Homily for Friday (8.3.2024)

Homily for Friday (8.3.2024)

RVA ihsi’n thuthangtha ngai in thlarau rawl a zawh theutu mipi nan zate parah Bawipai’ pekmi hnangam daihnak le thinlung thlarau taksa damnak thleng hram seh ti’n thlaza cam phah in cibai ka run lo buk hai a si. 

Tuini ih kan siarmi Gospel thuthangtha thianghlim hmangin thlarau thazang la khawm dingah ka run lo sawm duh a si.

Ahmaisa ah Cathianghlim kan siar ta pei: Mk 12:28-34

Cutawkah an thu relmi a thei vetu Daanthiam pakhat a rak um. Jesuh in Sadusi pawl ih thusuhnak kha a let thiam zet ti a theih tikah Jesuh hnenah a ra ih, “Khuimi thukham so a thupi bik?” tiah a ra sut. 

Jesuh in, “A thupi bikmi thukham cu ‘Maw Israel mi pawl ngai uh! Bawipa kan Pathian lawng hi Bawipa a si. Bawipa nan Pathian cu nan thinlung zate, nan nunnak zate, nan ruahnak zate le nan thazang zate thawn nan duhdaw pei’, tihi a si. Cun a pahnihnak ih a thupimi thukham cu, ‘Na innhnen kha nangmah na duhdawt awk vekin na duhdaw pei’, tihi a si. Hi thukham pahnih hnakinh a thupi sawnmi thukham a um nawn lo,” tiah a ti. 

Daanthiam pa cun Jeshuih hnenah, “Sayapa, na timi cu a tha ngaingai. Na sim bangtukin Bawipa lawng hi Pathian a si ih pathian dang an um nawn lo, ti cu a dik ngaingaimi a si. Curuangah milai in Pathian cu a thinlung zate, a ruahnak zate le a cahnak zate thawn a duhdaw pei ih amah ih pum a duhdawt vekin a innhnen cu a duhdaw ve pei. Hi thukham pahnih thlun cu mei-ur thawinak le thawinak dangdang pawl pek hnakin a thupi sawn a si, “tiah a ti. 

Jesuh in a thu lehmi cu a fel zet a si, ti kha a hnmu ih a hnenah, “Nangmah cu Pathian Uknak thawn nan hlat aw lo,” tiah a ti. Cuih hnu ahcun Jesuh cu zohman in thu an sut ngam nawn lo. 

Duhdawtmi nu le pa u le nau pawl, kan Cathianghliim siarmi hi thukham thuhla a si. Thukham kan ti tikah Pathian ih duhmi le duhlomi langtertu an si ih, thukham thlun timi cu Pathian ih duhnak tuah hi a si mai timi kan fiang a tul. Daanthiam pa ih thusuhnak ruangah thukham lakih thupi bik tla kan thei ngah ih a hnenah lungawithu sim ding kan nei ti sehla a sual lo ding.

Kan Bawipa ih a rak lehdan kan zoh tikah, kan Pathian hi duhham tuk vek tla a bang. Thinlung zate, ruahnak zate, thazang zate le nunnak zate thawn rori duhdawt ding duh tu Pathian hi a duhham dan a mak tuk lawm mam ti’n zumlo tu pawl cun an ti men thei. Amah kan biak Pathian rori khal in “Kei cu thiik nei Pathian ka si” tiah Exo 20:5-6 sungah fiang zetin in sim zo.

Asinan, kannih zumtu pawl cun, a duhhamnak hi kanmaih hrangah a si timi kan thei. Kannih ih duhdawtnak hi anih in a tul lo lawlaw; kanmah sawn in amah kan duhdawtnak thawn lawngin mi famkim thei kan si ruangah a si sawn. 

Mihrekkhat cun, “kan thinlung zate thawn Pathian kan duhdawt a si ahcun, kan innsang le kan rualpi, kan darling tivek pawl hrangah kan thinlung a tang nawn ding maw si, kan duhdawt thei nawn ding maw?” ti’n kan ruat men thei. A taktak ahcun, Pathian hnenih kan pekmi thil tha pawl hi a cem lam si loin, a thanglam a si ringring. Kan famkimlonak le sualnak tivek thiltha lo a hnenih kan pek mi pawl cu a rak ziamral ter theu ko nan, thiltha kan pek mi pawl cu a rak thang ter ringring tu Bawipa a si. 

Thinlung zate thawn Pathian duhdawtnak timi cu ziang kan tuah tinte’n Pathian lungawi ter tum ringring ding hi a si. Ruahnak zate thawn Pathian duhdawtnak timi cu Pathian ih duhmi lawnglawng ruat thei dingih zuam hi asi. Cuti’n Pathian ih duhmi ruat ih kan tuahmi thawngin a lung kan awi ter tinte’n kan thazang zate le kan nunnak zate thawn Pathian kan duhdawtnak kan langter ringring a si.

Cuti’n a nung thei tu pawl cun, Pathian ih duhnak vekin anmah le mah khal siseh, midang khal siseh an duhdawt thiam ve a si. Cuvek minung pawl cu ziangvek harsatnak le vansannak an ton hmanah sunglam nun ih hnangam lungawinak an nei thei ringring thotho. 

Cumi cu Vancung Uknak sungih um le Vanram nunnaumnak tep ngahtu sinak kha a si mai. 

Curuangah Daanthiam pa in kan Bawipai’ thulehnak vekin thukham lakih thupi bik khuimi an si timi a theihthiam dan le a cohlan dan a rak langter tikah, kan Bawipa in “Nangmah cu Pathian Uknak thawn nan hlat aw lo” tiih a rak tinak a si. Pathian Uknak timi cu Vancung Uknak kha a si ih Vancungram kan timi kha a si mai.

Cuih Pathian Uknak kan timi Vanram thawn naih aw men dingah Bawipa’n in sianglo. A sungah lut in a nuamnak tep ngah tu si dingah in duh.

Thukham lakih thupi bik kan thei zo ih, Pathian ih duhmi khal kan thei zo. Cumi theihnak men in tawp ter lo’n Pathian ih duhmi tuahnak in a Uknak sungih nunnuamnak tep ngah tu si zuam cio uh si!

Cuih Pathian ih duhmi thei na keukeu cingih a duhnak thawn kalh-awmi lawnglawng kan tuah ngah pang ahcun, kan thinlung sungah hnangam lungawinak a um thei loih, Vanram nuamnak hnakin Hellram ih harnak sawn kan tep ngah pang theu si ko lo maw? 

Atu-ih kan dinhmun hi Hellram sungih thlengmi kan si pang maw? Kan si pang tla le beidong men ding kan si lo. Nang le kei hrangah Jesuh Khrih ih thisen man hi a tang ringring ko; kan thih hlan sung cu Pathian ih zangfahnak co thei kan si ringring. Tangdornak le sualsirnak thawn amah kan pan ding lawng kan hmabak mi a si.

Vanram thawn kan naih vekin Hellram thawn khal kan naih aw zet timi hngilh hlah uhsi! Nitin ih kan hringnun hi Vanram le Hellram karlak ih um kan si ringring. Hellram hnakin Vanram sungih lut ngah tu le a nuamnak tep ngah tu si thei ringring dingin Bawipa’n in thluasuah cio hram seh!

 

 

 

Add new comment

1 + 6 =