Homily for Monday (11.7.2022)

Homily for Monday (11.7.2022)
           Kan Bawipa Jesuh Khrih ih zangfahnak, Pa Pathian ih duhdawtnak le Thiang Thlarau ih pawlkomnak cu RVA ihsin thuthangtha a rak ngaitu nan zate hnenah um hram seh ti’n hmaisabik ah cibai ka run lo buk hai a si. Tui tum ah “Kan theih duhlo mi Jesuh Khrih” timi thulu thawn hlawmawknak run neih ka duh a si.Zumtu tam sawn cun, kan Bawipa ih thuhla thawn pehpar in, zangfah lainatnak neitu a si zia, duhdawtnak neitu a si zia, thatnak hmuahhmuah le huham neitu a si zia, daihnak neitu le pe thei tu a si zia tivek lawnglawng hi kan thei duh cio ko ding.
           Hmansehla, tuini Gospel kan siarmi Mt 10:34 -11:1 sung kan zoh tikah, kan theih paih lemlo mi kan Bawipai’ tongkam pawl kan hmu thei. Hmaisabikah v.34 kan vun zoh hnik pei: “Leilung tlun ah remnak thlengtertu ah ka ra ti’n i ruat hlah uh. Remnak tuahtu ah ka ra lo, ralnam keng in ka ra sawn a si” a ti. Hi tawk zawn ih ralnam a timi hi, ral thahnak hrangih hmanmi nam a ti duhsan mi a si lo; Pathian ih thuthennak sawhkhihtu khal a si lo. Greek tongfang an hmanmi hi ‘machairan’ a si ih, hivek nam pawl cu sa an can tikah a tha le a sia thleidan nak ding hrangih an hmanmi nam a si.

        Heb 4:12 sungah Pathian tongkam/thu ih thil ti theinak thawn pehpar in kaphnih hriammiralnam vek a si tiih tahthimnak a rak sim khalah cangantu ih a hmanmi tongfang cu ‘machairan’ thotho a si.Curuangah ralnam keng in ka ra ti’n Jesuh Khrih ih a ti tikah, amah a zumtu le zum lotu, a thu zirhmi a pomtu le pom lotu karlak ah thenawknak a suak ter sawn ding tinak a si. Curuangah vs. 35,36 kan vun siar bet a sile, innsungsang sungtel karlak hmanah remawklonak a um ding, mi pakhat ih a ral tumbik cu a innsaang mi an si ding a ti rori a si.
          Ziangruangah kan Bawipa in, hivek ei har tong kha zet ngelcel hmangin thu a rak sim timi kan vun zoh tikah, Messiah thawn pehpar in an ruahnak a palhzia theifiang dingah a si bik. Is 9:5-7 sung kan siar a sile, Messiah cu daihnak thlengtertu Siangpahrang dinhmun in a ra ding ti’n a um. Curuangah Jesuh Khrih hi an hrangahMessiah taktak a si ding tiih an zum le vete’n remdaihnak petu ding ti’n an rak ruat cih. Buainak pawl
hmuahhmuah a hlo ter ding ti’n an ruat.
                Asinain, Messiah ih rat sannak taktak cu mi hmuahhmuah remawk ter ding hnakin, Pathian thawn remawk ter ding sawn a si. Himi thu cu Rm 5:1 sung kan siar le fiang zet in kan hmu thei. Remdaihnak cu zo cio kan duh thluh ko nan, ol te’n ngah theih khal a si cuang lo. A tu rori ah, leilungpi huap in siseh, kan kiangkap naite rori ah buainak nasa zetzet ti cawk lo’n hmuh ding an um. Ziangruangah hiti’n buainak a thleng timi kan vun thlir tikah, buai duh tuk ruangih buai hnakin, thil hmuhdan le pomdan bangawk lo ruangah a si bik.

             Thuthangtha thu khal ah cuti thotho si mai. Leitlun thu lawnglawng rel duhtu le thuthangtha/zumnak/biaknak thuhla rel zuamtu karlakah titi kaka a thaw thei dah lo ding.Thuthangtha pomdan le zumdan a bangawk lo ruangah Khrihfa ciocio lak hmanah ziangtluk in thu buai a um ti cu kan thei thluh cio ko. Sungkhat unau rori hman biaknak/zumnak thu ruangah thate’n biakaw thei lo kan tampi ko. Zumtu le zumlo tui’ karlak sinsin ahcun rel ding a um lo……himi ruangah Christian biakinn tampi siatsuah an ton rero nak tla a si. Curuangah kan Bawipai’ tongkam cu tu tiang khalah a dik ringring lai tinak a
si.
                 Cule, kan Bawipa in “zo khal, keimah hnakin a nu le pa, a fale pawl a duhdawt sawn tu cu ka dungthlun tu si dingah a tlak lo” a ti bet. Himi khal hi kan hrangah ei har zet mi tongkam a si ve ko ding. Hi tawk zawn ah Jesuh Khrih kan thlun cun, innsungsang ziangih rel nawn lo ding a tinak si loin, kanmaih innsang sungtel pawl hi kan milai sinak ah a thupi bik ih kan retmi an si theu vekin, Bawipa khal kan thupit ve ding tinak a si. Cule, zumnak lam thu thawn pehpar in, kan innsang sungtel pawl le Jesuh Khrih karlak ah pakhatkhat hril tuldinhmun a si ahcun, Jesuh Khrih sawn hril ding tinak a si. Jesuh Khrih hril sawn ruangah nupi pasal thawn a then-aw tu tla kanmah zumtu lakah an um hnuaihni ko. Cu
pawl hi, thinglamtah phur in Jesuh Khrih thluntu taktak an si. Lawmtlak taktak khal an si.
                Ziang tluk in Jesuh Khrih ih thuthangtha nunpi khal ningla, leitlun kan nun sung ahcun, buainak timi cu a cem dah lo ding. Thuthangtha ruangah kan duhdawt zetmi pawl thawn thenawknak hman a suak lam ding a si. JesuhKhrih kan hril sawn thei ringring ding hi, zumtu pakhat cio ih kan mamawh bik mi a si.Pathian thawn kan karlak ah remawknak a um sung cu, ziang vek buainak le huatnak lak khalah thinlung hnangamdaihnak kan hmu thei thotho. Cucu leilung ih pek thei mi a si lo vekin, a lak khal in laksak thei lo.