Hnon Mi le Cohlan Mi (Thuthangtha sim tu - Rev. Fr. Lucas Sum)

Hnon Mi le Cohlan Mi

Thuthangtha sim tu - Rev. Fr. Lucas Sum

Zumtu u le nau, nan hnen ah Pathian um hram seh.

            Tui ttum ah “Hnon Mi le Cohlan Mi” timi thulu hmang in Pathian thu ruat tlang hrih uh si. Hmai sa ah, Baibal Cathianghlim kan ngai hrih pei. Luka 12: 8 - 9 tiang:

“Hitin ka lo sim: zokhal sisehla, kei mai ta a sinak kha, mi hmai ih a phuang ngam tu cu, mi Fapa in Pathian ih vancung mi pawl hmaiah, cu bangtuk in a phuang ve ding. Sikhalsehla mi hmai ah I hnongtu cu, mi Fapa in Pathian in vancung mi pawl hmai ah ka hnong ve ding.” 

            Zumtu u le nau, milai kan nuntu khawsak dan kan thlir rero tik ah lungawi caan le riah siat caan kan tong ttheu a si. Cat lo bang lo ih, kan lungawi ringring thei lo vek in, kumkhua in kan riah a sia ve cuanglo. Cu ti a silen, ziang caan ah lungawi ding kan si? Mi ih cohlan mi kan si caan te khi kan hrangih a nuam bik mi caan a si. 

            Cun, khat lam ah cun, mi ih hnon mi kan si caan khi, kan hrangah riah siat bik caan a si. Tahtthimnak ah fapa pakhat in, zu va in, a nu le a pa, cun a u le a nau pawl ih mit tli a tlak ter ringring a si ah cun, cu mi pa cu, a rei hlanah, an innsungsang in a cohlang thei nawn lo ding a si.  An innsungsang in an hnong ding a si. Mi dang ih, khi pa khi zo a si? Nan fate a si maw? Nan u nau a si maw?, tiih an suh a silen, Ai, si hlah, zo a si ti kan thei lo, tiah an phat san men ding a si.

            A thawi zawngih kan sim asilen, milai pakhat le pakhat kan cohlan aw tik ah kan lung a awi zet. Cun, pakhat le pakhat kan hnon awk, asilolen, kan phat san awk caan ah kan riah a sia zet a si.

            Zumtu u le nau , thlarau lam ih kan zoh asilen, zumtu kan zate hrangih a thu pi bik mi cu, a pakhat nak ah, Pathian ih conhlan mi si ding, hi a thupi bik a si. Pathian ih cohlan mi si dingin ziang kan tuah pei? Mitu ih cathianghlim kan ngai zo vek in Jesuh in hitin fiangten in sim: “zokhal sisehla kei mai ta a sinak kha, mi hmai ih a phuang ngam tu cu, mi Fapa in Pathian ih vancung mi pawl hmaiah, cu bangtuk in a phuang ve ding a si” tiah in sim. Pathian in a vancung ram nuam ah in cohlang ding tinak a si. Nitin kan nunnak ah Pathian a cohlang tu le a thuthangttha a phuang ngam tu kan si a ttul tinak a si.

            Cun a pahnih nak ih a thupi mi cu, khat lam ih kan zoh a silen, Pathian ih hnon mi si lo ding, a thupi a si. Pathian ih hnon mi kan si ah cun kan hrangah hell lawng a taang a si. Mithianghlim Peter cun Jesuh that dingih a hawl tu ralkap pawl a ttih ruangah Jesuh a phat san / a hnong a si. Lk 22:54-62: “Hnen um nu nau pakhat in Peter kha meisa kiangih a to kha a hmuh tik ah hmaiton in a zohhliah ih “Hipa hi Jesuh hnenih a tel ve mi a si,” tiah a ti. Asinan Peter in, “Nunau nu, cupa cu zo a si ti hman ka thei lo,” tiah a ti. 

            Zumtu u le nau, Jesuh a phat san tu le a hnong tu kan si ah cun Jesuh ih hnon mi kan si ding ih Jesuh cohlang tu kan si ah cun Jesuh in in cohlang ve ding a si. Nitin kan nunnak ah Pathian a cohlang ringring tu si thei dingin zum sin uh si.

            Thuthangttha ngai tu nan zaten, Bawi Jesuh in nitin in lo cohlang hram seh. Neh hnu san khal ah mithianghlim pawl le vancung mi pawl hmai ah lo cohlang hram seh. Amen.