Hman Awk Tlakmi (sim tu Rev. Fr. Joseph Ro Nei Thang) November 12, 2020

Hman Awk Tlakmi

Thuthangtha sim tu Rev. Fr. Joseph Ro Nei Thang

November 12, 2020, Nili ni.

Siarding: Philemon 1:7-20; Luka 17:20-25.

          Bawi Khrih ah duhdawt zetmi nu le pa, u le nau pawl, “kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghlim ih pumkhat sinak pawl cu nanmah thawn um hram seh” tiah cibai ka run lo buk hai. Tuihni cu 2020, November thla ni 12, Tlawngkai nilini asi. Cun November ni 12 cu St Josaphat ih puaini tla asi. Amah cu Ukrain rammi asiih Bawipa hrangah thihnak a tuartu Bishop pakhat asi. Tuihni ih kan siar dingmi Pathian ih ttongkam pawl cu Philemon 1:7-20 tiang le Luka 17:20-25 tiang pawl ansi pei. Kan ruah khawm dingmi cu “hman awk tlakmi” tiah asi pei. 

          Philemon cakuat kan siar tikah Philemon thu kha hmaisa in kan zoh ta a ttul asi. Philemon cu milian pakhat asiih Kolose khua ih zumtlak zetmi Christian pakhat asi. Amah in Onesimus timi sal a nei. Thil ti sual thu, mawhpuhnak pakhat ruangah a sal Onesimus cu Philemon hnen ihsin a tlan suakih Rome khawpi ah thawng tlatu Paul thawn an ton awk asi. Paul in Onesimus cu Pathian thuthang ttha a simnak thawngin zumtu pakhat ah a cangih mifel,mittha ngaingai ah a cang. Cun Onesimus a neitu Philemon hnenah ca a kuat. Himi cakuatnak cu tuih sanah sisehla Onesimus cu mittha asi tiih tthauhkhansa nganmi a rak si. Cumi a nganmi tthauhkhansa sungah tla amah lawngih zohfelnak silo in Timothy ih nemhnemnak tla Paul in a telh cih hi asi. Tthaukhansa umlo in Onesimus cu a neitu Philemon hnenah a kir sal ahcun daan an neimi vekin amah kha an hrem ding, cun a cal parah maw a ban ah maw “SAL TLANPA” tiah hminsinnak ca a ngan ding asi. Cat la cun thil kha meisa sungah sen zet ko tiangin an rawh dingih cumi thir thawn an ngan ding asi. Philemon cakuat sung ihsin kan thlarau hrangah ziangtin tthat hnemnak pawl a tel asi ti kha ruat tlang hrih uhsi. 

          Onesimus timi cu “usefulness” tican asiih kan ttong incun “hman awk a tlakmi, zumawktlakmi, a santlaimi, tthathnemnak a neimi” tiah a sullam a um asi. A hlan ahcun Onesimus cu Philemon ih sal a rak si dah. Mittha pakhat asi tiah Paul in Onesimus cu a zum. Rukrunak thawn mawh puhnak a tong nain Paul nihcun Onesimus cu rukru asilo ti a zum. Curuangah Philemon 1:18 ah Paul in “thil a ti sualmi le a lo baakmi a um ahcun keimah ih sam dingin ret aw. Keimah Paul in ka kuan ding” tiah Philemon hnenah ca a kuat asi. Paul in Philemon hnenah Onesimus kha ngaithiam dingah le mittha mifel asinak cu a sim-ih a rak cohlan sal dingah khal a forh hai asi. Cun hlan ahcun sal a rak si ko nain a tun ahcun sal hnakin uak sawn in le Khrih sungah uanu tiah cohlang ding asi tiah Philemon 1:16 ah in sim fiang. Cule Paul in Philemon tla siseh, Onesimus tla siseh mittha ngaingai ansi tiah ruahsannak a nei asi. Curuangah Philemon 1:21 ah Paul in “ka lo fialmi kha na tuah ding ti ka zumih ka lo fialmi hnak hmanin tam sawn in na tuah ding ti ka zum asi” tiah a ti. Cuhlei ah cang 17 ah “keimah hi na hnattuanpi ah i ruat asi ahcun keimah i cohhlan vekin amah (Onesimus) khal rak cohlang ve dingin ka duh asi” tiah a ti asi.

          Philemon cu milian le thinlung ttha neimi Christian a rak siih Paul kha bawmnak a pe ringringtu tla asi. Curuangah Paul a bawm vekin le a zoh ttha vekin Onesimus tla zoh ve dingah a fial asi. Paul ih cakuat ruangah Philemon in Onesimus kha a cohlang sal maw cohlang nawnlo ti cu Bible ah nganmi zianghman a um lo. Asinain amah cu sal ihsin a luat zo ruangah neta ah ca a zir salih Bishop ah hrilnak a ngahih Ephesus khua ah Bishop a ttuan asi. St Ignatius cu Rome ukatu siangpahrang ih thupeknak thawngin kai a tuarih Rome ah an hruai tikah zan khan ahcun St Polycarp hnenah a riak. St Ignatius in Polycarp kha Bishop Onesimus thawn hnattuan caan a nei thei ruangah a lawm hai asi. Rome uktu siangpahrang Domitian le Trajan caan ah Onesimus cu hremnak a tuarih thir cikcin thawn Rome ah an hruai ih Rome khawpi ah lungto thawn an den that asi tiah pupa pawlih zumnak ah a thihnak thuanthu cu kan hmu thei asi. Mithianghlim Onesimus ih puaini cu February in 15 ah siseh tiah 2004 ah tuah dingin Rome Calendar ah in ret sak asi. 

          U le nau pawl, Onesimus cu thinlung ttha neimi sal bawah ihsin zumtu pakhat ah a cang. Philemon in hman awk tlaklo, hman awk tthalo tiah a hrem dah hman sehla a tu ahcun a hmin thawn kaih awin hman awk tlak zet ah a cang asi. Zumtu pakhat ihsin luatnak a ngahih cazir theimi dinhmun ah a thleng. Cunah ihsin Bishop ah hrilnak a ngahih a hnattuan fel zetin a ttuan theiih zumtu Khrihfa kaihzaitertu a rak si ruangah a nunnak tla Pathian hrangah pum apek ih thih tiang tuarin asi. Mithianghlim Martyr pakhat ah a cang asi. 

• Kannih kan bawah sungah tla amah vekin nitin kan nunnak fel ve ding kan ttul asi. Pathian nih in hmang duh asi ahcun ziangtlukin harsa hman sehla luatnak kan ngah dingih Pathian ih palai, Pathian rongbawltu, Pathian ih siahhlawh ah kan cang ding asi. 
• Kanmah lam ihsin Pathian in hman awk tlakmi a siahhlawh si dingah zuam uhsi. Ram hrangah siseh, Kohhran hrangah siseh, veng le hnen pawl hrangah siseh, khua hrangah siseh, miphun tthathnemnak petu, rinsan tlakmi si hram uhsi.
• Zozo khal “hman awk tlaklo” ti hlah uhsi. Hman awk tlak asi theinak dingah amah kha hmang thiam cio uhsi. 
• Bawipa ih hman awk tlakmi kan si thei cionak dingah Pa le Fapa le Thiang Thlarau in nangmah cu lo thlawsuah hram seh. Amen.