A famkim bikmi Thlacamnak (sim tu - Rev. Fr. David Mangte)

A famkim bikmi Thlacamnak

Thuthangtha sim tu Rev. Fr. David Kap Cin Mang

June 16, 2022

Bawipai’ pekmi hnangam daihnak cu RVA ihsin thuthangtha a rak ngaitu nan zate parah a thar in thleng hram seh law.

Thinlung ti buai tertu thuthangsia tampi lakah thuthangtha ngai ding in rak ngaihtuah sak ringring tu kan biak Pathian hnen ah lungawi thu sim phah in, thuthangsia ngainak lawnglawng ah can hmang men loin thuthangtha thawn thlarau thazang lak thulhna khal kan thiam cio pei ti’n sawmnak khal ka run lo hlan duh a si.

Tuini ih Gospel thuthangtha siar dingah in khiahsak mi cu Mt 6:7-15 sungta a si ih, Cathianghlim kan run siar ta pei:

“Thla nan cam tikah Pathian thei lomi pawl ih sullam nei tuk lomi tong tampi an tong vekin va tuah hlah uh. Annih cun reipi thla an cam tikah Pathian in a thei cuang ding tiah an ruat. Anmah vek va si hlah uh. Nan tulmi cu nan dil hlan ihsin nan Pa in a thei cia zo. Curuangah hibangtuk in thla nan cam pei: ‘Vancung ih a ummi kan Pa, na hmin thianghlim cu upat si ko seh; Na Uknak thleng hram seh; Vancung ih na duhnak tuah a si bangin leitlun khalah tuah si ve seh. Nitin kan tulmi rawl in pe aw. Mi in kan parah sualnak an tuah ih kan ngaidam bangtukin, Kanmah ih sualnak khal in ngaidam ve aw. A harmi hniksaknak tuarter lo in, siatnak ihsin in hum hram aw.’ “Nan parah sualnak a tuahtu pawl nan ngaidam a si ahcun vancung ih a ummi nan Pa in a lo ngaidam ve ding. Sikhalsehla midang sualnak nan ngaidam lo a si ahcun nan sualnak cu nan Pa in a lo ngaidam ve lo ding.

Dudawtmi u le nau pawl, tuini ih kan Gospel siarmi cu Bawipai’ Thlacamnak tiih kan kawhmi Bawpa Jesuh ih a Dungthluntu pawl hnenih a rak zirhmi thlacamnak thuhla a si.

Thlacamnak timi cu ziangvek biaknak hrang khalah Pathian le minung pehtlaih awknak hrangah lo-theih-lo ih tulmi thil pakhat a si.

Thlacamnak ih thupit zia a theihfiang ruangah Jesuh Khrih khal in a Dungthluntu pawl hnenah thlacam ding dan, Pathian duh zawng le a famkim zawngih thlacam dan a rak zirh nak khal a si.

Cule, himi thlacamnak a zirhmi hmai le dung ih a tongmi te hi a thupi zet in ka hmu. Himi thlacamnak a zirh hlan teah, ziang nan tul timi hi nan Pa Pathian in a thei cia thluh ko; curuangah tampi tong ciamco ih dil rero a tul lo a ti. Cuti ih a sim theh hnu lawngah thlacam ding dan a vun sim fiang. Cun, thlacam dan a zirh hnu ah, Pathian ih ngaidamnak co dingah in tuahmawh tu pawl ngaidam hmaisa a tul zia a simfiang bet. Himi te hin, Pathian le kanmah lakih rualremnak lawng si lo in, kan minungpi/innhnen pawl thawn rualremnak neih ding a thupi zia khal a lang ter.

Kan Bawipai’ zirhmi thlacamnak tha teih kan zoh asile, kan lungput ret ding dan pawl tiang in simfiang thluh. Kanmaih duhnak lawnglawng langter ding hnakin Pathian ih duhnak sawn hawl hmasak ding a thupi zia khal a lang ter. Curuangah Pathian ih duh bikmi thlacamnak khal a si.

Himi thlacamnak thawn pehpar in, Fathers of the Church timi zumtu pawl rak hruai hmaisa biktu lak ih teltu Tertulian in Bawipai’ Thlacamnak cu Gospel thuthangtha finkhawmnak (a hnitchuk) a si a rak ti. Ti duhsan cu, hi thlacamnak ih in zirh duh mi ngaingai vekin thla kan cam tikah, thuthangtha nunpi rero kan si tinak a si. St. Augustine cun, Bible sungih khummi thlacamnak pawl hmuahhmuah kan zoh khal a sile, Bawipai’ zirhmi Thlacamnak sungih tel lomi thlacamnak timi a um lo a rak ti. Cule, St. Thomas Aquinas khalin, “Bawipai’ zirhmi Thlacamnak cu thlacamnak hmuahhmuah lakih famkim bik a si. Hi thlacamnak in ziang vek thil kan dil dingih ziangvek duhnak thinlung thawn kan dil ding timi tiang in zirh fiang” ti’n a rak ti ve. St. John Chrysostom cun hit’n a ti: “Himi thlacamnak sungih hmanmi tongfang ah ‘ka Pa’ ti lo in ‘kan Pa’ a timi hin bul-ta si lo in kan zate ih thlacamnak a si zia a langter” a rak ti. Ti duhmi cu, thla kan cam tikah kanmaih bulpak hrang lawng cam lo in, Jesuh Khrih ih ruangpum sungtel asimi zumtu zate hrang ih cam ringring ding a si tinak khal a si.

Duhdawtmi u le nau pawl, nitin kan nun ah Pathian thawn pehtlaihawknak nei ding cun, thlacamnak timi kan tul ringring. Ziangti’n thla kan cam ding; Pathian ih duh zawng thlacamnak hi ziang vek a si timi khal Jesuh Khrih in in rak zirh thluh zo. Hi thlacamnak hi kan hrangah a famkim bikmi thlacamnak a si.

Curuangah himi thlacamnak hi nikhat ah vei thum rori zumtu hmaisabik pawl in an rak cam theu timi thu khal Didache timi Dungthluntu pawl ih zirhmi pawl khumnak cabu sungah fiang zet in an tarlang.

Pathian thawn pehtlaih awknak nei ringring thei tu si dingah amaih duh zawngin thla a cam thei tu si kan zuam cio pei.

Bawipa amah rori ih in zirhmi thlacamnak hi a netnak ah kan vun cam tlang pei……

Vancung ih ummi kan Pa….