Hmuhnak ihsin hmunak

Rev. Fr. Joseph Ro Nei Thang ih thuthangtha sim mi

(April 16, 2020 - Nili ni)

Siardiang: Tirhthlah 3:11-26, Luka 24:35-48

Bawi Khrih ah duhdawt zetmi nu le pa, u le nau pawl, thihnak a nehih a sunglawinak huham thawn a thosaltu Jesuh Khrih ih hmin in “nan parah daihnak le hnangamnak um hram seh” tiah cibai ka run lo buk hai. Tuihni cu Thosal tlawngkai nilini asi. Catholic Kohhran in Thosal puai cu rawl einak thawn asi ahcun nikhat lawng kan tuah men thei nain Missa raithawnnak thawn asi ahcun Thosal puai cu niriat sung sunglawi zetin kan tuah ttheu asi. Kan siarmi Bible pawl tla cu Jesuh Khrih thawhsalnak thawn a pehpar awmi pawl lawng kan rak siar ttheu asi. Tuihni ih kan siar dingmi Bible pawl tla cu Tirhthlah 3:11-26, Luka 24:35-48 asi pei. Tuihni ih kan ruah khawm dingmi cu “Hmuhnak ihsin hmunak” tiah asi pei.

Tuihni ih kan siarmi Luka Gospel cu mizan ih kan siarmi Gospel ih a pehmi pawl ansi. Mizan ih kan siarmi pawl kha malte kan ruat salta pei. Bawipa Jesuh thihnak ihsin a thosal ni ah dungthluntu pahnih cu Jerusalem khua ihsin Emmaus khua ah an va tlawngih lamzin lakah Jesuh in a va pan. Asinain Bawi Jesuh a si lam an thei lo. Lamzin an feh phah ah Jerusalem khawpi sungih thil cangmi pawl an ruat khawm rero. An fehnak ding khua ah an thlen hlan te ah Jesuh in feh lan tumih dungthluntu pahnih in “kan hnenah ra riak ve aw, khua a hung thim zik zo” tiah an sawm. Jeuh in a aw ih cun zanriah an hil tlang. Cun sang cu a lakih thla a cam hnu ah a phel ih a zem hai. Cutik ah an mit an vaang ih Jesuh a si kha an thei thiam. Asinain an mit hmuh ah a hlo sal. An pahnih in an lau ttheh. Hmakhat te ah Jerusalem ah an kir salih an tonmi hmuahhmuah cu Dungthluntu dang pawl an va sim. Cutin an tonmi pawl an va sim rero lai ah Bawipa Jesuh cu an hnenah a langih “nan hnenah daihnak um hram seh” tiah a ti asi. Bawipa an hmu nain dungthluntu pawlin Bawipa asi ti an zumlo ih an ttih tukih muthla hmu ah an ruat. Curuangah muthla asilo zia cu Bawipa in tetti a pyah sal.

Bawipa Jesuh a thosal zo tiah an zum theinak dingah

1} Bawipa in a hmuh tthul asi.

Bawipa in a hmuh lo ahcun zokhal in Bawipa kha an hmu theilo ding asi. Bawipa in amah le amah a hmuh lo ahcun Maria Magdalena in hmuan kiltu ah a ruat; Bawipa in amah le amah a hmuh lo ahcun Emmaus khua ih khualtlawngtu dungthluntu pahnih in tla Bawipa cu khualtlawngtu menmen ah an ruat; Bawipa in amah le amah a hmuh lo ahcun Dungthluntu dang pawlin muthla ah an ruat. Bawipa Jesuh in amah le amah Maria Magdalena a hmuh ruangah Bawipa Jesuh a hmu ih “raboni” tiah ati, asullam cu saya ti duhnak asi; Bawipa in amah le amah kha Emmaus khua ih khualtlawngtu dungthluntu pahnih cu a hmuh ruangah annih in Bawipa an hmu ih an thinlung cu meisa kaang vekin an um asi; Bawipa in amah le amah a hmuh ruangah Dungthluntu dang pawlin Bawipa an hmu ih lungawinak thawn an khat.

2} Bawipa kan hmu theinak dingah zumnak mit kan nei a ttul asi. Bawipa Jesuh san lai ah Israel miphun pawlin thihnak ihsin thawhsalnak cu an pom theilo, an zum theilo asi. Curangah Mk 9:9-10 ah tlangpar ihsin an rung ttum lai ah Jesuh in “Mi Fapa hi thihnak ihsin thawhtersal asi hlan ahcun a tuih nan hmumi cu zohman nan sim lo pei” tiah thu a pek. Cuih thupekmi cu an thlun; asinain “thihnak ihsin thawhsal” timi hi ziang asi pei tiah pakaht le pakhat an sut aw rero” tiah kan hmu thei. Jesuh dungthluntu pawlin an thei thiamlo vekin Maria Magdalena in tla a thei thiam ve lo asi. Curuangah thlan ah a va fehih Bawipa ih ruak kha ttha tein zihmui thuh ta sal a duh ih asi. Bawipa an vui lai ah Sabbath ni a nai zo ruangah zamrang zetin an vui ih cumi cu Maria Magdalena in a lungkim lo asi. Curuangah zingpit tein thlan ah a va fehmi asi. Bawipa a thosal ding tiah a simcia mi a zum ruangah a va fehmi asilo asi. Tuihni kan siarmi Bible ah tla dungthluntu pawlin Bawipa an hmu nain an zum thei hrihlo ih Bawipa in a kawk hai asi. Thihnak ihsin tho sal tiih zumnak a thupi zetmi asi nain an thluak in an ban theilo mi dinhmun asi. Curuangah St Thomas Aquinas in “Dungthluntu pawl cu zumnak mit thawn Bawipa Jesuh an zoh tikah an hmu asi” tiah in zirh asi. Zumnak mit thawn sangphelmi kha dungthluntu pawlin an zoh tikah Bawipa asi ti kha an thei thiam. Kannih tla Missa raithawinak ah Bawipa kan hmu theinak dingah zumnak mit thawn sang le sabitti kha kan zoh a ttul asi. 

Bawipa in thihnak a tuarih sunlawinak thawn a thosal theinak ding le Pathian ih khaisannak a ngah theinak dingah ziangso a ttul? Luka 24:46 ah “Messiah cu a tuar pei ih a thih hnu nithumnak ah a tho sal ding” tiah Bawi Jesuh nih in sim fiang asi. “Kannih tla Bawipa thawn kan thi ahcun a nunnak khal amah thawn kan nung tlang ding. Harsatnak kan tuar khat thei ahcun amah thawn kan uk tlang ve ding” tiah 2Tim 2:11-12 ah in sim asi. Harastnak tuar duhlo kan si ahcun Bawipa a hnongtu kan si dingih amah nih tla in hnong ve ding asi. 

Curuangah u le nau pawl harsatnak kan tuar tintein Bawipa ih duhdaan asi ti kha thei thiam uhsi. Amah Bawipa thawn kan um tlang theinak dingah a harsatnak in tepternak asi. Bawipa ih a thi le sa sungah siseh, harsatnak le retheinak ah siseh, mifarah pawl hnenah siseh, miharsa pawl le mikhual pawl hnenah siseh, ngakttah pawl hnenah siseh, ei ding le in ding neilotu pawl hnenah siseh Bawipa cu zumnak mit hawn thlir ttheu uhsi. 

Thihnak a nehih a thosaltu Jesuh Khrih in nan zatein lo thluasuah hram seh. Amen.