Hmuithlam dungih Huham (Rev. Fr. Dominic Hnin), February 16, 2021

Hmuithlam dungih Huham

Rev. Fr. Dominic Thawm Hlei Hnin

February 16, 2021, Ni hnih ni

Siarding: Gen. 6: 5-8, 7: 15, 10: Ps. 28: 1-4, 9-10; Mk 8:14-21.

• Kan Bawipa Jesuh in "tilet le thlisia a daiter" ti ah Mk 4:35-41 sung ah siseh, "Jesuh cu tidai parah a feh" tiah Mk 6:45-52 sungah siseh kan hmu ih cuticun Tipithuanthum ih bawi a si ti amah le amah a phuanawknak thu voihnih rori kan hmu. Himi caan ahhin a dungthluntu pawl khal an um ko nan an thinlung a rak hak ruangah an rak theithiam lo. Cuvek thotho in Bawipa cun kan pumsa thlarau hrangih kan ttulsammi pawl hrangah "minung thawngnga vei khat, minung thawngli voikhat" ti in vi hnih rori rawl a rak do nan dungthluntu pawl in a sullam an thei cuanglo. Lei tisa ih a neh tuk lai.

• Asinan Bawipa cun a dungthluntu pawl in "zo a si" ti an theih thiam a duh ruangah a phunphun in thu a zirh.

• Tuittum khalah dungthluntu pawl le Jesuh cu an mah te lawng "phir hlim'' te ih an um lai ah Bawipa in thu a zirh ih ''Pharisee pawl ih thilnu le Herod ih thilnu cu ralring dingah'' a sim.

•  

• Mk 7:5-13 sungah Dungthluntu pawl kut kholh lo ih rawl an ei ti thu ah Jesuh le Pharisee pawl karlak ih ruahnak a dan awk daan kan hmu. Cun Mk 8:11-13 khalah ''mangbangza in hmuh aw" tiah Pharisee pawl in Bawipa cu an ti. Cuticun Pharisee pawl in Bawipa cu an ti hrim, an hniksak, an dodal. Bawipa thawn pehpar in thinglung tthalo le depde an si. Dungthluntu pawl in cuvek lungput neilo dingah ralrin a ttul.

• Mk. 6:14-29 sungah Herod in Johan ih lu a tanter ti kan hmu. Jesuh ih thu le hla a rak theih tikah "a lu ka tantermi Johan a nungsal" ti ah a ti. Himi thu hla ah Herod in Jesuh parih a neihmi lungput kan hmu thei. Jesuh cu a rak engtai ih ral zoh in a rak zoh. Dungthluntu pawl in hivek lungput neilo dingah ralrinnak a pek.

• Thilnu malte khalin sangvut tampi hman a "tho" ter thei (Mt 13:33; Lk 13:21; 1Cor 5:6-8; Gal 5:9). Himi thilnu cun amai sungah a khohzetmi "cahnak thazaang" a um timi a langter. Kan Bible in himi thilnu thawng ih a rel duhmi cu "tthatlonak" cun rei lo te ah mi a ciahneh lohli thei timi a si.

• Bawipa ih ''Pharisee pawl ih thilnu le Herod ih thilnu cu ralring uh'' a timi kha a dungthluntu pawl in an thei thiam lo ih ''sang kan neih lo ruangah a si" an ti. Dungthluntu pawl cu lamcaw ken an hngilh ih sang hlom khat lawng an rak nei. Himi sang hlom khat ruangah Jesuh le a dungthluntu pawl ih karlak ah theihtiam lo awknak a suak zik. Jesuh cun Vancung ram thu lam a zirh nan a dungthluntu pawl cun hi leilung par thu ah an tang hrih, an Bawipa ih thuzirh cu an thlun thei hrih lo.

• Cutikah Bawipa in sanghlom malte thawi rawl a rak do thu pawl kha a vawn phorhsuah sal.

• Voi tampi cu kan thu buai le kan harsaatnak pawl cu Bawipa tello in kan mahte pahtlang kan tum ttheu. Nitin ih kan ttulhai le kan hnattuan an kan buai ih kan nunnak ih a thpibik tu riangri kan hngilh ttheu. Bawipa in kan hrangih in tuahsakmi pawl, kan mai hnen ih a um thu pawl, kan hrangih thu in kam mi pawl le kan lei tisa hrang khalah khua in ruahsak ti hi kan theih hngilh ttheu.

• Dunthluntu pawl in "sang kan nei lo ruangah a si maw" ti ih an ti tikah Bawipa cun "mit nan nei ko na-in, nan hmu lo, hna nan nei ko na-in, nan thei lo" ti ah a ti. Mk. 4:11-12 sung kan zoh a si le Bawipa ih pekmi tahtthimnak pawl a rak thei tiam lo tu "a lenglammi pawl" parah himi ttongfang a rak hmang dah. Tu ah a dungthluntu pawl parah himi ttongfang a hmang sal ih a dungthluntu pawl khal "a lenglammi" thawn an bang aw, ziangah ti le Bawipa cu an theihthiam thei hrihlo ruangah a si.

• Bawipa in sang hlom malte hmang in mi tampi rawl a do lai ah a hleifuan pawl khoziat a tang ti dungthluntu pawl in sim thei ko nan Bawipa cu zo vek, ziang vek a si ti an thei thiam cuang lo, a hnattuan zia le a huham pawl an hmu thiam cuang lo. A mipum dung ih a thlam an hmu thei lo, thil cangmi phen ih Pathian kutzung an hmu thiam lo (Lk 11:20).

• Mk 6:35-44 sungah Bawipa cun Dungthluntu pawl ih kenmi "sang hlom nga le nga pahnih" thawn mipi thawngnga rawl a do ih ah hlahtak hmanah bawm hleihnih a ti.

• Cun Mk 8:1-10 sung khalah Bawipa in dungthluntu pawl ih kenmi "sang hlom sarih" in minung thawngli rawl a do lala ih an hlah mi ah bawm sarih a ti.

• Hitivekin Bawipa in mangbangza zet ih mipi rawl a do nakah "Bawipa cun kan tisa lamih kan ttulsamnak pawl khal in theihpi" tihi Dungthluntu pawl cun thei hai sehla a awm nan, an rak thei thiam cuang lo.

• Bawipa in thu a sut bet: "nan thei thiam hrih cuang lo maw?" a ti. Himi thusuhnak thawn Bawipa ih parih a ra thleng lai dingmi "thuthuk" pawl khal a rak khih hmuh cia.

• Bawipa ih thusuhnak "nan thei thiam hrih lo maw?" ti mi in kan hmai lam hrang ih kan ke kar dan ding ah lai tampi a rel. A liamcia caan le tuini tuicaan ih kan hmuh kan ton mi pawl, Pathian hnen ihsin kan hngahmi thluahsuah pawl cu theihthiam kan tum ding ih cumi ihsin hmailei caan ah Bawipa ih parah rinsannak le zumfeknak in neiter ding.

• Nitin na hmuh na ton mi ihsin Bawipa kha theihthiam tum aw la cuisin na zumnak a fek sinsin ding.