Daan hnakin a thupi sawnmi

Rev. Fr. Peter Zin ih thuthangtha sim mi (July 17,  2020)

“Daan hnakin a thupi sawnmi”

Bawi Khrih ah duhdawtmi nu le pa, u le nau pawl, Bawipa ih pek mi hnangam daihnak cu nan zate hnenah um hram seh. Tuni 2020 July 17 (Tlawngkai ninga) ni ih kan siar ding mi Ca Thianghlim pawl cu a veikhat siarnak ah Isaiah 38:1-6, 21-22, 7-8, Gospel cu Matthai 12:1-8 tiang a si. Tuih kan sim mi Bible veikhat siarnak ih catlang pawl kha ṭha ten a ngai tu nih cu nan mang a bang men thei asilo le ka sim sual tin tla nan ruat men thei tin ka ruat. Ziangruangah tile cang 21-22 hnu ah cang 7-8 tiang tin a ra sal ruangah a si. Himi hi ngansualmi le simsual mi a si lo ih Pawlpi in hitin siar ding in in tuah sak mi a si ti kha a hmai sa ah sim fiang ta ka duh. 

Tunni ih kan siar mi Bible pawl thawn pehparin Daan asilole Upadi hnak in a thupi sawn mi thu ka lo ruah pi ding ah ka duh.  A hmaisa ah tuni kan siar mi Gospel Thuthangṭha kan zoh hmai ta hrih pei. Sabbath ni nikhat ah Bawi Jesuh le a Dungthluntu pawl lo lakin in an feh ih an feh phah in a dungthluntu pawl an ril a rawn tuk ruangah sangvut an zuut ih a fang kha an ei nak thu kan hmu. Cu mi kha Farasi pawl in an hmu ih Bawi Jesuh hnen ah, “Zoh hnik, na dungthluntu pawl in Sabbath ni ah hitiih an tuah hi Daan an buar a si,” tiah an rak ti. Cutikah Bawi Jesuh in hlan lai ih an pupa san lai ih a cang dah mi thu pawl hmang in thu a sim hai, a sawn hai asilole thu a zirh hai kan ti pei. David san lai ah David le a rualpi pawl an ril a rawng tuk tikah Pathian hnenih pekmi, Puithian pawl lawng ih ei thei mi sang kha an rak ei ti asi. Cuih tlunah Sabbath tinte Biakinn sungah puithiam pawl in Sabbath daan an buar ringring ti kha Moses Daan sungah hmuh theih a si. Asinan mi sual ah ruah an si lo a ti. Cun a net nak lam ah fiang zet in a sim mi cu, “Pathian ih a duh sawn mi cu zaangfahnak asi timi le Milai Fapa hi Sabbath tlunih Bawi a si” a ti.

Milai pawl ih kan thu ruah daan, kan theih daan, thil kan hmu daan, le kan duh daan pawl ih a bang aw lo tik ah mah duh daan cio ih um hi a rem cang thei lo ih ‘Daan asilole Upadi, sii-kan ti vek hi a rak ṭul ṭheunak a si. Minung pakhat hi sii-kan nei lo in cu ṭhanso nak le hlawhtlinnak pawl hmu ding hi thil ol a rak si lo. Curuangah fimthiamnak kan zirnak ah siseh, leitlun thilri lam ih ṭhansonak hrangah siseh, midang pawl thawn kan um tlang tikah rem le nuam zet in kan um tlang thei nak dingah siseh si-kan, upadi pawl hi nei a ṭul zet mi a si. Asinan thlarau lam asilole Pathian thu lam in kan zoh tik ah sii-kan nei men le upadi thlun men hi a rak tawk hrih lo ti hi kan hmu thei a si. Sii-kan nei a ṭul lo tinak a si lo ih cu mi hnak in sang deuh din hmun ah kan um ṭul hrih ti duh nak a si. Leitlun minung pawl ih kan duh le kan uar zet ṭheu mi pakhat cu ziang a si tisile mahih sim ciami asilole mahih ṭong mi vek in tuah tengteng ding ti hi kan duh zet mi thil pakhat asi. A si, thilṭha zet le thilṭul zet pakhat khal a si. Asinan a caancaan ah cu thu kan tan cia zo mi, kan ṭong zo mi, asilole daan kan tuah zo mi pawl khal cu ruat sal a ṭul caan a um thei ṭheu. Siangpahrang Herod cu a ṭong zo mi vek in tuah a duh tengteng ruangah Johan kha that a duh lo na cing a that ter.

Tuni Bible a veikhatnak kan siarnak ah Pathian in Prophet Isaiah hnen ah siangpahrang Hezekiah a thihnak ding thu a sim ter. “Bawipa in a seherhmi hmuahhmuah tuah ṭheh in sim ṭheh seh, a nung lo ding a lo ti. Curuangah thi dingin timlam aw,” tiah prophet Isaiah in a ti tikah siangpahrang Hezekiah cu mit thli thawn thla a cam ih cutikah Pathian in a nung lo ding a ti cia mi kha kum 15 nung bet sal ding in a thu a thleng sal ti kan hmu. 

Tuni ka sim duh mi thu thawn  pehpar in Mother Theresa thu ka siar dah mi cauk pakhat sung ta mal lai sim ka duh. Veikhat  lai ah Mother Theresa in a kuttang ih a um mi a sister pawl hnen ah mifarah pawl rawl nan pek tikah hi tawk hmun in nan pek ding, khi tawk hmun in cu nan pek hrimhrim lo ding tiin an umnak inn in mi an bawm tikah sii-kan nei ding in upadi pakhat a rak tuah dah a si.  Asinan nikhat ni ah hi tawk hmun in nan pek lo ding a ti nak hmunin mifarah ril rawng zet pakhat a ra ih rawl a dil tik ah a mah Mother Theresa a rak um ngelcel ih Mother Theresa in cumi rilrawng zetmi pakhat in rawl a dil mi a hmu tik ah hitawk hmun in cu kan lo pek thei lo a ti thei nawn lo. A mah rori in pek hlah uh a tinak hmun in cumi mifarah rilrawng tu kha rawl ei ding a pek dah ti a si. Mah ṭong mi vek rori ih tuah duh tengteng in pek lo in um ta sehla a mah cu sii-kan nei zet ah cu a cang men thei nan Pathian a lung a awi pei maw ti hi ruat ṭul mi a si. Farasi pawl in cu nan rilrawng le tla um men uh Sabbath ni ih tuah thei lo mi cu tuah lo in um ko uh ti an duh. Asinan Bawi Jesuh cun zaangfahnak le duhdawtnak nei hi a duh sawn a si. Sii-kan nei hi a ṭha zet a sinan duhdawtnak le zaangfahnak thawn a kalh awk asile cu thuk dueh in Pathin duhnak hi khui mi deuh a si ti kha ruat kan ṭul ṭheu ding asi. Cun duhdawtnak le zaangfahnak nei tu hi sii-kan nei lo mi a silo ih sii-kan upadi hnak in sang dueh ih a nung tu a si. Duhdawtnak le zaangfahnak asimi kan Pathain cu Daan asilole sii-kan upadi tlun ih um mi a si. Kan nih kal zaangfahnak le duhdawtnak a nei tu si ringring thei ding in zuam cio uh si. Pathian in kan ṭul sam mi thluasuah pawl in pek cio hram seh.

Fr. Peter Lal Zin Thang (Hakha Diocese)