Famkimnak Jesuh (sim tu Rev. Fr. Dominic Hnin), January 7, 2021.

Famkimnak Jesuh (sim tu Rev. Fr. Dominic Hnin), January 7, 2021.

Famkimnak Jesuh

Thuthangtha sim tu Rev. Fr. Dominic Hnin

Christmas caan, Epiphany hnu tlawngkai nili ni (Jan. 07, 2021)

Siarding: 1Jn 4:19-5:4; Ps. 72:1-2, 14-15, 17; Lk. 4:14-22.

 

  • Kan Bawipa Jesuh cu Satan tukforhnak (Lk 4:1-13) a neh thluh zo hnu ah Galilee ram ah a ra kir sal ih mipi lakih thuthangttha sim hram a thok. Bawipa ih hnattuan kan zoh tikah amai palung si loin Pathian ih sersiamtu Thlarau (Lk 3:21-22) parah hram a bun ti kan hmu ding.

  • Cangaantu Luke ih hranga ahcun "Galilee ram" ti hi sullam a nei zet. Galilee ihsin Bawipa cu mipi lak ih hnattuan, thuthangttha sim, hram a thok;

  • Bawipa cu "zirhtu" dihmun ah tarlang a si. Ziang ruangah ti le Bawipa ih thuneihnak, a hleice in Vancungram thawi pehpar in Bawipa ih thuneihnak le a dungthluntu pawl in a lamzin an thlun a ttul timi thuneihnak pawl tarlang a duh phah ruangah a si.

  •  
  • Jerusalem lam ah feh in zonzaih harsatnak a tuar hlan ah amai rak tlanlennak hmun le ram, Nazareth le a kiangkap pawl ah thuthangttha a sim ta. A thusimmi pawl mipi in an theih tikah an lung a lut zet.

  • Bawipa cu amai tuahkel vekin Synagogue khawminn ah a feh. Cumi caan ah Bible siar an fial.

  • Synagogue khawmnak ah Bible voihnih an siar ttheu. Hmaisa ah Pentatueh ti ih theih ttheumi Bible sungtel cauk ih hmaisakbik uk nga sung ihsin siar a si ih neta cu Prophet cauk sung ihsin siar a si. Psalm hlasaknak le thluasuah peknak khal an rak hmang ttheu.

  • Bawipa cu Synagogue ih a rak feh ttheu vek in a dungthluntu pawl, Christian hmaisabik pawl kha pumkhawmnak an rawn nei vivo ti cu kan Bible sung ah kan hmu thei. (Acts 2:46; 3:1; 5:12)

  • Bawipa Jesuh cu Prophet cauk sung ihsin a siar ih a siar ngah mi cu Is 61:1-2 sungta a si ih "farah pawl hnenih thuthangttha sim ding, thinlung kuaimi damter ding, ral kaihmi pawl hnen le thawngtla pawl hnenah luatnak thu than dingah ii thlah" timi a si. Himi catlang cu Israel miphun ih covo le sinak ngahsalnak ding ih thukam timi "promise of the restoration of Israel" timi a si.

  •  
  • Bawipa Jesuh in himi catlang a siar tikah "ziang ti vek in simfiangnak a rawn nei pei, culole ziang vekin a rawn sermon pei" ti ah mipi in an hngakhlap. Mipi ih mit le thinlung cu Bawipa' parah a si thluh. Culai fangah Bawipa cun "himi Bible catlang cu tuisun nan mai hna theih ah a famkim" a rawn ti ta riai. Bawipa in cui ttongkam cu duhdah ih a ttongmi a si lo.

  • Kan Bible cun "Thlarau thianghlim ih huham cu a hnen ah a um" a ti. Thlarau thianghim ih awkam a si sawn. Prophet Isaiah (Is 11: 2) ih rak simciami Thlarau cotu a rak si. 

  • Joel 2:28-32 (mirang ahcun Joel 3:1-5) ahcun, "Bawipa ih NI a thlen tikah sersiamtu Thlarau a burh ding" ti a si ih cui Thlarau cu tu-ah Bawipa in hnenah a um a si. Cun  Acts 10:38 ah, "Nazaret mi Jesuh parah Pathian in Thlarau thianghlim le huham a burh" a ti thotho.

  • Cun Lk 3:21-22 sung kan zoh a si khal le Bawipa cu Jordan tivapi ah tihnimnak a ngah tikah Thlarau Thianghlim cu thuro bangin a parah a ttum ti kan hmu. Cu ruangah Bawipa cu Thlarau Thianghlim thawn a khat.

  • Khatlam zawng ih kan ti a si le, "Prophet Isaiah ih rak simsung ciami cu tu-ah Bawipa Jesuh ah a fam kim. Bawipa cu Thlarau Thianghlim in hriak a rawn culh ih cuticun thuthangttha aupitu dingah thlah a si.

  •  
  • Hlan ai ih an calaai, a hleice in Qumran ih an rawn hmuhmi ca pawl, kan zoh tikah Prophet pawl cu Pathian ih hriak culhmi an si ti in kan hmu. Bawipa cun "Bawipa ih Thlaarau cu ka parah a um ziangah tile thuthangttha phuang dingah hriak ii culh zo" a ti. Bawipa ih hnattuan cu Prophet Elijah le Elisha ih hnattuan thawn tahtthim a rak si ih cuticun Bawipa cu Prophet pakhat dinhmun ah a a rel. 

  • Bible ngantu Luke cun mifarah ti ih a ti tikah sumpai lamih farah pawl le social lam ih farah, mi lak va tlan tik ih nautat le hmuhsuam a tuartu pawl parih Bawipa Jesuh ih hmuhdaan le ruahdaan pawl khi a rel uar zet ti kan hmu thei. Himi mifarah pawl cun Bawipa ih rundamnak thuthangttha cu an rak cohlang a si.

  • Bawipa ih comi Thlarau thianghlim cu amai hrang lawngah si loin a thupibik sawn cu midang pawl run suah nak dingah a si sawn.

  • Bawipa in "tuini" ah himi Bible cu a famkim a ti. Himi ttongkam thawn "Prophet pawl ih rak simcia mi pawl an famkim caan a thleng" ti cu Bawipa in phuang suak.

  • "A ra ding timi cu nangmah maw na si, culole midang kan hngak hrih ding maw? (Lk 7:20) ti ih an suh tikah Bawipa cun "ka si, ka silo" a ti lo. "Nan hmuhmi le nan theihmi kha va sim uh! mitcaw in khua an hmu, ke bai pawl ttha tei in an feh thei, phaarnet nei pawl an dam, mithi pawl an tho (Lk 7:22)" a rak ti. Ti duhsan cu Bible hlun ih famkimnak a si. Curuangah "tuini" ah himi a famkim a tinak a si.

  •  
  • Jesuh ah faamkimnak hram a thok zo. Cui famkimnak cu mi zapi ih an co theinak dingah nangmah na ttul. Job bangin "Mitcaw pawl hrangah khua an hmuh theinak dingah an mit si tum aw; ke bai pawl hrangah an ke (Job 29:15-16)" si tum aw.

Add new comment

4 + 3 =