Homily for Monday (23.10.2023)

Monday, October 23, 2023

Homily for Monday (23.10.2023)
Kan Bawipa Jesuh Khrih ih zangfahnak, Pa Pathian ih duhdawtnak le Thiang Thlarau ih pawlkomnak cu
nanmaih hnenah um seh law tiah RVA ihsin thuthangtha a rak ngaitu nan zaten cibai ka run lo buk hai a si.
Leitlun ih thuthangsia theih ding tam zet lakah thuthangtha ngainak caan tha kan ngah thei mi hi a sunglawi
hleice ee. Pathian ih zangfahnak liolio ruangah a si. A hmaisa bikah Pathian hnenah lungawi thu kan sim tlang
pei.
Tui tum ih kan hlawm awk ding mi thuthangtha cu Lk 12:13-21 sungta a si ding.
Bible kan vun siar ta hnik pei………..
Duhdawtmi u le nau pawl, mitu ih kan siar mi kha tha te’n vun ruat tlang hnik uh si.
Jesuh hnen ih bomnak ra diltu pa hi, a pa ih ro a tanta mi kha a upa in a laksak thluh ruangah a co lo lawlaw a si
maw, lole, tam deuh co bet a duh ruangah a si maw ti cu a fiang lo. A sinan, an unau lakah ro thuhla ih buainak
a um ti cu a fiang.
A ngaingai ih kan ti asile, Judah daan ah ro thil then awk ding daan thawi pehpar in, felfai te’n Pathian ih rak
khiah cia mi a um ko (Dt. 21:15-17). Hi te unau an buai hi, an pa in a thih hlanah tha te’n ro a rak thensak lo
ruangah maw a si ding?
Khat lei lam ah, Jesuh Khrih ih milian mi-aa pa tahthimnak thuhla a sim mi kan zoh tikah, an pa hi fa le hrang
ruat lo’n kum reipi a neih mi hlawnthil cen ding a rak tum nan, rinlo pi ih thi tla a rak si thei. Ziangziang tla le, a
tanta mi hlawnthil ruangah a fale karlak ah buainak a suak ti cu el theih lo a si.
Himi ro thensak dingih nauta sawn ih bomnak a dil tikah kan Bawipa cun zo an mawh ti zawngin thu a fehpi lo.
Hi buainak hmangin misenpi sawn kha duhhamnak a phunphun ralring dingin a zirh sawn a si. Ziangtluk ih
milian kan si hmanah kan neihmi hlawnthil in nunnak taktak ih in thlenpi thei lo zia khal in simfiang cih.
Milian mi-aa pa tahthimnak ih a simmi kan zoh a sile, ka… ka… ka… timi tongfang tampi a hmang. Himi hin
amaih hrang lawng ruat tu a sinak a langter. A rawl inn ih tlem nawn lo ding khop in rawl a nei tam nan, midang
zem ve ding hnakin amaih hrangih ui ding lawng a ruat ih rawl inn sak bet nuam hngazau ih um huahhi a tum.
Cuti ih nuamcen a tum lai tak fangah ‘mi-aa pa, tuizan rori ah na nunnak lak a si ding. Na khawlmi thil hi zo in
a co ding? ti’n Pathian in a ti’ ti a si.
Tuisan leitlun boruak kan zoh tikah, hi milian pa vekin leitlun nunnuamnak hrang lawng ruat ih cangvai mi
minung tampi kan um ti sehla a sual lo ding. Midang pal tahrat ih thanso tum le, maih sipuazi thanso nak dingah
midang siatsuah poi lo tla kan um hnuaihni. Cuvek pawl cu ziangvek hlawnthil thatha tampi an neih khal a sile,
Pathian mit hmuh ahcun milian si lo’n mi-aa an si sawn daih. Leitlun khawvel umdan hi thlir hnik sehla,
mifarah le mitlasam kan tam tuknak hi, milian mi-aa kan tam ruangah a si bik ko lo maw?
Khat lei lam ah kan hrangih lungawiza thuthangtha cu ziang a si tile leitlun dan ah mifarah zet kan si men thei
nan, kan neih tawkte ah lungsi in, midang zawnruat thiam tu kan si ahcun, Pathian ih mithmuh ah milian kan si
thotho timi te hi a si. Cuti ih ka ti ruangah lennak hnakin farahnak a tha sawn ka tinak a si lo. Aatnak tel lomi
lennak hi kan hawl dingmi a si ka ti duhnak a si.
Kan fate pawl hnenah leitlun hlawnthil roh ding kan neih thei ding cu a tha tuk lawlaw ko. Hmansehla, Pathian
mithmuh ih lennak a simi le nunnak taktak ih thlenpi theitu ro sunglawi kan tanta ngah lo pang a si ahcun, tuini
Cathianghlim sungih kan theih mi unau vekin kan fale pawl khal ro thu ah an buai tengteng ding ti cu theih cia a
si. (fate nei lo kan si hmanah, kan unau sungkhat pawl an rung buai thei)