaini tla July 24 thotho asi. Mangbangza Pathian ih humhimnak cu St Christina in mangbangza in a co asi. Thlacamnak thawn ziangzongza cu a tuar thei asi.

A ngaitu nu le pa, u le nau, nan zate parah Pathian in thlacam zuam theinak thluasuah lo pe ringring hram seh. Amen.