Herod ih Tihnak (sim tu Rev. Fr. Peter Zin) July 31, 2021

“Herod ih Ṭihnak”

Thuthangtha sim tu Rev. Fr. Peter Lal Zin Thang

July 31, 2021

Siarding: Lv 25: 1. 8-17/ Ps 67: 2-3. 5. 7-8(4)/ Mt 14: 1-12

            “A ṭhami ṭihnak le a ṭha lo mi ṭihnak tiin a um ih a ṭhami ṭihnak kha nei in a ṭha lo mi ṭihnak kha nei lo tum ding kan si.”

            RVA Falam Service in Thuthangṭha a ngai tu duhdawtmi zumtu nu le pa, u le nau pawl, kan Bawipa in a lo kilkhawi hai sehla hnangam daihnak a lo pek hai hram seh. Tuni kan siar dingmi Gospel zoh in thlarau thazaang lak zuam cio uh si tiah ka lo sawm duh hai a si. Kan siar dingmi Gospel cu Matthai 14:1-12 tiang a si ih kan ngai ta hrih pei.  

Matthai 14:1-12 

            Cuih tikcu ah Galilee ram uktu Herod in Jesuh thuhla a thei. Herod in, “Hi pa hi baptisma petu Johan a nungsalmi a si ko. Curuangah a si hitiih mangbangza a tuah thei,” tiah a kuthnuai bawi pawl kha a sim. Cuih hlanah Herod in Johan kaih ding thu a pe; cule an kai ih thirhri in an khih hnuah thawng ah an thlak. Ziangah cutiin a tuah tile a naupa Filip ih nupi Herodias ruangah a si. Baptisma petu Johan in Herod cu, “Herodias na ṭhit hi a dik lo,” tiah a rak ti ṭheu ruangah, Herod in Johan cu thah a duh, asinain Judah mi pawl a ṭih, ziangahtile Johan cu profet a si tiah an ruahmi a si. Cule Herod suah ni ah Herodias fanu cu mizapi hmaiah a laam ciamco. Herod cu a lung a kim ngaingai ih a hnenah, “I dilmi pohpoh ka lo pe ding tiin ka lo kam a si,” tiah a ti. A nu ih ruahnak a pek vekin Herod hnenah, “Hitawk hmun rori ahhin baptisma petu Johan ih lu cu darkheng in i pe aw,” tiah a fanu cun a ti. Cutikah Siangpahrang bawipa cu a riah a sia ngaingai. Sikhalsehla a sawmmi pawl hmai rori ih thukamnak a tuah zo ruangah a dil vekih tuah dingah thu a pek. Curuangah Johan cu thawng sung rori ahcun a lu a tanter. Johan ih lu cu darkheng in an run keng ih Herodias fanu cu an pek; anih in a nu Herodias hnenah a fehpi. Cun Johan dungthluntu pawl cu an ra ih a ruak an lak ih an phum; cuih hnuah Jesuh cu an va sim. (Bawipa ih Thuthangṭha a si.)

             Himi Baptisma petu Johan ih a thihnak thuanthu kan siar tikah mi a riahsia ter thei zet a si. Miding pakhat mi ṭha lo hrekkhat ruangah thatnak a tuar. Herod hi Johan ih thihnak ah thuneihtu a rak si ruangah Herod in a that tiin kan ti thei a si. Kan thei thiam cio ko ding. Herod in Bawi Jesuh thu hla a theih tikah; mangbangza a tuah mi pawl a thei tikah, “Hi pa hi baptisma petu Johan a nungsalmi a si ko. Curuangah a si hitiih mangbangza a tuah thei,” tiah a ti. A thinlung sungin Johan a mang loh li. Ziangruangah a si pei? Ziangruangah tile Johan kha a dik lo pi in a that dah ruangah a si tiin kan tile a sual lo ding. Johan par ih a tuah mi hi thil ṭha lo a si timi a thei keu keu. Cumi thil ṭha lo a tuah mi nih a ṭhih ringring. A hngil thei lo.

            Ṭihnak thu mal lai kan ruat ta hrih pei. Ṭih kan ti tikah a ṭhami ṭihnak le a ṭha lo mi ṭihnak tiin a um. A ṭhami ṭihnak cu ziang a si pei? Pathian ṭihnak kha a si ko. Thufim 1:7 nak ah, “Pathian ṭihzah cu fimnak ih hramthoknak asi,” a ti. “The fear of the Lord is the beginning of knowledge.” Cun Matthai 10:28 ah Bawi Jesuh in, “Taksapum a that thei nain thlarau a that thei lotu pawl cu va ṭih hlah uh. Takpum le thlarau a pahnih in hell sungih a that theitu Pathian kha va ṭih sawn uh,” a ti. Kan Bawipa in kan ṭih dingmi cu Pathian a mah lawnglawng hi a si a ti ih culo thil dangah cu ṭih hlah uh, ṭih hlah uh tiah a dung thlun tu pawl kha a zirh ringring a si.

            Ṭihnak kan ti tikah a phunphun cu a um ko ding nan tuni ih kan rel duhmi cu Herod ih ṭihnak vek kha a nei tu kan si lonak ding ah ka sim duh mi a si. Herod ih ṭihnak vek hi a zoh hman ih ziang ti rero khal ṭul lo in mah ten ṭih rero men hi a si. A mah hi bawi pakhat a si, siangpahrang asi. Asinan a siangpahrang sinak nih a ṭihnak thinlung a a hlo ter thei lo. Semtirnak ah Kain in anau Abel athat tikah Pathain in, “A tuah nang cu camsiat na si ih hi na umnak hmun ih sin dawihlo na si ding,” a ti tikah, Kain in a ṭongmi pakhat cu, “Hi ram le na hmaika in i dawihlo ih tlunah lei parah hin inn nei lo le mivakvai ka si dingih i hmutu pohpoh in, in that ding,” tiiin a ti. Hitawkah Kain in ziangruangah i hmutu pohpoh in in that ding tiah a ti? Ziangruangah a ṭih? Thil ṭha lo a tuah ruangah a si. Thil ṭha lo a tuah ih Pathian thawn a hla tikah ral nei ti khal si lem lo in a mah ten a ṭih rero men a si.

            Mi pakhat in thil a fir ih a tlung lam ah lamzin ah palik pawl a tong. Palik pawl in ziang khal an ti lo, ziang khal an thei lo, an kiang ah mi pakhat a feh ruangah an her ih an zoh ve men. Asinan mi thil fir pa cun palik pawl in a lam an her tikah a ṭih, palik pawl lam her ngam lo in a um. Palik hmu kha cu um hrih sehla, thil ṭhalo pakhatkhat kan tuah ngah pang tikah zo hman in ziang in ti lo hman ah in ti pang pei maw tiah ṭihnak thinlung a mah tein a ra lut ṭheu a si. Herod in Johan kha a thah ruangah Bawi Jesuh in mangbangza pawl a tuah tikah ‘aih Johan a nungsal sipang pei maw tiah,’ a thinlung sung teah a suak loh li. Cumi lawng si lo a nun sung hmuahhmuah ah a tu le tu in a thin sung te ah a thil ṭha lo tuah mi nih a ṭhih ringring ding ti cu theitheih a si.

            Ziangtukin thazaang nei in kan cak hman sehla, siangpahrang kan si hman sehla, kan ral pawl khal kan thazaang in cu kan neh ṭheh hman sehla, kan sihnak nih thil ṭha lo kan tuah nak ruang ih kan ṭih mi khi a hlo ter thei lo ding. Kan kaa in ka tih lo kan ti hman ah kan thinlung sungten ṭihnak kan nei ringring ding asi. Asile sual zomi cu remsal a theih lo ziangtin kan ṭihnak thinlung kan hlo ter thei ding? A hmanmi sualsirnak thawn in kan hlo ter thei ding asi. Herod in Johan thihnak ah a lung a awi lo. A poi khal a ti zet ko. Asinan a poi tuk timen hi sualsirnak fam kim a si lo. A poi kan tinak men in damnak in pek thei lo ding a si. Sualsir ngaingai in Jesuh Khrih sungah nunnak thar in kan nung sal a si le cu ziang vek sualnak si hman sehla damnak a um a si.

            Duhdawtmi nu le pa, u le nau pawl, Pathian lawng kha ṭih in a ṭha lo mi ṭihnak, Herod ih ṭihnak vek, a nei tu kan si lo thei ding in zuam ringring uh si. Bawipa in thazaang thluasuah in pek cio hram seh.

Fr. Peter Lal Zin Thang (Hakha Diocese)

Add new comment

4 + 0 =