Fimnak tahfung (sim tu Rev. Fr. Dominic Hnin), December 3, 2020

Monday, December 07, 2020

Dec. 3, 2020 hrangih Thuthangttha, Thlarau rawl

Hngah caan Zarh khatnak, tlawngkai nili ni (Dec. 3, 2020)

Siarding: Is 26:1- 6; Ps. 118:1, 8-9, 19-21, 25-27; Mt. 7:21. 24-27.

Tuisun cu December 3 a si vek in St. Francis Xavier ih puaini a si vek in Rih parish, Tanpho parish le Lente parish mi pawl siseh, Francis Xavier hmi kengtu pawl nan za ten "HAPPY FEASTDAY" ti ah cibai ka lo buk hmaisa.
Tui kan caan hi Advent kan ti ih ''hngahnak caan'' a si. Jesuh ih suahnak kan lawm ding ti-ih tim kan tuahawk lai-ah Thuthangttha kan siarnak ah lungpi le vunnel parih innsak thu kan siar tikah 'a caan thawn a milh aw lo' a bang. Kan Bible cun "Bawipa, Bawipa ii titu hmuahhmuah in vancungram an thleng lo ding" a ti. Cule cui vancungram thlennak ding thu ihsin innsak thu ah in fehsan. A duhsan cu ''vancungram kai na duh a sile ziang na ttul'' ti simnak a si.
Voi tampi cu, 'Pathian zum aw la a tawk' ti vek, "Khrih na zum ahcun vancungram cu na ta" ti vek hi kan thei ttheu. Cun Bible ah, Rom 10:9 "Jesuh cu Bawi a si ti-ah na hmurka in na phuang ih Pathian in thihnak ihsin a thawhtersal ti-ah na thinlung in na zum ahcun rundam na si ding" ti ih kan hmuh tikah theihthiam a har phah ttheu.
"Pathian cu mi hmuahhmuah ih Bawi a si ih amah ii hmin a kotu hmuah hnenah siangzet in thluasuah a pek (Rom 10:12)" ti in kan hmu. Tuisun kan siarmi thawn a kalhaw khi a bang.
Bible cu amah le amah a kalh aw thei pei maw? Pathian ih ttongkam a si tikah amah le amah a kalh aw ngaingai thei lo.
Tu vek ih "Bible a kalhaw" ti vek ih a um mi khi "himi Bible catlang cu (1) zo pawl hnenah a sim, (2) ziang ruangah hi ti in a sim, (3) ziang si a duhsan, tivek pawl thawn kan zoh a si le cui Bible ih duhsan ngaingai kan theithiam dingih cuticun Bible a kalh awlo ti kan thei fiang ding.
Bawipa ii thu simmi a ngaitu pawl cu mah le tawk ii Pathian lam ah ka zuam a ti awtu pawl an si. Asinan cu pawl cu pawnleng lawng ah Pathian thu an thlun ii an sung muril cu thudang a rak khat. Christian deu pawl an si. Tuisun kan siarmi thuthangttha ii hmaisabik catlang cu christian deu pawl mawhthluknak a si. Asinan, cangantu Matthew cun Christian ngaingai le Christian deu pawl cu an vuirah ihsin thleidan theih an si a ti.
Awkam mawi le awkam ttha hi zocio in kan duh. Amah lawngte cui awkam cu awkam men in cem lo in nunnak ih a thlun a si le kan duh sinsin. Ziangah ti le awkam cu awkam ih a cem men a si le hmual fumfe nei nawn lo in a um, curuangah ttongnak ii "a kaa lawng" kan ti awk ttheunak a si. Aw le kam lawng ih "Bawipa" a titu pawl cu Christian deu, Prophet deu dinhmun in cangantu Matthew cun a tar lang.
Kan Bawipa cun prophet deu pawl hnenah "kaa lawng ih Bawipa, Bawipa, ti ih in ti rero hi vancungram ngahnak ding hrangaa tthathnemnak a nei lo" ti a si duh. Cuti a si le Vancungram ngahnak ding hrangah ziang a ttul. Vancungram ih umtu Pa Pathian ih duhnak tuah a ttul a ti. Himi thu cu fiang deuh dingah Lungto parih innsak le vunnel parih innsak thu in tahtthinak a pek. Amah Bawipa ih ttongkam a thluntu cu mifim a si ih a thlunlotu cu miaa din hmun a si. Bawipa ih ttongkam thlun le thlunlo timi cu fimnak ih tahfung a ra si. Cumi thei in na duhduh hril aw ti ah kan hmaiah duhhrilding in pek.
Kannih Laimi hi a tlangpi thu in tlangpar ih ummi kan si tikah lungto parih innsak le vunnel parih innsak tivek cu kan theihthiam a har deuh men thei.
Lairawn, Kalay sehvel ih um laimi pawl ih inn sak dan le laitlang ih um laimi pawl ih inn sak dan ka vawn rel ta hnik ding.
Kalay sehvel ahcun khurram a rawn ii thli a hrang tam tuk lo. Inn niamte an sak ding tikah tthuamkhur lai mumal lo in leilung parah an toh men ttheu ii, cui tthuam cu pil lo dingin lungpheng hman an dam bet lai. Tthuam le leilung an dai aw ngaingai lo ti theih a si. Laitlang ahcun khurram a rawnlo ih a hraap tikah tthuam phunnak dingah khur thuk pi in kan lai ih tthuam khat hnu tthuam khat fek te in kan phun. Cuihnu lawngah inntlang tivek kan tuah. Lairawn lam bangin tthuam khur lailo ih tthuam phun tum sehla kan innsak tum cu a par hman kai ngam lo in kan um ding. Thli a hran hlan ihsin a ril pangke tiah thlaring in kan um ringring ding.
Tuisun kan siarmi Bible sungih kan hmuhmi Innsak thu ah hmunrawn le caankel, nikhua kel hrangah vunnel parih innsak le lungto parih innsak hi an dang aw tuk lo. Ziangtik caan ah a dangaw ih a poimawh ti a si le thlisia a hran caan, ruahsia a sur caan le tidai a len caan ah a poi mawh.
Lungto par ih innsak cu a hramto a hnget ruangah thlisia le ruahsia ah a siatbal lo. Vunnel par ih sakmi inn a si le thlisia ruahsia a um cun a siatbal lohli thluh men.
Inn kan vawn ti tikah a simduhmi cu kan beunak hmun, kan hnangamnak hmun, kan bu a hlumnak hmun, kan sungkua kan nuamnak hmun, kan ziangkim a si. Kan inn a bal kan ti tikah cui kan 'ziangkim' cu a cemral ti a khih hmuh.
Tuisun kan siarmi Bible ah innsak thu kan hmuh mi ah kan thlarau hrang ih innsak ding thu cu kan leiram inn thawn in simnak a si. Pathian thawi kan peh tlaih awknak cu fek sinsin dingah a hngetkhohmi pehtlaihnak innpi kan sak ding a ttul.
Cumi Pathian thawi pehtlaihnak inn cu kan zumnak runinnpi a si ih cui runinnpi cu "Bawipa, Bawipa" ti lawng ih sak theih a si lo. Cumi cu thli lak ih a hloral ding men awkam a si. Kan hna ih kan theihnak lawngih kan cawl a si le hram a nei lo mi thlaici vek a si pang ding (Mt 13:3-6). Cui kan theihmi Bawipa'i thuthangttha cu kan nunnak ih a thlun a ttul.
Bawipa in a rak phuanmi thuthangttha cu ka ttong mi a ti ih cui a ttongmi cu thukham vek in hmual a nei ih a fek. Kan Bawipa, hi leitlun ih a rak tlanlen lai ih a ttongkam pawl cu tui kan san ahcun Bible thar kan timi an rawng si.
Bawipa thawi kan pehtlaih awknak a fek maw feklo timi cu kan theihmi a thuthangttha cu kan nun in kan thlun maw thlunlo timi ah a hngat aw. Ziangah ti le Bawipa in "hi ka ttongmi a thei ii a thluntu cu lungpi parih innsaktu, a thlunlotu cu vunnel parih innsaktu bangtuk a si (Mt. 7:24, 26) a ti. Kan nunnak cu Bawipa ih ttongkam ah hram bun in kan tungding ding tinak a si. Culawng ah Pathian thawi kan pehtlaih awknak a nget ding.
Hmaisa kan siarmi Bible, Isaiah 26:1-6 sungah "amah Bawipa rinsan ih hmainor ding" ih in sawm vek in Bawipa ih ttongkam ah kan thinlung re in hmai nor uhsi. Bawipa ih ttongkam thawn kan nunnak ceimawi uhsi.