Harnak phen ih Jesuh hmel mawi

Harnak phen ih Jesuh hmel mawi 

Nov 27, 2019 (Wed)

Dan 5: 1-6, 13-14, 16-17, 23-28, Lk 21: 12 - 19

          Thuthangtha ngai tu nu le pa, u le nau, ruangpum, thinlung le thlarau ih dam cah nak nan parah thleng hram seh tin Khrih hmin in thla za ka cam. Tui sun November 27 ih kan siar mi Bible Lk 21: 12- 19 sung in thlarau thazang la tlang ding  in ka lo sawm.

          Kan thu luu ding ih ka hrilmi cu "Harnak phen ih Jesuh hmel mawi" ti a si. Har nak phun tam pi sung ah, Jesuh hi a thup ten a tel theu. Cui Jesuh ih hmel cu har nak in a phen theu ih mitampi in kan hmu ngah lo theu. Zumtu hrek khat pawl lawng in cui, a thup ih um Jesuh hmel mawi cu fiang ten an hmu theu. Kan siar mi Bible sungah"kaih nak, hremnak, thawngtlak nak nan tuar ding, cucu nan hrangah thuthangtha sim nak can tha a si ding" Jesuh in in ti. Thuthangtha sim nak can tha timi hi ziangvek so a si. “Jesuh Khrih ih in duhdawt nak, in run dam nak le Pathian sunlawinak phuan suah ding can tha a si” ti nak a si. Jesuh Khrih a maih nun hrimhrim ah fiangten kan hmu.  Jesuh Khrih cu thuthangtha a sim le minaa pawl dam nak a pek rero lai can hnak in hrithawn an tem, an hrem le thianglamtah par ih an khen can ah a maih in duhdawt nak le in run dam nak, Pathian sunlawi nak hmelmawi a lang sawn. Minung mit menih zoh tu pawl hrangah cun fihnung, tihnung thihsia a si. Thlarau mit ih zoh thiamtu pawl hrangah cun duhdawtnak, run damnak, ngaithiam nak, sunlawinak, nehnak kan hmu. Jesuh ih har nak sungah Pathian ih hmel mawi fiangzet in kan hmu ngah. Filipi 1: 12 "Ka par ih a thleng mi thil pawl hi thuthangtha karh zai tertu riangri ah an cang,” tiah mithianghlim Paul in a ti. Jesuh Khrih ruangih kaih, hrem le thawngthlak a tuar hi cantha, can sunglawi in a pom, a let khan thei. Ziangruangahtile har nak phen ih thu pawl Jesuh hmel mawi kha fiangten a hmu ngah.  

          Kaih, hrem le thawngtlak timi hi phun hnih in kan la thei. Phun khat nak cu Jesuh thuthangtha ruangih kaih, hrem le thawngtlak taktak a si. Zumtu tam pi in a rak tuar ih, Martyr ih thih nak tiang tuar tu khal tampi an rak um. Zumnak lam an kan nu kan pa an si. Zohthim tlak an si tiah an puai kan tuah, upat nak kan pe, thla cam sak kan dil. A tha a sunglawi zet. Har nak lak ih Jesuh hmel mawi hmungah tu an si. Phun hnih nak cu dam lo nak, naat sia le vansiat nak a phunphun in, in kai in hrem ih thinhar beidong le mithli thawn kan nun cu thim nak in in khuh ngah theu. Hitivek ih kan sun a tawi ih, zan a sau can ah hin Jesuh ih hmel mawi a thup aw theu. Har nak lak ih Jesuh hmuh hi a ol hrim hrim lo. Asinan, thlarau thianghlim ih tleu nak le zirh nak co ngah tu zum tu cun, nat nak zonzaih nak, beidongnak thimkhawzing sah deuhdeuh ko seh, Jesuh ih, hmel mawi fiang pempem in a lang sinsin. Bawipa a hmin thangthat si ko seh, Amen.

Job bung khat nak ah Job cu a tilva zate le a fale pawl ni khat ah an thi, an cemral thluh nan "Bawipa’n in pek ih a tu ah a la sal, A hmin thangthat  siko seh,"a ti thei. Ninghan mitthli lakah Bawipa in hmel fiangten a hmuh ringring. Habakuk 3:17- 18 ah “Theipi in rah an neih lo ih Sabit hri ih Sabit a rah lo hmanah, Olif kung ih olif rah an siat ṭheh ih, Lo in rawl a suah lo hmanah, Tuu pawl an thih fai ṭheh ih, Caw inn tla an lawng ṭheh hmanah, Ka lungawi in ka thin a nuam thotho ding; Ziangahtile Bawipa Pathian cu i runtu a si” a ti. Pathian hmelmawi hmu ngah tu ih nun cu a va mawi ve. Tirhthlah 1:56-60 ah Stephen cun "Zohhnik uh, Van a ong ih, Pathian vorhlamah milai Fapa a ding ka hmu" a ti. Pathian le Jesuh a hmuh ngah ruangah  lungto ih amah deng rero tu pawl hrangah thla a cam sak thei. Jesuh hmelmawi hmu ngah tu cu harnak lakah Pathian thangthat le lom hi thaw an ti, nuam an ti. An nun duh a va um ve, uar a va tlak ve, Unau, nang le kei hrang ah Van cu a ong aw zo. Van zoh aw la Pathian le a vorh lam ih to Jesuh na hmu ding Pa Pathian ih Vancung sangka cu ong in Fapa Jesuh in pe. Thlarau thianghlim khal pek kan si. Kan kiangkap ah siseh, kan ruangpum le kan nunnak ah siseh Jesuh Khrih ih hmelmawi hmu cio tlang uhsi.          

          Tuisun ih kan siar mi thotho Daniel bung (5) sungah Siangpahrang Nebukhanezar ih fapa Siangpahrang Belshazar in puai a tuah ti thu kan hmu. Jerusalem Biakinn ih Pathian raithawinak ih an hman theu mi khuat hai le kheng thianghlim pawl cu Babilon ram ah an tlun pi ih, duhdah le ziangsiar loin puai tuah nak ah cun an hmang. Pathian ih thinheng nak cu siangpahrang parah a thleng ih puai an tuah zan rori ah siangpahrang Belshazar cu thah a tong. Puai tuah rero khal ah Jesuh a tel lo ah cun thih nak le tahnak men asi. Nuam nakin zankhat le sun ser hman a daih lo. Har nak tuar rero khalah Jesuh a tel ahcun nuam nak le lungawi nak lawnglawng asi. Cui lungawinak le nuamnak cu nun sung le kum khua tiangih a hmun ringring fawn. A tep ngah tu pawl lawng in a thawtnak an thei. A tong tu pawl lawng in a thawt nak an ngah. A co tu pawl lawng in lawm man an hmu. Pathian hmelmawi cu hlinglu khum mi Jesuh hmaiah a lang, a kut a ke thir khen hma le fei sun nak a hnak hma ah a cuang. Har nak ah hin Jesuh Khrih hmelmawi a lang. Zoh aw, na hmu ding. Hmu aw lungawi nak le nomnak in na khat ding. Hminthannak, that nak le sunlawi nak cu Bawipa in co hram seh. AMEN.