Colhhmun Jesuh

'Colhhmun Jesuh' ti mi thulu hmangin thlarau rawl    

         Duh dawt mi u le nau pawl, 'Colhhmun Jesuh' ti mi thu lu hmangin thlarau tha zang la tlang ding in ka lo sawm, 'Colhhmun' timi cu ke rori thawn khual tlawng theu pawl le lo feh theu pawl in man hla zet in kan hmang theu. Kan phur a rit kan tha a bang, kan thlen duh nak hmun le khua le a hla lai fawn, Ziang kan tul? Colhhmun kan tul, kan thilrit kan thum i, to rem te in hnem dai ah kan to. Zilthli thiangte kan von hawp i tidai dai te kan von in cun kan tha a tlung hlunhlo rori. Cui sicun tha thar la in phur zang deuh le kekar zamrang deuh in kan duh nak hmun pan in kan pok sal.

        Tui sun ih kan siar mi Is 40: 25-31 sungah "A bang mi le tha cem mi pawl cu an tha a cak ter sal. Bawipa a rinsan tu cu an tha a tlung sal ding. Muvanlai vek in thla pharh in an zam ding" in ti. Thu thangtha ih kan siar mi Mt 11: 28-30 sung khalah "Thil rit le zonzaih a tuar tu pawl ka hnen ah ra uh, colhdam nak ka lo pe ding" Jesuh in in ti. A baang thei mi kan si. Colhhmun kan tul ih, feh bet sal ding khal tuanvo kan nei.

        Mi nung hi phun thum in kan baang theu. Kan tisa a baang, kan thinlung khal a bang theu ih kan thlarau khal bang a thiam ve. Pakhat cio ih baang can khal a um ih a pa thum komih baang khal a um thei ve a si. Ziangtivek zawng ih kan baang khal asi len Jesuh hnen ah kan baang nak phur rit thum in, colhhah dam nak a hnen in la cio uhsi. Amai pek mi tha zangthar thawn olsam zet le zaangkhai zet in nun zia thiam thlang uhsi. Lei le van sersiam tu kan biak Pathian hman kha niruk hna a tuan ih ni sarih ni ah a cawl ti asi kha. Cui ni cu kan nih khal in "Zarhpi, nipi, colhni" kan ti. Biakinn ah khawm in canhmang uhsi.   Pawlpi unau tla thawn caannuam hmang uhsi. Inn sungsang thawn siseh, rualpi pawl thawn siseh, sunglawi le man nei zet in colhni hi hmang tlang uhsi. Mi hrekkhat cu mai bulpak poihai le inn lei tulnak ruat in khawm rei deuh le kan thin a tawi. Pawlpi le rual pi pawl thawn tlan tlang kan tum lo theu. Hna tuan duh rori ruangih khawm man lo zum tu tla kan um thiam. Thir ih tuah mi cet(puf) tha tha hman hman tam tuk cun a siat ol mai, rei a awh lo. Ka dam ko, ka tuan thei tak ah ti i"Colh ni hman i cawl men lo tiang i kan tuan ah cun kan tisa khal in a tuar lo, mi dang hrang khalah zoh a mawilo. Pathian duh mi khal a si lo. Kan hnatuan nak ih baang thei, tha cemthei mi kan si zia Bawipa in thei cia. Curuangah "Colhni" in tuah sak. Hini cu Bawipa ih ni asi. Amai hrangah hmang uh, thianghlim ter uh in ti. Colh ni ih cawlh huahhi men hi, Bawipa a tel ah cun a mai sunlawi nak a siih, kan ruangpum hahdamnak khal asi. Sabbath Bawi Jesuh hi kan colhhmun si thei hram seh.

        Kan thin lung khal in colhhmun a tul zet. Thinlung zinfe le donhar in kan bangzet theu. Inn sang buai nak ruangah maw, damlonak ruangin si maw, kan thin a baang kan ning a hang.Voi tampi cu kan duh kan tul mi tampi le kan tumtah mi famkim thei lo ruangah tla thin tha nau le beidong in kan um theu. Jesuh Khrih hnen le a mai in remruah sak mi dinhmun le covo ih tawk ti thiamlo cun thinlung a vak vai rero ko. Mithianghlim Augustine cun" My heart is restless, until it rest in you" ka thinlung cu nahnen ih colhdam nak a hmuh hlantiang cawl ngah lo in a vak vai rero a rak ti. Kan duh zet mi kan ngah lo caanah kan thin a bang. Kan va ngah khal le a dang pakhatkhat kan duh bet vivo. Ziangtikah a cawl ngah thei ding. Jesuh hnen lawngah colhdam nak taktak a um. Leitlun kan nunnak hrang i donhar thinlung i kan um rero mi in teh kan nunnak dongkhat tal, nikhat tal a sau ter bet thei cuanglo. Thaisun le kan hmailam caan in a mai tawk zawn har nak a rak thlenpi ding. Tuisun le tui caan ih si, thinbang cia rero i kan um cu Bawipa in in sianglo. Amai hnen in colhdam hnangam nak kan la cio kei uh.

        Kan thlarau khal a baang thei, colhhmun a tul ve. Tisa hrangih helhkam zet ih hnatuan zawk rero le thinlung i duh mi le tum tah mi tam pi nei ih thinhar rero pawl hrangah cun thlarau colhdamnak ngah ding cu a ol lo law law. Martha cu rawlsuan le inn sang hna ah buai ih, Mary parah mitkem nak le hmuh thei lo nak thinlung a nei bet. Curuangah Mary ih co mi thlarau colhdam hnangam nak a co ngah lo. Tisa hrangih buai tuk le duh aam tuk pawl , an thin a dai ngah dahloih thlarau sinsin cu rilrawng tihal in a bang thlang. Kan sual nak le famkimlo nak ruangkhal in kan thlarau a baang. Biaknak lamih pe aw thei zet pawl khal cah ringring theih lo in kan tum suk pang theu.

         Jesuh Khrih hnen ah ruangpum, thinlung le thlarau colhdam nak la in a mai pek mi tha zang thar thawn hmainor in feh sin uhsi. Khrih thawn nun tlang le feh tlang cun nun a nuam ih phur a zang. Kan colhhmun Jesuh thangthat sikoseh.

       

Add new comment

1 + 6 =