Dungthlun tu 12 pawl ih Rian

July 7, 2022
Mt 10:7- 10 (15)

Dungthluntu 12 Pawl ih Rian

              Zumtu u le nau, Pathian in lo umpi hram seh. Tuittum ah “Dungtluntu 12 Pawl ih Rian” timi thu ruat khawm hrih uhsi. Hmaisa ah baibal kan ngai ta hrih pei. Mathai 10:7-10 tiang. Jesuh in dungthluntu hlei hnih pawl hnenah hitin a sim: Feh uh la, vancung uknak a nai zo, tiah va sim uh. Mina dam ter uh, mithi nungter sal uh, pharnat a nei mi pawl damter uh la khuavang pawl dawi hlo uh. Man lo in nan ngah mi kha man lo in va pe uh.Nan zal sungah sui tangka siseh, ngun tangka le dar tangka siseh, pai hlah uh. Nan khual tlawnnak lamzin hrangah rawl dilnak zaal siseh, angki hlei siseh, kedam le kianghrol siseh keng hlah uh.
              Hnattuan tupa cu a sam mi hmuahhmuah pek thluh a si ding. Himi cu Pathian ih ttongkam a si. Bawi Jesuh Khrih hnenah thangtthatnak um hram seh. Zumtu u le nau, tui kan siar mi Baibal catlang sung ihsin Bawi Jesuh ih dungthluntu 12 pawl a thu cah mi a thupi zet pahnih in ruat khawm uhsi.A pakhatnak cu “man lo in nan ngah mi kha man lo in va pe uh” timi a si. Bawi Jesuh in dungtluntu 12 pawl hnenah laksawng tampi a pe. Cumi pawl lak ah mipi pawl ih an ttul sam bik mi pawl
tuah sak theinak ding thlawsuah a pek mikhi, pakhat a si ve. Cuih thlawsuah sungah ziang pawl an tel? Vancung uknak a nai zo, timi va sim uh, a ti. Cun minaa pawl va dam ter uh, a ti. Cun khuavang pawl va dawi uh, a ti. A tawizawng ih kan sim a silen, ruangpum thlarau damnak le thianhlimnak va pe uh tinaka si.

              Himi hi mizakip ih an ttul bik mi a si. Ih, thuk deuh i thlarau lam ihsin kan von zoh bet hrih asile rundamnak thuthangttha cu a thupi tuk lawm man. Miza kip hnenah va sim tengteng uh, va phuang tengteng uh. Thuthangttha ngai tu pawl in zianghman leh rulh theinak lolen zianghman laksawng an lo pek thei lo ding a si khal len cui thutthangttha cu a sim thotho uh. A thupi tuk! Man lo in nan ngah a si lo sawm. Man lo ih mi a sim ve uh, a ti duh sannak a si. Cun a pahnihnak ih Bawi Jesuh in a dungtluntu 12 pawl a thu cah mi cu “nan zal sungah suitangka siseh, ngun tangka le dar tangka siseh, pai hlah uh,” timi a si. Sumpai kan timi hi ziangkim kan tuahnak le kan ttuannak ah a ttul hrimhrim mi a si. Asinan, khat lam ahcun ttih nung zet le ralrin ttul ngaingai mi a si. Ziangruangah a si tilen paisa in milai kan ruangpumpi le kan thlarua a siat suah thei vek in thuthangttha phuan khal a hngai hnok thei. Curuangah ralring uh, timi Bawi Jesuh ih a dungthluntu pawl ralrinnak a pek duhnak a si.

                 Cun paisa keng hlah uh, a timi te hin, ziangtitluk inrundamnak thuthangttha phuan hi a thupi le pawimawh a si, timi khal Bawi Jesuh in a lang ter duhnak a si.  Zumtu u le nau, dungtluntu pawl ih rundamnak thuthangttha an phuan suak vek in nannih khal in nitin nan nunnak ah phuangsuak ve thei dingin Pathian in thlawsuah lo pe hram seh. Amen.