Damnak le Remnak Petu Jesuh (sim tu Rev. Fr. Lucas Sum), January 13, 2021.

“Damnak le Remnak Petu Jesuh”

Thuthangtha sim tu Rev. Fr. Lucas Sum

January 13, 2021

Siarding: Marka 1: 29-39.

          Zumtu u le nau, nan hnenah Pathian um hram seh, tiah thla ka lo camsak. Tuittumah “Damnak le Remnak Petu Jesuh” timi thu ngai tlang dingin ka lo sawm. Hmaisa an Baibal ngai ta hrih uh si.

          Marka 1: 29-39. “Jesuh le a dungthlun tu pawl cu, Jeim le Johan tel in, sinakok ihsin an feh ih Simon le Andru tein inn lam pan in an feh. Simon nupi ih nu kha khurhnat in a naa ih a tho thei lo; Jesuh a thlen veten a nat thuhla cu an sim. Mi naa hnenah cun a feh ih a kut kai tahrak in a tho ter. A khurhnat cu a reh lohli ih anmah a tuam hlawm thei.

            Ni a tlakih zanlam a si tikah mipi in mina hmuahhmuah le khawsia ih polh mi pawl kha Jesuh hnenah an rat pi. Cui khua ih mi hmuahhmuah cu cui inn hmai ah cun an ra tong khawm aw ttheh. Jesuh in an natnak phunphun kha a damter ih an sungih khawsia pawl tla a dawi suak ttheh. Khawsia pawl cu ttong kamkhat hman a ttong ter lo; ziangah tile zo a si ti kha an thei.” 

            Zum tu u le nau, tui kan siar mi Baibal cathianghlim sungah Bawi Jesuh in Simon nupi ih nu le a hnen ih an rak hruai mi mi damlo hmuahhmuah a dam ter nak thu le an sungih khuasia pawl a dawi suak ttheh nak thu fiang zet in kan hmuh. Hmaisa ah Bawi Jesuh ih minaa pawl a dam ternak thu von ruat hrih uh si. 

            Leitlunmi kan zaten, zumtu siseh zumlo tu siseh kan ttul ciau bik mi cu hardamnak a si. Kan harhdam lo a si ah cun kan thinlung a nuam thei lo, ziang ttuan khal kan paih lo. Curuangah milai kan damnak hrangah hmuh tin ramtin ah thupizet in siizung le siikhan kan nei. Siibawi le sayama tampi kan nei. Milai kan natnak ih zir in leitlun ah sii phunphun khal tuah vivo a si. 

          Natnak pakhatkhat ruangih kan damlo asilen siizung tthattha le siibawi thiamthiam hnen ah kan feh. Man khung zetzet in sii tthattha kan lei. Cutin mitampi cu damnak kan hmu sal ttheu. Cutikah mitampi cun in damtertu cu Siibawi pawl an si, tiah kan ti ttheu. A hman, a dik ve ko. Asinan, siibawi pawl ih thiamnak hi khuitawk in a ra a si, timi kan theih hngilh pang ttheu. Ngaingai ih kan sim asilen siibawi pawl ih thiamnak cu Pathian hnen ihsin ra mi a si. Pathian ih cahnak huham thawn siibawi pawl in in damter. Curuangah in damter tu ngaingai cu Pathian a si, tiah kan ti thei. Kan hrangih siibawi thiam bik le ttha bik cu Pathian a si, timi cing ringring uh si. 

           Cun a pahnihnak ah Bawi Jesuh ih khuasia a dawi suaknak thu ruat bet hrih uh si. Leitlun ah hin remnak le daihnak a duh tu le a hawl tu lawnglawng kan si. Curuangah ahleice in leitlun ah remdaih nak langsaar zet ih a tuah thei tucu kum tinten leitlun ih laksawng sunglawi bik pakhat a si mi “Nobel Prize” cu thupi zet ih pek a si ttheu. Asinan, khat lam ah cun, remnak le daihnak a siat suah tu pawl cu naa sa zet in hrem le nun sim an si ttheu. Curuangah misual pawl do tu le nun sim tu dingah ralkap le palik cu hmun tin ram tin ah an um. 

          Zumtu u le nau, thupi zet ih kan ruah ding mi cu hi kan leilung pi ah hin remdaihnak cu zo bik in a tuah thei ngaingai pei? Asilolen, zo bik in leitlun ih tthat lo nak hmuahhmuah a do neh thei pei? timi a si. Kan nih zumtu hrangah cun a fiang tuk. Leitlun ih tthat lonak pohpoh cu khuavang hnen ihsin a ra mi an si. Cuti asilen khuavang a dawisuak thei tu cu, zo si? Tuisun ih kan cathianghlim siar mi sungah hitin fiang zet in kan hmuh. 

          “Jesuh in an natnak phunphun kha a damter ih an sungih khawsia pawl tla a dawi suak ttheh,” a ti. Kan ruang pumpi damnak in pe tu ngaingai cu Jesuh lawng a si. Tthalonak lolen khuavang kan sung ihsin a dawtsuak thei ngaingai tu cu Jesuh lawng a si. A tawi zawngih kan sim asilen ruang pum thlarau damnak le a dik mi remdaihnak in pe thei tu cu Pathian lawng a si. 

          RVA Falam ihsin thuthangttha a ngai tu u le nau, nan zaten, Bawi Jesuh in ruangpum thlarau damnak le thinlung nomnak- thlawsuah lo pe hram seh! Amen.