Homily for Friday (14.6.2024)

Homily for Friday (14.6.2024)

RVA ihsin thuthangtha ngai in thlarau thazang la theu tu zumtu u le nau pawl, Bawipai’ pekmi hnangam
daihnak in lo zeel hram sehla, ruangpum thlarau thinlung harhdamnak thluasuah tla Bawipa’n lo pe in, nan
tuahtuannak khalah hlawhtlinnak lo pe cio hram seh tiah thlaza cam in cibai ka run lo buk hai a si.
Tui tum ah, sualnak sungih in thlenpi tu thil hi ziangbik a si timi thu thawn pehpar in hlawmawknak run neih ka
duh.
Tu hrawngih Gospel kan siarmi pawl kan zoh tikah, Thukham 10 ih zirh duhmi thawn pehpar in kan Bawipa
Jesu in, lenglam nun ih langmi lawng si lo in, sunglam nun ih cangvai tu thil tiang kan ralrin a tul zia a
simfiangnak thu pawl kan thei.
Mani ah ‘mi na that lo pei’ timi thukham thawn pehpar in himi sualnak ih in thlenpi tu thinhengnak le tongkam
siava pawl ralrin ding a thupit zia kan Bawipa ih in zirh mi thuhla kan thei.
Tuini ih kan siarmi Mt. 5:27-32 sungah taangtawm sualnak thawn pehpar in hi sualnak ih in thlenpi tu thinlung
sungih hiarnak kan ralrin ding a tul zia in zirh hrih.
“Taangtawm sualnak nan tuah lo pei, an ti theu mi nan thei. Asinan kei cun: Nunau kha hahio mit in a zohtu cu
a thinlung in cunu thawn taangtawm sualnak a tuah zo tiah ka lo ti. Curuangah na vorhlam mit in a lo sualter
asile phorh awla hlon aw. Na ruangpi hell sungih hlon tuar hnak cun na taksathen pakhatkhat na sun cu na
hrangah a tha sawn. Na vorhlam kut in a lo sualter le sattan awla hlon aw. Na ruangpi hell sungih hlon tuar hnak
cun na kutke pakhatkhat tan a si cu na hrangah a tha sawn” ti rori in Bawipa Jesu in a ti.
A tongkam vek cekci ih a sullam kan lak ding cun, kutke kim kan um ding zum a um lem lo ding. Kan Bawipai’
in zirh duh mi taktak cu, kan mit phorh ding le kutke tan ding ti hnak in, sualnak ih in thlenpi tu taktak hi ziang
a si timi ruat ih kan ralrin ding kan hrial ding in duhsak mi a si.
Minung cun, kan taksa rori ih kan tuah lo a si ahcun, sualnak ihsin luat verver vekah tla kan ruat aw theu nan,
kan Bawipa cun, kan thinlung hman in taangtawm sualnak tuah thei kan si zia ralrin in pe a si.
Mit phorh ih hlon ding in ti tikah, kan thinlung sungih hahionak/hiarnak thleng ter tu thil kan hmuh caan ah kan
hrangih forbidden fruit an ti theumi khammi thingrah a si ti kan theih mi a si ahcun, zoh bet loih um ding in ti
duh sannak a si.
Sersiamnak thuhla sungah khan, Pathian in ei lo ding tiih a kham mi thingrah kha, rulpi ih bumnak lungih Eve
in a zohhliah tikah a thinlung sungah hiarnak a thleng ter ih cuih hiarnak in sualnak sungih a thlenpi nak thuhla
kan thei cio ko.
Minung kan si cun, kan thinluang ruahnak sungah thil tha le thil tha lo ziang a si ti kan theih vekin, kan hrangih
khammi thingrah ziang a si timi khal kan thei cio ko. Kan hrangih khammi thingrah hi minung tla an si thei;
thilri tla an si thei. Cupawl kan hmuh tinte’n hahionak in neih ter a si ahcun, zoh bet kan duh zet hman ah kan
hrial le a tha sawn. Cumi hahionak ihsi’n a rami nomnak/lungsitnak hnakin kan hrial thei ruangih kan
lungsitnak hin hnangamnak le lungawinak ah in thleng ter sawn.
Kan tuah duh zet nan, khammi thingrah a si ti kan theih ruangah tuah lo ih kan sup tento mi kha taksathen vun
tan vekin tuar a har lawk men thei nan, Pathian hmaika ih kan vun zohfel awk tikah, lungawinak ah a cang
riangri theu. Cucu Vanram nunnuamnak taktak cu a si.

Curuangah duhdawtmi u le nau pawl, kan hrangah khammi thingrah a si ti kan theih hnuhnu cun, ei kan hiar zet
mi a si tla le, ei lo teih hrial thei zuam uh si. Khammi thingrah a si ti kan theih hnuhnu cun, minung siseh, thilri
siseh, tikcu le hmun le ram siseh, hrial thei zuam uh si.
Pathian ih ei ding ih in pek mi thingrah dang thatha kha lungsi zet le puar zet ih kan ei ngah ringring a si ahcun,
khammi thingrah ei hiarnak tla a dem ko ding. Curuangah Pathian in kan ei dingah in pekmi thingrah thluasuah
thatha pawl cen thiam tu si khal kan zuam cio pei.

Add new comment

3 + 8 =