Daan le Duhdawtnak (sim tu Rev. Fr. Lucas Sum), March 10, 2021.

Daan le Duhdawtnak

Thuthangtha sim tu Rev. Fr. Lucas Sum

March 10, 2021.

Siarding: Dt. 4: 1, 5-9; Ps 147; Mt. 5: 17-19.

          Zumtu u le nau, Pathian in thlawsuah lo pe hram seh, tiah hmaisa ah thlaza ka cam. Tuittum ah “Daan le Duhdawtnak” timi thulu ah hmangin Pathian thu ka ron lo hlawm duh. Hmaisa ah Baibal ka ron siar ta ding.

          Mt 5:17-19: “Moses daan pawl le profet pawl ih thu zirh mi siat suah dingah a ra, tiah i ruat hlah uh. Cu pawl siat suah dingah ka ra lo, an zirh mi pawl kim ter dingah ka ra sawn a si. Hihi cing ttha uh – lei le van a um sung cu daan sungih daan terek bik pakhat hman a hlo lo ding, ziang hmuahhmuah a siat ttheh hlan cu, pakhat te hman a hlo lo ding.

          Curuangah zokhal siseh la thu kham sungih a thupi lo bik, pakhat te hman kha, a thlun lo ih, mi dang khal thlun lo dingin a zirh ve a si ah cun amah cu vancung ramah nauta bik a si ding. Cule zo khal siseh la Daan kha a thlun ih mi dang khal thlun ve dingih a zirh a si ahcun amah cu vancung ramah mi tum a si ding.

          Zumtu u le nau, kan theih zo vekin Pathian in Moses hnen ihsin Israel pawl cu “Thukham Pahra” a pe a si. Hi Thukham Pahra pawl hi “vancung ram ih thleng thei dingih hruaitu pahra” tiah mi hrek in an ko ttheu.                                                                                                                                                                              

          Mitu ih kan theih vek in Bawi Jesuh in daan pawl siat suah dingah ka ra lo; cuih daan pawl kim ter sawn dingah ka ra a si, a timi te hi ziang a ti duh san a si pei? Bawi Jesuh in a uknak ram ah cun mi hmuahhmuah cu a Pa Pathian ih fate ah in cang ter ttheh ding a si. Innsungsang pakhat ah kan cang ttheh ding a si. Kan thei vek in  zohtthiam tlak innsungsang ah cun thlun ding mi daan timi hi a ttul ciamco lo. A ttul mi te pakhat cu duhdawtnak timi lawng a si.

          Duhdawtnak a nei mi innsungsang ah cun nu le pa in, fate pawl parah duhdawtnak thawn ziangkim an tuah dingih fate pawl khal in duhdawtnak thawn an nu le pa ih thu an ngai ding a si. Cun u nau pakhat le pakhat karlak khal ah duhdawtnak in a khat ding a si. Ti duh san cu, vancung ramah duhdawtnak timi daan pakhat in lam a hruai ding a si, tinak a si. Curuangah Bawi Jesuh in Thukham Pahra cu “na bawipa na Pathian cu na thinlung le na thazang zaten thawn na duhdawt pei ih na innhnen pawl khal nangmah le nangmah na duhdawt awk vek in na duh pei, tiah a tawi zawngin in sim a si.

          Himi hin ziangmi a khih hmuh a si, tilen duhdawtnak tel lo ih thukham thlun cu zianghman a ttha hnem lo, ti mi a si. Ttongdang ih kan sim asilen duhdawtnak tel lo baangih thukham tlun  cu vanram kainak a si lo, tinak a si. Pharasi pawl hi daan thiam tu le daan zirh tu pawl an si. An thiam zet. A Sinan an nih pawl hi duhdawtnak tel lo ih daan tlun menmen tu pawl an si. Daan tlunnak men ih vanram co tum pawl an si. Sihmansehla, Bawi Jesuh in Mathai 5:20 sungah hi tin fiangten in zirh: “Fiangten ka lo sim, Pathian duh mi tuahnak ah Daanthiam pawl le Farasi pawl hnak in nan fel sawn lo ah cun vancung ramah nan lut thei lo ding,” in ti. Vanram kai thei dingin Pathian duhdawtnak thinlung thawi thu kham tlun a ttul tinak a si. 

          Bawi Jesuh in Jn 13: 34 sungah hitin in sim hrih: “nan hnenah thukham thar ka lo pek: Pakhat le pakhat duhdaw aw uh! Keimah ih ka lo duhdawt vekin pakhat le pakhat nan duhdaw aw ve pei,” in ti. 

          Zumtu u le nau, leitlun ih remnak le daihnak um thei dingin duhdawtnak a ttul a si. Cun vancungram kai thei nak ding khal ah duhdawtnak a ttul a tengteng a si.

          Duhdawtnak nei thei sinsin dingin Pathian in nan zaten thlawsuah lo pe hram seh! Amen.