Cawn Tlak Thlacam Nun (sim tu Rev. Fr. Joseph Ro Nei Thang)

“Cawn tlak thlacam nun”

Thuthangtha sim tu Rev. Fr. Joseph Ro Nei Thang

Siarding: 1John 5:5-13; Saam 147:12-13, 14-15, 19-20; Luka 5:12-16

Epiphany puai hnu Ninga Ni (January 8, 2021)

          Leitlun khuazakip ihsin RVA a rak ngaitu Bawi Khrih ah duhdawt zetmi nu le pa, u le nau pawl, kan Bawipa Jesuh Khrih ih hmin in cibai ka run lo buk hai. Tuihni cu 2021, January thla ni 8, Tlawngkai ni 5 ni asi. Tuihni ih kan siar dingmi Cathianghlim pawl cu 1John 5:5-13; Saam 147:12-13, 14-15, 19-20 tiang ansi pei. Saam a sawnnak ahcun “Maw Jerusalem, Bawipa cu thangtthat aw!” Thuthang ttha ahcun Luka 5:12-16 tiang asi pei. Tuihni kan ruah khawm tlang dingmi cu “Cawn tlak thlacam nun” tiah asi pei.

          U le nau pawl tuihni ih kan siarmi Thuthang ttha Luka 5:12-16 cu siar sal hrih uhsi. Voikhat ah Jesuh cu pharnat a tuartu pakhat ih umnak khua ah a thleng. Cu pa in Jesuh a hmu tikah a hmai ah a bokih “Bawipa, na duh ahcun i thiangter thei nasi” tiah a dil. Jesuh in a kut in a tham hnu ah “Ka lo thiangter duh, thiang thlang aw” tiah ati. Hma khatte ah a natnak cu a dam. Jesuh in “Zo hman va sim hlah; asinain va feh awla puithiam pawl in lo zoh hai sehla na dam ti kha mi hmuahhmuah ih an lo hmuhnak dingah Moses daan vekin thawinak va pe aw” tiah ati. Asinain Jesuh ih thuhla cu hmunkip ah a thang sinsin, mi in an pan sinsin ih a thusimmi an ngai; cule an natnak pawl khal a damter. Cuih hnu ah misenpi hnen ihsin hmun tthingnakah a fehih amah lawng thla a cam ttheu” tiah asi. 

          U le nau pawl, Luka in kan Bawipa Jesuh ih thuhla siseh, Kohhran thuhla siseh, a ngan tikah thlacamnak a thupi zia tampi a telh ttheu asi. A Cathianghlim nganmi pawl cu Luka ih thuthang ttha ah le Tirhthlah thuanthu tla ansi ih thlacam nak a thupizia a telh ringring asi, ziangahtile amah cu thlacam zuammi asi ruangah asi. Thlacamnak thu tampi Luka nih in zirh asi tiah kan ti thei asi. Luka 1 ah kan zoh tikah Bawipa Jesuh hrangih lamsialtu John ih suaknak hrangah Zachariah hnenah vancungmi in thu a than; cuih can ah Zachariah cu Bawipa hnenah  rai thawinak a tuah lai fang asiih mipi pawlin an hngak rero asi ti thu kan hmu ih thawinak cu thlacamnak lakah a thupi zetmi asi.

          Cun Luka 2 ah Bawipa Jesuh a suah lai ah tuukhal pawl hnenah vancungmi a rung langih an hnenah Messiah a suaknak thu a sim hnu ah cawrawl einak kuang sungah a um ti thu a simih cun vancung ihsin vancungmi pawl tla Pathian thangtthatnak hla an sa asi. Pathian thangtthatnak hla sa timi cu thlacamnak phunkhat asi ve asi. Luka 3 ah tla Bawipa Jesuh tipilnak a ngahnak thu in simih thla a cam lai fangah van cu a ongih Thlarau Thianghlim cu a parah tthuro bangtukin a rung langnak thu; Luka 4 ahcun Bawi Jesuh in ni 40 le zan 40 sung rawl ulhin thla a camih Satan ih tukforhnak a tuar asi ti thu; Luka 5 cu tuihni kan siarmi hi asi. Mina a damter hnu ah a mahte lawng hmun tthingnak hmunah a va fehih cutawk ah thla a camnak; Luka 6 ahcun Tirhthlah 12 hrilnak dingah tlang parah a hung kai ih Pathian hnenah zanvar in thla a camnak; Luka 7 ah tla Naim khua ih nuhmeinu ih fapa hi a thihnak ihsin Bawipa Jesuh in a thoter sal ruangah mipi in Pathian an thangtthatnak; Luka 8 ah Dungthluntu pawl thawn Bawipa Jesuh cu lawng thawn khual a tlawngih a cuih lawng sungah Bawipa Jesuh a ihthat lai fangah thlisia a hrang ciamco ih Dungthluntu pawlin “Bawipa, Bawipa” tiah an va tthang. Bawipa kha an pan, an beu asi. Cumi tla thlacamnak phunkhat a rak si thotho asi.

          Luka 9 ahcun Bawipa Jesuh in nunau le nauhak siarlo in pacang hlir minung 5000 hi sang hlom 5 le nga pumhnih thawn rawl a dar tikah Pathian hnenah lungawi thu simin thla a cam hnu ah a phelih a Dungthluntu pawl a pek nak thu; Luka 10 ah Bawipa Jesuh in Dungthluntu 72 hi amah feh tumnak khua le ramah a va thlah. An kirsal tikah Pathian hnenah lungawi thusim in thla a camnak; Luka 11 ahcun Bawipa Jesuh Khrih in “vancung ih a ummi kan Pa” timi thlacam le catbanglo in thlacamnak a thupitzia a zirhnak; Luka 13 ah Bawi Jesuh in “Bawipa ih hmin in a ra mi cu thluasuah siko seh” timi a thupi zetmi thlacamnak, Pathian kan hlamnak le thangtthatnak a thupit zia in zirhnak; Luka 18 ah Pathian a ttihzah lotu thutthen tu hnenah nuhmeinu cu tu le tu a va fehih a thu tthen sak dingah a dil. A cumi ihsin tu le a tu thlacam a ttulzia cu Bawipa nih in zirh duh. Cule nauhak pawl thluasuah a peknak thu tla kan hmu thei asi. Cumi cu thlacamnak asi thotho asi.

          Luka 19 ahcun Bawipa Jesuh Jerusalem khawpi sungah sunglawi zetin a lutih mipi tla in hosanna, David ih fapa tiah thangtthatnak an pek ciamco. Farasi pawl le daan thiamtu pawlin mipi pawl cu daitein um dingah an simter tikah Bawipa in “himi pawl dai tein an um asile lungto pawl hi an hung au ciamco ding” tiah a sawn. Cule biakinnpi sungah a lutih biakinn borhhlawhtertu pawl a dawi hai ttheh ih “Ka inn cu miphun hmuah hmuah hrangah thlacamnak hmun asi” tiah Pathian in a ti mi kha a sim hai asi. Luka 22 ah Bawipa zanriah thu, Gethsemane hmuan sungih thla a camnak; Luka 23 ah tla “Ka Pa, ka thlarau cu na kut sungah ka lo pe asi” tiah thla a camnak; Luka 24 ah Bawipa Jesuh thihnak ihsin a thosal ih Emmaus khua ah a fehtu Dungthluntu 2 hnenah a va thlun ve. Zanriah an ei lai ah sangreu cu a lakih thla a cam hnu ah a phelih a zemnak thu; cun Dungthluntu pawl kha thluasuah a pe lai ah vancung ah a hung kainak thu pawl kan hmu. Curuangah Luka in a cathianghlim uk-khnatnak cu thlacamnak thawn a thawkih thlacamnak thawn a cemnet ter asi.

          Luka ih Cathianghlim ukhnihnak tla thlacamnak thawn a thok asi. Tirhthlah 1 ah Judas Iscariot roltu Matthias an hrilnak ah thla an camnak thu; Tirhthlah 2 ah Pentecost ni ah Bawinu Mary le Dungthluntu pawl thla an cam rero lai ah an parah Thiang Thlarau a rungttumnak thu; Tirhthlah 3 ah thlacam dingin Biakinn ah a va pantu pawl hnenah kut dawhin bawmnak diltu kezengpa kha Peter in a damternak thu; Tirhthlah 4 ah Peter le John in thla an cam ttheh ve tein an tonkhawmnak inn cu a hnin thluh ih Thiang Thlarau thawn an khahih ral ttha zetin Pathian thu an simnak thu; Tirhthlah 6 ah Tirhthlah pawlin deacon 7 an hrilnak, kut suangin thla an camnak; cun Tirhthlah 7 ah Stephen in amah a thahtu a ral pawl hrang thla a cam saknak; cun Tirthlah 9 ah Paul ih lung thlengnak ah Ananias in thla a cam sakih baptism a peknak thu le Peter ih thlacam saknak thawngin a thi zo mi Tabitha a nunsalnak thu; Tirhthlah 10 ah hnattuan ttha ttuan in thla  a cam ringringtu Cornelius in thla a cam rero ve tu Peter cu a tongih zumtu innsang ah an cannak thu; Tirhthlah 12 ah Peter hi thawngtlaknak ihsin a luat theinak dingah zumtu pawlin thla an cam rero ih Peter a luatnak; Tirhthlah 13 ah Mission thar feh dingmi Paul le Barnabas te hrangah mipi in rawl ulh in thla an cam saknak thu; Tirhthlah 15 ah Jerusalem council an tuahnak thu; cutin cu a feh vivo ih Tirhthlah 28 ah tla Paul in mina Publius ih pa hrangah thla a cam sakih a damsalnak thu pawl kan hmu asi. Tirhthlah pawlih thuanthu ah tla thlacamnak thawn a thawkih thlacamnak thawn a cemnetter asi. 

          Bawipa Jesuh Khrih in thlacam ringring dingah in zirh, Bawinu Mary khalin thlacam ringring dingah in run zirh thotho, cun Luka khalin thlacamnak kan nei a ttul zia in zirh asi. Kannih tla in in zirh dahmi thlacamnak cu nitin kan nunnak ah tlaihsan ringring uhsi.

          Ziangtinkim thiltitheitu Pathian, Pa le Fapa le Thlarau Thianghlim in nan zaten thlacam zuam sinsintu kan si theinak dingah thluasuah in run pek hram seh. Amen.